ఎస్ఎస్ఎంబి 29 పై కన్ఫ్యూజన్.. అసలు కారణం ఇదే..

మహేష్ బాబు, జక్కన్న కాంబోలో తెరకెక్కనున్న ఎస్ఎస్ఎంబి 29 మూవీ ఎప్పుడు ప్రారంభమవుతుంది అన్న విషయంపై ఇంతవరకు అధికారికంగా ఎటువంటి స్పష్టత లేదు. కానీ ఈ మూవీకి సంబంధించిన ఏదో ఒక వార్త సోషల్ మీడియాలో వైరల్ అవుతూనే ఉంది. ఇందులో చాలావరకు ఆ మూవీ టీం‌కి సంబంధం లేకుండా సెల్ఫ్ మేడ్ వార్తలు ఉండడం విశేషం. ఈ నేపథ్యంలో మూవీ కాస్టింగ్‌కి సంబంధించి గత కొద్ది కాలంగా ఎందరో సెలబ్రిటీల పేర్లు వినిపిస్తున్నాయి.

రాజమౌళి తీసే సినిమా అంటే కంప్లీట్ అవ్వడానికి సంవత్సరాలు పడుతుంది అన్న విషయం అందరికీ తెలిసిందే. అంతేకాదు జక్కన్న మూవీ ప్రారంభానికి సంబంధించిన అధికారిక ప్రకటన ఇవ్వడానికి కూడా ఎంతో ఆలోచిస్తారు. మూవీ హీరో దగ్గర నుంచి కాస్టింగ్ వరకు.. కాస్ట్యూమ్స్ దగ్గర నుంచి కంటెంట్ వరకు జక్కన్న ఆలోచన విధానం ఎంతో డిఫరెంట్‌గా ఉంటుంది. అందుకే ఆయన తీసే సినిమాలు చాలా టైం పట్టిన బ్లాక్ బస్టర్స్‌గా నిలుస్తూ వస్తున్నాయి.

ఇక తాజాగా మహేష్ బాబు నటించిన గుంటూరు కారం చిత్రం ప్రేక్షకులను చాలా నిరాశపరిచింది. దీంతో రాబోయే అతని నెక్స్ట్ మూవీ పై అభిమానులు ఎన్నో ఆశలు పెట్టుకొని ఉన్నారు. ఈ నేపథ్యంలో ఎస్ఎస్ఎంబి 29 కాస్టింగ్ వీరేనంటూ నెటింట ఎన్నో వార్తలు వస్తున్నాయి. ఈ మూవీలో విలన్ క్యారెక్టర్‌లో ప్రభాస్‌తో కలిసి సలార్ మూవీలో నటించిన పృథ్విరాజ్ సుకుమారన్ చేస్తున్నారు అన్న వార్త వైరల్ అయిన విషయం అందరికీ తెలిసిందే. ఇక ఆ తర్వాత తంగలాన్ ఈవెంట్‌లో విక్రమ్ మాట్లాడిన మాటలను బట్టి అతను కూడా ఈ సినిమాలో భాగమని అందరూ ఫిక్స్ అయిపోయారు.

నాగార్జున, మోహన్ లాల్, దీపికా పదుకునే ఆల్రెడీ ఆడ్ అయిన ఈ లిస్టులో హీరోయిన్‌గా చెస్లియా ఇస్లాన్‌ను ఫిక్స్ చేశారు. అక్కడితో ఆగకుండా హీరో హీరోయిన్లకు సంబంధించిన ఫ్యాన్ మేడ్ పోస్టర్లను కూడా తయారు చేసి సోషల్ మీడియాలో సందడి చేశారు. ఇప్పటికే మూవీకి సంబంధించి రాజమౌళి రెండు వర్క్ షాప్స్ నిర్వహించారు. కాబట్టి క్యాస్టింగ్ విషయంలో అతనికి పక్క అవగాహన ఉండే ఉంటుంది. అయితే అన్ని కన్ఫామ్ చేసుకున్నాక.. షూటింగ్ ప్రారంభం కాబోతోంది అన్న సమయంలో ఒక్కొక్కరిగా క్యారెక్టర్ల పేరు రాజమౌళి విడుదల చేస్తారు.

అయితే ఈలోపు ఉబ్బలాటం పట్టలేని చాలామంది ఇలాంటి గాసిప్స్‌తో అందరినీ కన్ఫ్యూజ్ చేస్తున్నారు. దీంతో చాలామంది సినిమాకు సంబంధించిన అధికారిక ప్రకటనలు విడుదల కాకుండా ఇలా అభిమానులను కన్ఫ్యూజ్ చేయడం భావ్యం కాదు అని భావిస్తున్నారు. ఏదో నాలుగు వ్యూస్ వస్తాయి అని.. ఓ పదిమంది లైకులు కొడతారని.. ఇలా చేసే వారి సంఖ్య రోజురోజుకు ఎక్కువైపోతోంది. దీంతో ఫిలింనగర్లో జరిగే విషయాలలో నిజం ఎంత.. కల్పన ఎంత అన్న విషయంపై చాలా గందరగోళం నెలకొంటుంది. ఇక మహేష్ బాబు సినిమా విషయానికి వస్తే ఈ చిత్రం 2028 ప్రాంతంలో విడుదల అయ్యే అవకాశం ఉంది. మహేష్ బాబు పుట్టినరోజు నాడు చిత్రానికి సంబంధించిన ఏదో ఒక అప్డేట్ వస్తుంది అని ఆశించారు.. కానీ ఇంకా అన్ని ప్రారంభ దశలో ఉండడంతో ఆరోజు చిత్ర బృందం ఎటువంటి అప్డేట్ ఇవ్వలేదు. త్వరలో ఈ మూవీ షూటింగ్ ప్రారంభం కాబోతోందని.. దీనికి సంబంధించిన అధికారిక ప్రకటనతో పాటు మరికొన్ని వివరాలు త్వరలో వెల్లడించే అవకాశం ఉందని టాక్.