'పుష్ప 2'.. ప్రభాస్ రికార్డును అల్లు అర్జున్ బ్రేక్ చేస్తాడా?

ఐకాన్ స్టార్ అల్లు అర్జున్ నటిస్తున్న 'పుష్ప 2: ది రూల్' సినిమా మరో వారం రోజుల్లో ప్రేక్షకుల ముందుకు రానుంది. ఈ మూవీపై అంచనాలు ఏ రేంజ్ లో ఉన్నాయో ప్రత్యేకంగా చెప్పాల్సిన అవసరం లేదు. యావత్ సినీ ప్రియులు ఈ సినిమా కోసం ఆసక్తిగా ఎదురుచూస్తున్నారు. ప్రీ-రిలీజ్ హైప్ ను బట్టి చూస్తే, నార్త్ సర్క్యూట్ లో ఈ మూవీ సెన్సేషన్ క్రియేట్ చేసేలా కనిపిస్తోంది. ట్రెండ్ చూస్తుంటే హిందీలో 'బాహుబలి 2' రికార్డ్ బ్రేక్ అయినా ఆశ్చర్య పోవాల్సిన పనిలేదని ట్రేడ్ వర్గాలు అంటున్నాయి.

రెబల్ స్టార్ ప్రభాస్, దర్శక ధీరుడు ఎస్.ఎస్ రాజమౌళి కాంబినేషన్ లో తెరకెక్కిన 'బాహుబలి 2: ది కన్‌క్లూజన్' సినిమా.. హిందీ బెల్ట్ లో అనూహ్య వసూళ్లు రాబట్టింది. ₹ 515 కోట్ల నెట్ కలెక్షన్లతో బాక్సాఫీస్ వద్ద భారీ బ్లాక్ బస్టర్ గా నిలిచింది. ఆ తర్వాత ఏ డబ్బింగ్ సినిమా కూడా నార్త్ లో ఈ స్థాయిలో పర్ఫార్మ్ చేయలేదు. కానీ ఇప్పుడు 'పుష్ప 2: ది రూల్' సినిమాకి ఉత్తరాదిలో ఉన్న క్రేజ్ ను బట్టి, ప్రభాస్ రికార్డును బ్రేక్ చేసే సామర్థ్యం అల్లు అర్జున్ కి ఉందని అంచనా వేస్తున్నారు.

'పుష్ప 2' సినిమాకి పాజిటివ్ మౌత్ టాక్ వస్తే, హిందీ బెల్ట్‌లో 'బాహుబలి 2' నిర్దేశించిన కలెక్షన్ల టార్గెట్ ను రీచ్ అవ్వడం ఏమంత కష్టం కాకపోవచ్చు. ఎందుకంటే ప్రభాస్ సినిమా స్థాయిలోనే బన్నీ మూవీకి మాస్ అప్పీల్ కనిపిస్తోంది. నార్త్ లో ఇప్పుడు ఎక్కడ చూసినా పుష్పరాజ్ గురించే మాట్లాడుకుంటున్నారు. ఇక 'బాహుబలి 2' సక్సెస్‌లో కీలక పాత్ర పోషించిన ఫ్యామిలీ ఆడియన్స్‌.. 'పుష్ప 2' చిత్రానికి కూడా కనెక్ట్ అయ్యే అవకాశాలు ఉన్నాయి.

'పుష్ప 2: ది రూల్' ఒక కమర్షియల్ యాక్షన్ మూవీ. ఇందులో మాస్ ని ఆకట్టుకునే హై ఓల్టేజ్ యాక్షన్ తో పాటుగా, కుటుంబ ప్రేక్షకులను థియేటర్లకు తీసుకొచ్చే బలమైన ఫ్యామిలీ డ్రామా కూడా ఉంది. భార్యాభర్తల ఎమోషనల్ బాండ్, తల్లీ కొడుకుల సెంటిమెంట్, సవతి సోదరులతో సెంటిమెంట్‌ వంటి అంశాలు కనెక్ట్ అయితే ఫ్యామిలీ ఆడియన్స్ సినిమాకి క్యూ కడతారు. అదే జరిగితే నార్త్ లో అల్లు అర్జున్ సినిమా ఎక్స్ట్రార్డినరీగా పర్ఫామ్ చేస్తుందనడంలో సందేహం లేదు.

ఎలాంటి ప్రమోషన్స్ లేకుండానే 'పుష్ప 1' సినిమా హిందీలో రూ. 100 కోట్లకి పైగా కలెక్షన్లు సాధించి అందరినీ ఆశ్చర్య పరిచింది. ఇప్పుడు 'పుష్ప 2' పై బాలీవుడ్ లో అంచనాలు తారాస్థాయికి చేరుకున్నాయి. దీని దెబ్బకు క్రేజీ హిందీ సినిమాలే వెనక్కి తగ్గుతున్నాయి. ఇక అల్లు అర్జున్ సినిమా రూ. 1000 కోట్ల క్లబ్ లో చేరాలంటే, హిందీ మార్కెట్ కీలకమని చెప్పాలి. హైప్ చూస్తుంటే, నార్త్ లో 'బాహుబలి 2' నంబర్స్ ను చేరుకోవడం సాధ్యమయ్యేలా కనిపిస్తోంది. మరి బాక్సాఫీస్ వద్ద ఏం జరుగుతుందో చూడాలి.

'పుష్ప 2: ది రూల్' సినిమా డిసెంబరు 5న ప్రపంచ వ్యాప్తంగా గ్రాండ్ గా రిలీజ్ అవుతోంది. తెలుగుతో పాటుగా మిగతా అన్ని భాషల్లోనూ అత్యధిక స్క్రీన్స్ లో విడుదల కాబోతోంది. 2Dతో పాటుగా 3D, ఐమ్యాక్స్, 4DX ఫార్మాట్స్ లోనూ అందుబాటులోకి రానుంది.