ఇంతకీ ఆర్జీవీ చెప్పిన ఆ తెలుగు 'బిగ్ స్టార్' ఎవరబ్బా?

ఇటీవల కాలంలో సినిమాలు తీయడం తగ్గించిన సెన్సేషనల్ డైరెక్టర్ రామ్ గోపాల్ వర్మ.. సోషల్ మీడియాలో చాలా యాక్టివ్ గా ఉంటున్నారు. ఎప్పటిగానే తన అభిప్రాయాలను ఇంటర్వ్యూల రూపంలో పంచుకుంటూ వస్తున్నారు. ఇందులో భాగంగా లేటెస్టుగా భరద్వాజ్ రంగన్‌కు ఇచ్చిన ఓ ఇంటర్వ్యూలో భారీ బడ్జెట్ చిత్రాలపై తన ఒపీనియన్ ను షేర్ చేశారు. ఈ క్రమంలో ఓ టాలీవుడ్ స్టార్ హీరో థియేటర్లలో తన సినిమాని ఆడించడానికి సొంతంగా డబ్బు ఖర్చు చేయాల్సి వచ్చిందనే విషయాన్ని వివరించారు.

స్టార్ హీరోలతో భారీ బడ్జెట్ సినిమాలు, ఫిల్మ్ మేకింగ్, హిందీ రామాయణం, భారతీయ చలనచిత్ర పరిశ్రమకు సంబంధించిన వివిధ అంశాలపై రామ్ గోపాల్ వర్మ సుదీర్ఘంగా మాట్లాడారు. ఈ సందర్భంలో ఓ హీరో తన అభిమానులు అవమానంగా భావించకూడదని తన సినిమాను థియేటర్లలో ఎక్కువ నడిపించాల్సి వచ్చిందని తెలిపారు. “బాంబేకి చెందిన ఓ కార్పోరేట్ కంపెనీ తెలుగులోని ఒక బిగ్ స్టార్‌ తో సినిమా తీశారు. ఒకానొక సమయంలో వసూళ్లు తగ్గిపోవడంతో ఆ సినిమాని థియేటర్లలో నుంచి తీసేయాలని ఆ కంపెనీ భావించింది. కానీ ఇంకొన్ని రోజులైనా థియేటర్లలో సినిమా ఆడకపోతే స్టార్ హీరో ఫ్యాన్స్ ఇన్సల్ట్ గా భావిస్తారు. అందుకే ఆ హీరో కార్పోరేట్ కంపెనీ అధినేతకు ఫోన్ చేసి తన డబ్బు ఇస్తాను, ఫలానా రోజు వరకూ మూవీని థియేటర్లలో నడిపించమని చెప్పాడు" అని ఆర్జీవీ వెల్లడించారు.

"కార్పోరేట్ కంపెనీ వాళ్ళు పోగొట్టుకుంటున్న అమౌంట్ ను ఈ హీరో చెల్లిస్తాడు కాబట్టి దానికి ఓకే అని చెప్పారు. కానీ ఎక్కడో ఇది డిస్ట్రిబ్యూటర్స్ కు సరిగా కమ్యూనికేట్ చేయబడలేదు. దీంతో అప్పటికే డెఫిషిట్ లో ఉన్న పంపిణీదారులు, అదనంగా ఖర్చు అవుతుందని ఫలానా ధియేటర్లలో ఈ సినిమా ఆడుతుందని న్యూస్ పేపర్ లో ప్రకటనలు ఇవ్వడం మానేశారు. నిజానికి సినిమా రన్ అవుతోంది కానీ, యాడ్స్ మాత్రం లేవు. దానికి చాలా తక్కువ డబ్బులే ఖర్చు అవుతాయి. కానీ కార్పొరేట్ పాలసీలు అలానే ఉంటాయి. ఇలాంటి విషయాలు హీరోలను పూర్తిగా ఆపివేస్తాయి’’ అని రామ్ గోపాల్ వర్మ చెప్పుకొచ్చారు.

ఇప్పుడు ఆర్జీవీ వ్యాఖ్యలు సోషల్ మీడియాలో వైరల్ అవుతున్నాయి. ఎప్పటిలాగే స్టార్ హీరోల అభిమానులు ఫ్యాన్ వార్స్ స్టార్ట్ చేసారు. మీ హీరోని ఉద్దేశించే దర్శకుడు ఇలా చెప్తున్నారని ఓ కొందరు అంటే, కాదు మీ హీరోనే ఈ విధంగా చేస్తాడని మరికొందరు కామెంట్లు చేస్తున్నారు. ఇక్కడ రామ్ గోపాల్ వర్మ ఆ పెద్ద హీరో పేరు చెప్పకుండా ఉదాహరణగా ప్రస్తావించినప్పటికీ.. దాన్ని పలువురు టాలీవుడ్ స్టార్ హీరోలకు అన్వయిస్తూ యాంటీ ఫ్యాన్స్ ట్రోల్ చేస్తున్నారు. దీంతో డిజాస్టర్‌గా నిలిచిన చిత్రాన్ని డబ్బులిచ్చి థియేటర్లలో నడిపించే ఆ తెలుగు బిగ్ స్టార్ ఎవరంటూ నెటిజన్లు ఆరాలు తీసుకున్నారు.