ఇస్మార్ట్ శంకర్ క్యారెక్టర్.. హీరో హెచ్చరిక

డాషింగ్ డైరెక్టర్ పూరి జగన్నాథ్ సినిమాలకి నార్త్ ఇండియాలో కూడా మంచి ఫ్యాన్ బేస్ ఉంది. గతంలో అమితాబ్ బచ్చన్ తో హిందీలో బుడ్డా హోగా తెర బాప్ అనే సినిమాని పూరి జగన్నాథ్ డైరెక్ట్ చేశాడు. అప్పటి నుంచి పూరి మేకింగ్, ప్రెజెంటేషన్ కి నార్త్ ఇండియన్స్ ఫ్యాన్స్ అయిపోయారు. అందుకే లైగర్ సినిమాని హిందీలో రిలీజ్ చేస్తున్నప్పుడు భారీ హైపర్ క్రియేట్ అయ్యింది. అయితే ఆ సినిమాకి వచ్చిన క్రేజ్ ని మూవీ క్యాష్ చేసుకోలేకపోయింది.

కంటెంట్ ఫెయిల్యూర్ కారణంగా లైగర్ డిజాస్టర్ అయ్యింది. ఈ సారి మాత్రం బాలీవుడ్ లో కూడా సత్తా చాటాలని పూరి జగన్నాథ్ చాలా కసిగా ఉన్నారు. రామ్ పోతినేని హీరోగా తెరకెక్కించిన డబుల్ ఇస్మార్ట్ చిత్రాన్ని పాన్ ఇండియా రేంజ్ లో రిలీజ్ చేస్తున్నారు. బాలీవుడ్ స్టార్ సంజయ్ దత్ ఈ చిత్రంలో ప్రతినాయకుడిగా నటించడం వలన నార్త్ లో కూడా మూవీపై హైప్ క్రియేట్ అయ్యింది.

ఇదిలా ఉంటే ఆగష్టు 15న ఈ మూవీ వరల్డ్ వైడ్ గా రిలీజ్ కాబోతోంది. కచ్చితంగా మూవీ బ్లాక్ బస్టర్ హిట్ అవుతుందనే కాన్ఫిడెన్స్ తో చిత్ర యూనిట్ ఉంది. తాజాగా ముంబైలో ఈ మూవీ ప్రమోషన్స్ ని స్టార్ట్ చేశారు. ఈ సందర్భంగా ఏర్పాటు చేసిన ఈవెంట్ లో పూరి జగన్నాథ్ మాట్లాడుతూ సంజయ్ దత్ తో కలిసి వర్క్ చేయడం హ్యాపీగా ఉందని తెలిపారు. కచ్చితంగా ఈ మూవీ ఇస్మార్ట్ శంకర్ కంటే బెస్ట్ కథతో ఉంటుందని హామీ ఇచ్చాడు.

సంజయ్ దత్ మాట్లాడుతూ పూరి జగన్నాథ్, రామ్ తో కలిసి చేసిన డబుల్ ఇస్మార్ట్ మూవీ షూటింగ్ కూల్ అండ్ ఎనర్జిటిక్ గా జరిగిందని అన్నారు. పూరి జగన్నాథ్ క్రియేటివ్ విజన్ ని సంజయ్ దత్ ప్రశంసించారు. అనంతరం రామ్ మాట్లాడుతూ డబుల్ ఇస్మార్ట్ మూవీ స్టోరీ మొత్తం ముంబై బ్యాక్ డ్రాప్ లో ఉంటుందని తెలిపాడు. ఈ సినిమాలో బిగ్ బుల్ క్యారెక్టర్ కి సంజయ్ దత్ పెర్ఫెక్ట్ ఛాయస్ అని అన్నారు. అలాగే ఇందులో నేను చేసిన ఇస్మార్ట్ శంకర్ క్యారెక్టర్ మెంటల్ మ్యాడ్ నెస్ గా ఉంటుందని చెప్పాడు.

అయితే ఈ క్యారెక్టర్ ని రియల్ లైఫ్ లో నేను ఎంకరేజ్ చేయనని, ఎవ్వరు కూడా ఇస్మార్ట్ శంకర్ పాత్రని స్ఫూర్తిగా తీసుకొని బయట అలా బిహేవ్ చేసే ప్రయత్నం చేయొద్దని రామ్ పోతినేని హెచ్చరించారు. ఒక వేళ ఇస్మార్ట్ శంకర్ క్యారెక్టర్ ని అనుసరిస్తే వెంటనే జైల్లో పెడతారని చెప్పాడు. కచ్చితంగా ఈ మూవీని ప్రతి ఒక్కరు ఎంజాయ్ చేస్తారని అన్నారు. క్యారెక్టర్ చాలా ఎనర్జిటిక్ గా ఉంటుందని రామ్ పోతినేని హామీ ఇచ్చారు. ఈ ప్రమోషనల్ ఈవెంట్ లో హీరోయిన్ కావ్య థాపర్, నిర్మాత ఛార్మి కౌర్ కూడా పాల్గొన్నారు.