'రాజా సాబ్' స్టోరీ.. ఇది మారుతి రియాక్షన్!

యంగ్ రెబల్ స్టార్ ప్రభాస్ హీరోగా మారుతి దర్శకత్వంలో తెరకెక్కుతున్న తాజా చిత్రం 'రాజా సాబ్'. గత కొంతకాలంగా షూటింగ్ జరుపుకుంటూ వస్తున్న ఈ చిత్ర టైటిల్ ఫస్ట్ లుక్ ని సంక్రాంతి కానుక గా విడుదల చేశారు. తాజాగా రిలీజ్ చేసిన ఫస్ట్ లుక్ లో ప్రభాస్ వింటేజ్ లుక్ తో ఆకట్టుకున్నారు. ఫస్ట్ లుక్ పోస్టర్ లో టీ షర్ట్, పూల లుంగీతో ప్రభాస్ చాలా కూల్గా, స్టైలిష్ గా కనిపించాడు. లాంగ్ హెయిర్తో ప్రభాస్ లుక్ ఫ్యాన్స్ ని విపరీతంగా ఆకట్టుకుంది.

ఇక టైటిల్ ఫస్ట్ లుక్ పోస్టర్ తప్పితే సినిమాకు సంబంధించి ఎలాంటి డీటెయిల్స్ వెల్లడించలేదు మేకర్స్. గత కొంతకాలంగా ఈ సినిమా హారర్ కామెడీ బ్యాక్ డ్రాప్ లో వస్తుందని వార్తలు వినిపించాయి. అయితే దానిపై ఇప్పటివరకు ఎలాంటి క్లారిటీ లేదు. ఇదిలా ఉంటే రాజా సాబ్ సినిమా కథ ఇదేనంటూ ప్రముఖ వెబ్సైట్ ఐఎండిబి ఓ స్టోరీ లైన్ ని పబ్లిష్ చేసింది. దానిపై డైరెక్టర్ మారుతి సరదాగా స్పందించారు.

ఐఎండిబి వెబ్సైట్ పబ్లిష్ చేసిన కథనం ప్రకారం.. సినిమా కథ ప్రేమలో పడిన ఓ జంట చుట్టూ రాజా సాబ్ కథ తిరుగుతుంది. హీరో, హీరోయిన్లు ప్రేమలో ఉన్నప్పటికీ నెగిటివ్ ఎనర్జీ కారణంగా వాళ్ల విధి రాతలు ఎలా మారాయి? అనేది సినిమా కథ అని ఐఎండిబి పబ్లిక్ చేయడంతో దీనిపై డైరెక్టర్ మారుతి ఫన్నీగా రియాక్ట్ అయ్యారు." అరెరే నాకు ఈ ఫ్లాట్ తెలియదు. అందుకని వేరే కథతో షూటింగ్ చేస్తున్నా. ఇప్పుడు ఐఎండిబి సమాజం దీన్ని యాక్సెప్ట్ చేస్తుందా? మరి" అంటూ తన ట్విట్టర్ వేదికగా ట్వీట్స్ చేశారు.

దీంతో మారుతి చేసిన ఈ ట్వీట్స్ ఇప్పుడు నెట్టింట వైరల్ గా మారాయి. ఇక ఈ సినిమాని తెలుగుతోపాటు హిందీ తమిళ మలయాళ కన్నడ భాషల్లో విడుదల చేస్తున్నారు. బాహుబలి తో దాండియా మార్కెట్లోకి అడుగు పెట్టిన ప్రభాస్ మారుతితో రీజినల్ సినిమానే చేస్తారని అందరూ అనుకున్నారు. కానీ ఇటీవల టైటిల్ ఫస్ట్ లుక్ పోస్టర్లో సినిమాని పాన్ ఇండియా స్థాయిలో రిలీజ్ చేస్తున్నట్లు అధికారికంగా తెలిపారు.

డైరెక్టర్ మారుతికి ఇది ఫస్ట్ పాన్ ఇండియా మూవీ కావడం విశేషం. ఓ డిఫరెంట్ కాన్సెప్ట్ తో ప్రభాస్ ఫ్యాన్స్ తమ హీరోని ఎలా అయితే చూడాలనుకుంటున్నారో ఆ విధంగా ప్రభాస్ ని ఈ సినిమాలో చూపించబోతున్నాడు మారుతి. మాళవిక మోహన్, నిధి అగర్వాల్, రిద్ది కుమార్ హీరోయిన్స్ గా నటిస్తున్న ఈ చిత్రానికి తమన్ సంగీతం అందిస్తున్నారు.