మాల్వీని అందరూ ఆదరించండి - రాజ్ తరుణ్

రాజ్ తరుణ్, మాల్వీ మల్హోత్రా జంటగా నటించిన తిరగబడర సామి మూవీ ఆగష్టు 2న ప్రేక్షకుల ముందుకొస్తోంది. ఏఎస్ రవికుమార్ చౌదరి దర్శకత్వంలో తెరకెక్కిన ఈ చిత్రాన్ని మల్కాపురం శివకుమార్ నిర్మించారు. ఈ సినిమా ప్రీరిలీజ్ ప్రెస్ మీట్ తాజాగా జరిగింది. ఇందులో రాజ్ తరుణ్ పాల్గొన్నారు. ఈ సందర్భంగా రాజ్ తరుణ్ ని లావణ్యతో ఉన్న వివాదంపై మీడియా ప్రతినిధులు ప్రశ్నించారు.

వాటన్నింటికి రాజ్ తరుణ్ ఓపిగ్గా సమాధానాలు ఇచ్చారు. ఆ వివాదంపై తాను ఎక్కువ మాట్లాడదలుచుకోలేదని తెలిపారు. కోర్టు ద్వారా చట్టపరంగా ఆమెతో జరుగుతున్న గొడవని తేల్చుకుంటానని రాజ్ తరుణ్ చెప్పారు. తన దగ్గర ఉన్న సాక్ష్యాలు అన్ని కోర్టుకి అందిస్తానని అన్నారు. ఇదిలా ఉంటే లావణ్య ఆరోపణలు చేస్తోన్న హీరోయిన్ మాల్వీ మల్హోత్రా కూడా ఈ ప్రీరిలీజ్ ప్రెస్ మీట్ లో పాల్గొంది. అయితే మీడియా ప్రతినిధులు ఆమెని వివాదంపై ఎక్కువగా ప్రశ్నించే ప్రయత్నం చేయలేదు.

రాజ్ తరుణ్ మీడియా మీట్ లో మాట్లాడుతూ వివాదాలని పక్కన పెట్టి మాల్వీ మల్హోత్రాని ఆదరించాలని కోరారు. మాల్వీ మల్హోత్రా మంచి టాలెంటెడ్ యాక్టర్. ఆమెకిదే మొదటి తెలుగు సినిమా. వివాదాల్లోకి ఆమెని లాగకుండా అందరూ ఆశీర్వదించాలని రాజ్ తరుణ్ అభ్యర్ధించారు. అలాగే ఈ మూవీ కథ విన్న వెంటనే ఒకే చెప్పేశాను. దర్శకుడు రవికుమార్ చౌదరి గారు చాల కష్టపడి ఈ చిత్రాన్ని తెరకెక్కించారు. ప్రతి ఒక్కరికి ఈ మూవీ కనెక్ట్ అవుతుందని చెప్పారు.

మాల్వీ మల్హోత్రా మాట్లాడుతూ తెలుగులో ఎంట్రీ ఇస్తున్నందుకు చాలా సంతోషంగా ఉందని, మరిన్ని తెలుగు సినిమాలు చేయాలని అనుకుంటున్నట్లు తెలిపింది. భార్యాభర్తల అనుబంధం గురించి ఈ మూవీ కథ ఉంటుందని నిర్మాత మల్కాపురం శివకుమార్ తెలిపారు. ఇప్పటికే తిరగబడర సామి మూవీ ట్రైలర్ ప్రేక్షకుల ముందుకొచ్చింది. కొంత పాజిటివ్ టాక్ తెచ్చుకుంది. అయితే రాజ్ తరుణ్ వివాదం కారణంగా సినిమాపై పెద్దగా బజ్ క్రియేట్ కాలేదు.

పురుషోత్తముడు మూవీ అయితే పెద్దగా ప్రేక్షకాదరణ సొంతం చేసుకోలేదు. పర్వాలేదనే టాక్ తెచ్చుకున్న కమర్షియల్ గా మాత్రం వర్క్ అవుట్ కాలేదు. అయితే తిరగబడర సామి సినిమాపై మాత్రం రాజ్ తరుణ్ చాలా హోప్స్ పెట్టుకున్నట్లు తెలుస్తోంది. ఏ ఎస్ రవికుమార్ చౌదరి కూడా చాలా గ్యాప్ తర్వాత ఈ సినిమా చేస్తున్నారు. ఆగష్టు 2న రిలీజ్ కాబోతున్న ఈ మూవీ వారికి ఎలాంటి సక్సెస్ ఇస్తుందనేది చూడాలి.