ఒక్క ఛాన్స్ కోసం ముంబైలో ఒంట‌రి పోరాటం

కలలు కనడం సుల‌భం. కానీ వాటిని సాధించుకోవ‌డ‌మే అంత సులభం కాదు! అని అంటోంది ర‌కుల్ ప్రీత్ సింగ్. తక్కువ స‌మ‌యంలో క‌ల‌ల్ని ఛేధించాల‌ని అనుకుంటే, అది జ‌ర‌గ‌ద‌ని కూడా రకుల్ ప్రీత్ వ్యాఖ్యానించింది. తాను నటిగా మారడానికి ముందు ప్రయాణాన్ని తాజాగా షేర్ చేసింది.

ర‌కుల్ ప్రీత్ సింగ్ నేడు భార‌త‌దేశంలోని టాప్ హీరోయిన్ల‌లో ఒక‌రు. సౌత్ లో అగ్ర క‌థానాయ‌కుల స‌ర‌స‌న అవ‌కాశాలు అందుకున్న ఈ బ్యూటీ ఇటీవ‌ల‌ బాలీవుడ్ లో వ‌రుస చిత్రాల్లో న‌టిస్తోంది. త్వ‌ర‌లోనే హిందీ చిత్ర‌సీమ‌కు చెందిన యువ‌న‌టుడు కం అగ్ర‌నిర్మాత‌ను పెళ్లాడుతోంది. ఆస‌క్తిక‌రంగా ఇప్పుడు న‌టి కాక ముందు ప్ర‌యాణంపై లోతైన విష‌యాలు చెప్పాలంటూ ఏక్తా కపూర్ ప్రారంభించిన ఒక‌ స‌వాల్ ని స్వీక‌రించింది. భూమి పెడ్నేకర్ దీనికి తొలిగా స్పందించ‌గా, ఈ స‌వాల్ కు ప్ర‌తిస్పందనగా ప్రతిభావంతులైన న‌టీమ‌ణులు స్పందిస్తున్నారు. పంజాబీ బ్యూటీ ర‌కుల్ ప్రీత్ ఆస‌క్తిక‌ర‌మైన ప్రయాణాన్ని సోషల్ మీడియాలో షేర్ చేసింది. గ్లామ‌ర్ ప్ర‌పంచంలో న‌టీమ‌ణుల‌ జీవిత మార్గాలను ప్రతిబింబించేలా ఈ సవాల్ వివిధ ప్లాట్‌ఫారమ్‌లలో అంద‌రి దృష్టిని ఆకర్షిస్తోంది.

రకుల్ ప్రీత్ .. పెద్ద స్క్రీన్‌ను అలంకరించాలనే కలలుగ‌నే ఒక సాధార‌ణ మోడ‌ల్ స్థాయి నుండి సినీ పరిశ్రమలో ప్రస్తుత స్థితి వరకు అద్భుతమైన ప్రయాణం గురించి వెల్ల‌డించింది. వినోద ప్రపంచంలోని ఇన్‌లు -అవుట్‌ల గురించి ఎటువంటి ముందస్తు జ్ఞానం లేకుండా ఈ అద్భుతమైన ప్రయాణాన్ని ప్రారంభించాన‌ని తెలిపింది. నేను పెద్ద తెరపైకి రావాలని కలలు కనే చిన్న అమ్మాయిని అని అంది. ర‌కుల్ మాట్లాడుతూ- ''ఇండస్ట్రీ గురించి ఎలాంటి అవగాహన లేకుండా మోడలింగ్ నుండి మిస్ ఇండియా పోటీల వ‌ర‌కూ.. అట్నుంచి సినిమాల వరకు ఆశతో ఈ ప్రయాణాన్ని ప్రారంభించాను. అంగీకారం తిరస్కరణలు ఎదుర‌య్యాయి.

ముంబైకి వెళ్లి యుక్తవయసులో నేను ఒంటరిగా జీవించడం చాలా కష్టమైన పని. కానీ ప్రతిదీ ఒక అందమైన అభ్యాస అనుభవం. నాతో ఉన్న‌ది నా ఆత్మవిశ్వాసం. నేను ఎల్లప్పుడూ అదనంగా కష్టపడి పని చేస్తానని, పనిలో నిజాయితీని పాటిస్తాన‌ని నాకు తెలుసు. కానీ క‌ల‌ల్ని సాధించుకోవ‌డం అంత సులభం కాదు. షార్ట్ క‌ట్ లో ఇది సాధ్య‌ప‌డ‌దు. ప్రతి చిన్న విజయాన్ని సెల‌బ్రేట్ చేసుకోవ‌డం.. మీ పెద్ద లక్ష్యం కోసం కృషి చేయడం .. అనుకున్న‌ది సాధించుకోవ‌డ‌మే దారిగా ప్ర‌యాణించాలి. నేను వెళ్లిన మార్గంలో నా కుటుంబం నుంచి అపార‌మైన ప్రేమ‌తోనే ఇది సాధ్య‌మైంది..'' అని తెలిపింది. రకుల్ ప్రీత్ స్ఫూర్తిదాయకమైన ప్రయాణం సంకల్ప శక్తి, ఆత్మవిశ్వాసం, రాజీ అన్న‌దే లేని కృషికి నిదర్శనం. ఈ పోస్ట్ కలలను సాధించాలని కోరుకునే వారందరికీ ప్రేరణ.

కెరీర్ మ్యాట‌ర్ కి వ‌స్తే.. త‌దుప‌రి క‌మ‌ల్ హాస‌న్ తో క‌లిసి 'ఇండియన్ 2'లో కనిపించనుంది. ఇది పాన్ ఇండియా కేట‌గిరీలో విడుద‌ల కానుంది. ఎస్. శంకర్ దర్శకత్వం వహిస్తున్నారు. 1996లో వచ్చిన ఇండియన్ చిత్రానికి ఇది సీక్వెల్. ఇదే గాక ఇంకా ప్రకటించని ప‌లు ప్రాజెక్ట్‌లలో కూడా కనిపిస్తుంది.