రానా టార్గెట్ పెద్దదే.. కానీ..!

సినిమాకు తన నుంచి ఎలాంటి సపోర్ట్ కావాలన్నా సరే వెనకాడకుండా చేస్తాడు దగ్గుబాటి వారసుడు రానా. అందుకే మంచి కంటెంట్ తో వచ్చే సినిమాలను తన ద్వారా వైడ్ రిలీజ్ కు ఛాన్స్ ఇస్తున్నాడు. ఓ పక్క హీరోగా సినిమాలు చేస్తూనే మరోపక్క నిర్మాతగా రానా తన మార్క్ చాటుతున్నాడు. ఐతే రానా సినిమాల విషయంలో చాలా గ్యాప్ వస్తుంది. విరాటపర్వం తర్వాత మరో సినిమా చేయలేదు. నిఖిల్ సినిమాలో ఏదో ఒక క్యామియో ఇచ్చాడంతే.

ఏదో ఒక సినిమా చేసేద్దామని కాదు సినిమా చేస్తే సంథింగ్ స్పెషల్ గా ఉండాలని అంటున్నాడు రానా. రీసెంట్ గా ది రానా దగ్గుబాటి షో అంటూ ప్రైం వీడియో లో స్పెషల్ ప్రోగ్రాం కి హోస్ట్ గా మారాడు. అందులోనే తన సినిమాల గ్యాప్ కు రీజన్ కూడా చెప్పాడు. అసలైతే ఈపాటికి తేజాతో రాక్షస రాజు సినిమా చేయాల్సి ఉంది. తేజాతో నేనే రాజు నేనే మంత్రి సినిమా చేసిన రానా రాక్షస రాజు కథ కూడా దానికి దగ్గరగా ఉండటంతో ఆ ప్రాజెక్ట్ కాదనుకున్నామని అన్నారు రానా.

అంతేకాదు హిరణ్యకశ్యప ప్రాజెక్ట్ కూడా ప్రొడక్షన్ లో ఉందని అన్నారు. ఐతే మైథలాజికల్ సినిమాలు చేయాలంటే కాస్త టైం పడుతుందని అందుకే ఆ సినిమా లేట్ అవుతుందని అన్నారు. త్రివిక్రం పర్యవేక్షణలో హిరణ్య కశ్యప సినిమా అనౌన్స్ చేసి చాలా రోజులు అయ్యింది. ఐతే ఆ ప్రాజెక్ట్ గురించి కూడా ఎలాంటి అప్డేట్ రాలేదు. బాహుబలి లో భళ్లాలదేవ పాత్ర తర్వాత మళ్లీ ఆ రేంజ్ ఇంపాక్ట్ కలిగించేలా రానా చేయలేదు.

ఐతే హిరణ్య కశ్యపతో పెద్ద టార్గెట్ పెట్టుకున్న రానా ఆ సినిమాతో మరోసారి తన స్టామినా ప్రూవ్ చేయాలని చూస్తున్నారు. రానా చేస్తున్న ది రానా దగ్గుబాటి షోలో సెలబ్రిటీస్ తో రానా చిట్ చాట్ క్రేజీగా ఉంటున్నాయి. కేవలం తెలుగు సెలబ్రిటీస్ ని మాత్రమే కాదు అన్ని సినీ పరిశ్రమలకు సంబందించిన వారితో రానా చిట్ చాట్ చేస్తున్నాడు.

రానా వెంకటేష్ చేస్తున్న రానా నాయుడు వెబ్ సీరీస్ కూడా సెట్స్ మీద ఉంది. తెలుగులో ఏమో కానీ రానాకు బాలీవుడ్ లో మంచి క్రేజ్ ఉంది. అక్కడ స్ట్రైట్ సినిమాలు చేసే అవకాశం ఉన్నా రానా ఎందుకో ఆ ప్రయత్నాలు చేయట్లేదు. బాహుబలితోనే పాన్ ఇండియా క్రేజ్ తెచ్చుకున్న రానా సినిమాల వేగం పెంచి మళ్లీ నేషనల్ లెవెల్ లో తన సత్తా చాటాలని కోరుతున్నారు దగ్గుబాటి ఫ్యాన్స్.