మొన్న పాస్‌పోర్టు.. ఇవాళ ఫోన్.. మ‌హేష్ నుంచి జ‌క్క‌న్న ఇంకేం లాక్కుంటాడో

సూప‌ర్ స్టార్ మ‌హేష్ బాబు, రాజ‌మౌళి కాంబినేష‌న్ లో వ‌స్తోన్న పాన్ వ‌ర‌ల్డ్ సినిమాకు సంబంధించిన ఏ సంగ‌తైనా స‌రే బ‌య‌టికొచ్చిన నిమిషాల్లోనే అన్ని చోట్లా వైర‌ల్ అయిపోతుంది. రీసెంట్ గా పూజా కార్య‌క్ర‌మాల‌తో మొద‌లైన ఈ సినిమా నుంచి ఎప్పుడెప్పుడు అఫీషియ‌ల్ గా అనౌన్స్‌మెంట్ ఇచ్చి సినిమాకు సంబంధించిన విష‌యాల‌ను వెల్ల‌డిస్తారా అని అంద‌రూ ఆస‌క్తిగా ఎదురుచూస్తున్నారు.

అయితే ఈ సినిమా రెగ్యుల‌ర్ షూటింగ్ మొద‌లైనట్టు తెలుస్తోంది. హైద‌రాబాద్ గ‌చ్చిబౌలిలోని అల్యూమినియం ఫ్యాక్ట‌రీలో ఎస్ఎస్ఎంబీ29కు సంబంధించిన షూటింగ్ జ‌రుగుతున్న‌ట్టు స‌మాచారం. సినిమాకు సంబంధించిన విష‌యాలు ఎక్క‌డా లీక‌వ్వ‌కుండా ఉండ‌టానికి రాజ‌మౌళి అండ్ టీమ్ ఎన్నో జాగ్ర‌త్త‌లు తీసుకుంటున్న‌ట్టు స‌మాచారం.

ఈ నేప‌థ్యంలోనే సెట్స్ లోకి ఎవ‌రి ఫోన్ నూ అనుమ‌తించ‌కుండా చిత్ర యూనిట్ స‌భ్యులంద‌రికీ రాజ‌మౌళి కండిష‌న్ పెట్టాడ‌ట‌. ఆఖ‌రికి హీరో మ‌హేష్ బాబు కు కూడా రాజ‌మౌళి ఈ విష‌యంలో మిన‌హాయింపు ఇవ్వ‌లేదు. ఈ సినిమాకు ప‌ని చేస్తున్న అంద‌రితో రాజ‌మౌళి నాన్ డిస్‌క్లోజ్ అగ్రిమెంట్ చేసుకున్న‌ట్లు తెలుస్తోంది. ఎవ‌రైనా సినిమా నుంచి కంటెంట్ ను లీక్ చేస్తే దానికి వారు భారీ మూల్యాన్ని చెల్లించుకోవాల్సి వ‌స్తుంది.

ఇదిలా ఉంటే రీసెంట్ గా సింహంని జైల్లో బంధించి దాని పాస్‌పోర్టుని తీసుకున్న‌ట్టు ఉన్న త‌న ఫోటోని రాజ‌మౌళి త‌న ఇన్‌స్టాలో షేర్ చేసిన విష‌యం తెలిసిందే. ఇక్క‌డ మ‌హేష్ ను రాజ‌మౌళి సింహంతో పోల్చాడు. గ్యాప్ దొరికితే ఫ్యామిలీతో క‌లిసి విదేశాల‌కు వెళ్ల‌డం మ‌హేష్ కు అల‌వాటు. అలాంటి మ‌హేష్ ఇప్పుడు రాజ‌మౌళితో వ‌ర్క్ చేస్తున్నాడు.

మిగిలిన సినిమాలు వేరు. రాజ‌మౌళితో మ్యాట‌ర్ వేరు. రాజ‌మౌళి సినిమాల‌కు ప‌ని చేసేట‌ప్పుడు లైఫ్ ఇంత‌కు ముందున్న‌ట్టు ఉండ‌దు. బ‌య‌ట‌కు వెళ్లాల‌న్నా, ఫ్యామిలీ ఈవెంట్ కు వెళ్లాల‌న్నా స‌రే జ‌క్క‌న్న ప‌ర్మిష‌న్ ఇస్తేనే వెళ్లాలి. అలాంటి కండిష‌న్లు పెడ‌తాడు రాజ‌మౌళి. మొన్న మ‌హేష్ నుంచి పాస్ పోర్టును తీసుకున్న రాజ‌మౌళి, ఇప్పుడు ఫోన్ ను కూడా తీసేసుకున్నాడు. ముందుముందు సూప‌ర్‌స్టార్ కు జ‌క్క‌న్న ఇంకెన్ని కండిష‌న్లు పెడ‌తాడో మ‌రి.

ఆర్ఆర్ఆర్ సినిమాతో తెలుగు సినీ ప‌రిశ్ర‌మ‌ను ఆస్కార్ లెవెల్ కు తీసుకెళ్లిన రాజ‌మౌళి, ఈ సినిమాతో ఇంకెన్ని ఘ‌న‌త‌లు సాధిస్తాడో అని అంద‌రూ గ‌ర్వంగా ఎదురుచూస్తున్నారు. కెఎల్ నారాయ‌ణ భారీ బ‌డ్జెట్ తో నిర్మిస్తున్న ఈ సినిమాను ఫారెస్ట్ అడ్వెంచ‌ర్ గా రాజ‌మౌళి తెర‌కెక్కిస్తున్నాడు. ప్రియాంక చోప్రా కీల‌క పాత్ర‌లో న‌టించ‌నున్న ఎస్ఎస్ఎంబీ29కు ఆస్కార్ విజేత ఎం.ఎం కీర‌వాణి సంగీతం అందిస్తున్నాడు.