ఇంద్రతో గేమ్ చేంజర్‌కు లింక్.. 20 కోట్లతో ఒక ఎపిసోడ్
'గేమ్ చేంజర్' మూవీలో రామ్ చరణ్ ఇంట్రడక్షన్ సీన్ హెలీకాప్టర్‌లో ప్లాన్ చేయడంతో దీనికి రూ. 20 కోట్లకు పైగా ఖర్చు అయినట్లు కూడా సమాచారం బయటకు వచ్చింది.
By: Tupaki Desk | 2 Nov 2024 12:39 PM GMT
పేరుకు టాలీవుడ్‌కు చెందిన హీరోనే అయినా అంతర్జాతీయ స్థాయిలో గుర్తింపును సొంతం చేసుకున్నాడు మెగా పవర్ స్టార్ రామ్ చరణ్. ఈ మధ్యన వరుసగా హిట్లను అందుకుంటోన్న అతడు.. RRR మూవీ వల్ల గ్లోబల్ స్టార్ అయిపోయాడు. దీంతో ఫ్యూచర్ ప్రాజెక్టులను ఒక్కొక్కటిగా లైన్‌లో పెడుతూ జెట్ స్పీడుతో దూసుకెళ్తున్నాడు. ఇలా ఇప్పుడు రామ్ చరణ్ 'గేమ్ చేంజర్' అనే సినిమాను చేస్తున్నాడు.
మెగా పవర్ స్టార్ రామ్ చరణ్ ప్రస్తుతం దిగ్గజ దర్శకుడు ఎస్ శంకర్‌‌తో 'గేమ్ చేంజర్' అనే సినిమాను చేస్తున్న సంగతి విధితమే. దీనికి సంబంధించిన షూటింగ్ ఎప్పుడో మొదలైనా మధ్యలో కొన్ని అనుకోని బ్రేకులు వచ్చాయి. ఇలా ఇన్ని రోజుల వ్యవధిలో టాకీ పార్టును తక్కువగానే కంప్లీట్ చేసుకున్నారు. అయితే, ఇటీవలే ఈ చిత్రం నుంచి రామ్ చరణ్ పార్టును పూర్తి చేసుకోగలిగారు.
సెన్సేషనల్ కాంబినేషన్‌లో అత్యంత భారీ బడ్జెట్‌తో రాబోతున్న 'గేమ్ చేంజర్' మూవీకి సంబంధించిన అంశాలు ఒక్కొక్కటిగా బయటకు వస్తూనే ఉన్నాయి. ముఖ్యంగా ఇందులో రామ్ చరణ్ చీఫ్ ఎలెక్షన్ ఆఫీసర్‌గా నటిస్తున్నట్లు సమాచారం లీకైంది. అందుకు అనుగుణంగానే ఈ మూవీలో అతడి ఎంట్రీ సీన్ కూడా అద్భుతంగా డిజైన్ చేసినట్లు తాజాగా మరో న్యూస్ చక్కర్లు కొడుతోంది.
ఫిలిం సర్కిళ్లలో వైరల్ అవుతోన్న న్యూస్ ఆధారంగా.. 'గేమ్ చేంజర్' సినిమాలో విలన్ గ్యాంగ్, ట్రైన్‌లో వెళ్తున్న రామ్ చరణ్‌ను హెలీకాప్టర్‌లో వెంబడిస్తుందట. అది తెలుసుకున్న అతడు రైలు పైన ఎక్కి వాళ్లతో ఫైటింగ్ చేస్తాడని తెలిసింది. అంతేకాదు, వాళ్లందరినీ అంతం చేసేసి మరీ అదే హెలీకాప్టర్‌ను తీసుకుని వెళ్లిపోతాడట. అలా అతడు రాయల్ లుక్‌తో హైదరాబాద్‌లోని ఓల్డ్ సిటీకి చేరుకుంటాడని సమాచారం.
'గేమ్ చేంజర్' మూవీలో రామ్ చరణ్ ఇంట్రడక్షన్ సీన్ హెలీకాప్టర్‌లో ప్లాన్ చేయడంతో దీనికి రూ. 20 కోట్లకు పైగా ఖర్చు అయినట్లు కూడా సమాచారం బయటకు వచ్చింది. దీంతో ఈ సన్నివేశంపై అందరిలోనూ అంచనాలు ఏర్పడ్డాయి. ఇక, ఇది తెలిసిన వాళ్లంతా 'ఇంద్ర'లో చిరంజీవి హెలీకాప్టర్ సీన్‌ను గుర్తు చేసుకుంటున్నారు. అంతేకాదు, ఈ రెండింటికీ లింక్ పెడుతూ 'గేమ్ చేంజర్' కూడా హిట్ అవుతుందని ఆశాభావం వ్యక్తం చేస్తున్నారు.
ఇక, 'గేమ్ చేంజర్' మూవీలో కియారా అద్వాణీ హీరోయిన్‌గా నటిస్తోంది. ఈ చిత్రాన్ని శ్రీ వెంకటేశ్వర క్రియేషన్స్ బ్యానర్‌పై దిల్ రాజు నిర్మిస్తున్నారు. దీనికి థమన్ సంగీతం ఇస్తున్నాడు. ఈ భారీ బడ్జెట్ సినిమాలో శ్రీకాంత్, జయరాం, అంజలి, రాజీవ్ కనకాల తదితరులు కీలక పాత్రల్లో నటిస్తున్నారు.
