కిల్ రీమేక్.. నిజం కాదు

రాఘవ లారెన్స్ హీరోగా బాలీవుడ్ బ్లాక్ బస్టర్ యాక్షన్ థ్రిల్లర్ ‘కిల్’ను రీమేక్ చేస్తున్నారనే వార్త కొన్ని రోజుల కిందట సోషల్ మీడియాలో చర్చనీయాంశంగా మారింది. హాలీవుడ్లో సైతం రీమేక్ కాబోతున్న ‘కిల్’ను దక్షిణాది భాషల్లో పునర్నిర్మించడానికి చర్చలు జరుగుతున్న మాట వాస్తవమే కానీ.. లారెన్స్ అందులో హీరో అనేసరికి జనాలకు ఫ్యూజులు ఎగిరిపోయాయి. తెలుగులో వీర, రాక్షసుడు, కిలాడి లాంటి సినిమాలు తీసిన రమేష్ వర్మ పెన్మత్స దర్శకత్వంలో ఈ సినిమాను అనౌన్స్ చేశారు. ఈ సినిమా ప్రి లుక్ పోస్టర్లో లారెన్స్ బ్యాగ్రౌండ్లో రైలు బండి కనిపించగానే ఇది ‘కిల్’ రీమేక్ అనే పుకార్లు మొదలయ్యాయి. జనాలు ఆ దృష్టితోనే ఈ సినిమాను చూస్తూ వచ్చారు. ‘కిల్’ రీమేక్‌కు లారెన్స్ ఎలా న్యాయం చేయగలడని తలలు పట్టుకున్నారు. లారెన్స్ సరసన త్రిష హీరోయిన్ అని వార్తలు రావడంతో మరింత అయోమయానికి గురయ్యారు.

ఐతే సస్పెన్సుకి తెరదించుతూ లారెన్స్-రమేష్ వర్మ దర్శకత్వంలో తెరకెక్కుతున్న సినిమా ‘కిల్’కు రీమేక్ కాదనే విషయాన్ని మేకర్స్ చెప్పకనే చెప్పేశారు. ఈ రోజు ఈ సినిమా ఫస్ట్ లుక్ లాంచ్ అయింది. ఈ చిత్రానికి ‘కాల భైరవ’ అనే టైటిల్ ఖరారు చేశారు. ఫస్ట్ లుక్ చూస్తే ఇది సోషియో ఫాంటసీ టచ్ ఉన్న సూపర్ హీరో కథ అని అర్థమవుతుంది. రమేష్ వర్మ సొంత కథతోనే ఈ సినిమాను రూపొందిస్తున్నాడు. ఇది ‘కిల్’ రీమేక్ కాదని తేలిపోయింది. దీంతో చాలామంది హమ్మయ్య అనుకుంటున్నారు. మూడు నిర్మాణ సంస్థలు కలిపి ఈ చిత్రాన్ని ప్రొడ్యూస్ చేస్తున్నాయి. వచ్చే ఏడాది వేసవిలో ‘కాల భైరవ’ ప్రేక్షకుల ముందుకు రానుంది. రాఘవ లారెన్స్ పుట్టిన రోజు సందర్భంగా దీంతో పాటు మరో సినిమా ఫస్ట్ లుక్ కూడా లాంచ్ చేశారు. లారెన్స్ ప్రధాన పాత్రలో ‘బుల్లెట్టు బండి’ అనే మరో సినిమా కూడా తెరకెక్కుతోంది. దీని ఫస్ట్ లుక్‌లో లారెన్స్ చాలా స్టైలిష్‌ కనిపిస్తున్నాడు.