యంగ్ హీరోల‌కు దీటుగా 60 ఏళ్ల హీరో!

సూప‌ర్ స్టార్ ర‌జ‌నీకాంత్ యంగ్ హీరోల‌కు ధీటుగా ప‌నిచేస్తున్నారు. ఓవైపు ఒప్పుకున్న సినిమాలు పూర్తి చేస్తూనే కొత్త ప్రాజెక్ట్ లు లైన్ లోపెడుతున్నారు. ప్రస్తుతం 'జైభీమ్' ద‌ర్శ‌కుడు జ్ఞాన్ వేల్ తో 'వెట్టేయాన్' సినిమా చేస్తోన్న సంగ‌తి తెలిసిందే. కొన్ని నెల‌లుగా ఈ సినిమా షూట్లో నే బిజీగా ఉన్నారు. చిత్రీక‌ర‌ణ ప్రారంభ‌మైన ద‌గ్గ‌ర నుంచి ఇంత‌వ‌ర‌కూ ఎక్క‌డా విరామం లేకుండా ప‌నిచేసారు. తాజాగా ఈ సినిమా షూటింగ్ లో భాగంగా ర‌జ‌నీకాంత్ త‌న వెర్ష‌న్ షూట్ పూర్తి చేసారు.

ఈ విష‌యాన్ని నిర్మాణ సంస్థ లైకా ప్రొడ‌క్ష‌న్స్ రివీల్ చేసింది. అన్ని ప‌నులు పూర్తి చేసి ఇదే ఏడాది అక్టోబ‌ర్ లోనే చిత్రాన్ని రిలీజ్ చేయాల‌ని ప్లాన్ చేస్తున్నారు. ఈ నేప‌థ్యంలో ర‌జ‌నీకాంత్ కొత్త సినిమా ప‌నుల్లో బిజీ అయ్యే ప్ర‌య‌త్నాలు అప్పుడే మొద‌లు పెట్టిన‌ట్లు తెలుస్తోంది. లోకేష్ క‌న‌గరాజ్ ద‌ర్శ‌క‌త్వంలో ఇప్ప‌టికే 'కూలీ' అనే చిత్రం ప్ర‌క‌టించిన సంగ‌తి తెలిసిందే. స్క్రిప్ట్ స‌హా అన్ని ప‌నులుపూర్తి చేసుకుని లోకేష్ వెయిట్ చేస్తున్నారు. తాజాగా ర‌జ‌నీ ఫ్రీ అవ్వ‌డంతో ఆ సినిమా ప‌ట్టాలెక్కించ‌నున్నార‌ని తెలుస్తోంది.

ఈ సినిమా ఎప్పుడైనా రెగ్యుల‌ర్ షూట్ కి వెళ్లే అవ‌కాశం ఉంది. లోకేష్ కూడా షూటింగ్ కి పెద్ద‌గా స‌మ‌యం తీసుకోడు. చాలా వేగంగా చిత్రీక‌ర‌ణ పూర్తి చేయ‌గ‌ల ద‌ర్శ‌కుడు. ఆయ‌న గ‌త సినిమా లియో అలా పూర్తి చేసి చెప్పిన తేదీకే ప్రేక్ష‌కుల ముందుకు తీసుకొచ్చారు. ర‌జ‌నీ సినిమా కూడా అలాగే పూర్తి చేసే అవ‌కాశం ఉంది. 60 ఏళ్ల వ‌య‌సులోనూ ర‌జనీ వేగం ఏమాత్రం త‌గ్గ‌లేదు. ఒక సినిమా సెట్ లో ఉండ‌గానే మ‌రో సినిమా లైన్ లో పెట్టి సెట్స్ కి వెళ్లిపోతారు.

సాధార‌ణంగా హీరోలు కొన్నినెల‌లు పాటైన విశ్రాంతి తీసుకుంటారు. కానీ సూప‌ర్ స్టార్ మాత్రం ఆ టైపు కాదు. త‌న పోర్ష‌న్ పూర్త‌యితే నెక్స్ట్ ఏంటి? అని ముందే ఆలోచించి ఆచ‌ర‌ణ‌లో పెడ‌తారు. ఇంకా ర‌జ‌నీకాంత్ తో సినిమాలు చేయ‌డానికి చాలా మంది ద‌ర్శ‌కులు క్యూలో ఉన్నారు. వాళ్ల‌లో కొంద‌రు క‌థ‌ల్ని కూడా ఒకే చేసారు.