'రాజు వెడ్స్ రాంబాయి' ఫస్ట్ గ్లింప్స్: వేణు ఊడుగుల ఎమోషనల్ లవ్ స్టోరీ!

నీది నాది ఒకే కథ' సినిమాతో డైరెక్టర్ గా పరిచయమయ్యారు వేణు ఊడుగుల. వైవిధ్యమైన కంటెంట్ తో తొలి చిత్రంతోనే ఇండస్ట్రీ మొత్తం తనవైపు చూసేలా చేసుకున్నారు. ఆ తర్వాత 'విరాట పర్వం' మూవీతో విమర్శకుల ప్రశంసలు అందుకున్నారు. రెండు చిత్రాలతోనే తనకంటూ ప్రత్యేకమైన గుర్తింపు తెచ్చుకున్న వేణు.. స్లో అండ్ స్టడీగానే సినిమాలు చేస్తున్నారు. అయితే ఇప్పుడు న్యూ టాలెంట్ ను ఎంకరేజ్ చేయడానికి ఆయన నిర్మాతగా మారుతున్నారు. తన బ్యానర్ ద్వారా యంగ్ ఫిలిం మేకర్స్ కు సపోర్ట్ ఇవ్వాలని నిర్ణయించుకున్నారు.

వేణు ఊడుగుల నిర్మాణంలో తొలి ప్రయత్నంగా ''రాజు వెడ్స్ రాంబాయి'' అనే చిత్రాన్ని నిర్మిస్తున్నారు. ఇది వాస్తవ కథతో రూపొందుతున్న రూరల్ మాస్ అండ్ ఎమోషనల్ లవ్ స్టోరీ అని తెలుస్తోంది. సాయిలు కంపాటి ఈ చిత్రంతో దర్శకుడిగా ఇండస్ట్రీకి పరిచయం అవుతున్నాడు. ఈ మూవీని అధికారికంగా ప్రకటించిన మేకర్స్.. తాజాగా ఫస్ట్ గ్లింప్స్ ను సోషల్ మీడియాలో పంచుకున్నారు. “రాజు వెడ్స్ రాంబాయి” - వీళ్ళ ప్రేమ ఒక తీన్మార్.. ఒక దోమార్.. ఒక నాగిని.. త్వరలో మీ అభిమాన థియేటర్స్ లోకి రాబోతోంది అని వేణు ఊడుగుల 'ఎక్స్' లో పోస్ట్ పెట్టారు.

''నా పేరు యెనగంటి రాంబాయి.. మా నాన్న పేరు యెనుగంటి వెంకన్న. మాది ఖమ్మం, వరంగల్ సరిహద్దుల్లో ఉండే ఒక ఊరు. నేను మా ఊళ్లోనే ఒక అబ్బాయిని ప్రేమించిన. వాని పేరు రాజు. నిజానికి ఒక అమ్మాయి ప్రేమించాల్సిన అర్హతల్లో ఏ ఒకటి కూడా వాడి కాడ లేదు. కానీ వాడు బ్యాండ్ కొట్టే స్టైల్ కి నేను పడిపోయినా. మీకో విషయం చెప్పనా.. బొగ్గుతోని మా ఇల్లందు మండలానికి ఎంత పేరొచ్చిందో, అట్లనే మా ప్రేమతో మా ఊరికి అంత పేరొచ్చింది. రాజు మాటల్లో చెప్పాలంటే.. మా ప్రేమ ఒక తీన్మార్, మా ప్రేమ దో మార్, మా ప్రేమ ఒక నాగిని. ఇట్లాంటి మా ప్రేమకథని సాయిలు కంపటి సార్ సినిమాగా తీస్తుండు. మా సినిమాని మీరందరూ ఆదరిస్తారని కోరుకుంటూ'' అంటూ ''రాజు వెడ్స్ రాంబాయి'' బ్యాక్ డ్రాప్ ని వివరించారు.

తెలంగాణ పల్లెటూరి నేపథ్యంలో యెనగంటి రాంబాయి అనే బోల్డ్ అమ్మాయి తన పాత్రని తాను ఈ ఎంటర్టైనింగ్ గ్లింప్స్ ద్వారా పరిచయం చేసుకుంటోంది. ఆమె అదే ఊర్లోని రాజు అనే ఒక మాస్ డ్రమ్మర్‌తో ప్రేమలో పడినట్లు చెప్పింది. గ్రామీణ సెటప్‌లో అలాంటి బోల్డ్ క్యారెక్టర్స్ మధ్య ప్రేమ కథను ఈ సినిమాలో ఆసక్తికరంగా చూపించబోతున్నట్లు తెలుస్తోంది. ప్రేమకథని తీన్మార్, దో మార్, నాగిని అంటూ డ్యాన్స్ బీట్స్ తో కంపేర్ చేసి చెప్పడం బాగుంది. విజువల్స్, బ్యాగ్రౌండ్ మ్యూజిక్ విలేజ్ సెటప్ కు తగ్గట్టుగా ఆకట్టుకునేలా ఉన్నాయి. హీరో హీరోయిన్లు ఎవరనేది రివీల్ చెయ్యలేదు కానీ, ఫస్ట్ గ్లింప్స్ మాత్రం ఈ సినిమాపై క్యూరియాసిటీ పెంచుతోంది. వేణు ఊడుగుల ఈసారి ఒక మంచి ఎమోషనల్ ఇంట్రెస్టింగ్ లవ్ స్టోరీతో వస్తున్నట్లు అర్థమవుతోంది.

డోలాముఖి సబాల్టర్న్ ఫిల్మ్స్ బ్యానర్ లో రూపొందుతున్న ''రాజు వెడ్స్ రాంబాయి'' చిత్రానికి రాహుల్ మోపిదేవి సహ నిర్మాతగా వ్యవహరిస్తున్నారు. సురేష్ బొబ్బిలి సంగీతం సమకూర్చగా.. మిట్టపల్లి సురేందర్ లిరిక్స్ అందించారు. గాంధీ నడికుడికార్ ప్రొడక్షన్ డిజైనర్ గా, వాజిద్ బైగ్ సినిమాటోగ్రాఫర్ గా, నరేష్ అడుప ఎడిటర్ గా వర్క్ చేస్తున్నారు. వాలెంటైన్స్ డే స్పెషల్ గా ఈ సినిమాని 2025 ఫిబ్రవరి 14న థియేటర్లలో విడుదల చేయనున్నట్లు వేణు ఊడుగుల ప్రకటించారు. రాబోయే రోజుల్లో ఈ మూవీ నుంచి మరిన్ని అప్డేట్లు రిలీజ్ చేస్తారు.