రానా దగ్గుబాటి ప్రైమ్ షో.. ట్రైలర్ తోనే కిక్కిచ్చాడుగా..

టాలీవుడ్ టాలెంటెడ్ నటుడు రానా దగ్గుబాటి ఏం చేసినా డిఫరెంట్ గానే ఉంటుంది. కథానాయకుడిగానే కాకుండా విలన్ గా సహా నటుడిగా ఎన్నో బిన్నమైన షేడ్స్ చూపించిన రానా హోస్ట్ కూడా తనదైన శైలిలో ఆకట్టుకుంటూ ఉంటాడు. ఇక ఇప్పుడు మరో కొత్త ప్రయోగంతో ప్రేక్షకుల ముందుకు రాబోతున్నాడు. ప్రైమ్ వీడియోలో రానా దగ్గుబాటి హోస్ట్ చేస్తున్న అన్‌స్క్రిప్టెడ్ తెలుగు ఒరిజినల్ సిరీస్ రానా దగ్గుబాటి షో వినోదప్రియులకు కొత్త తరహా ఫన్ ను అందించనుంది.

నవంబర్ 23 నుంచి ఈ షో ప్రైమ్ వీడియోలో సందడి చేయనుంది. అలాగే ప్రపంచవ్యాప్తంగా 240కి పైగా దేశాలు, ప్రాంతాల్లో అందుబాటులోకి రానుంది. రానా దగ్గుబాటి స్ఫూర్తి మీడియా బ్యానర్‌పై క్రియేట్ చేసి, ఎగ్జిక్యూటివ్ ప్రొడ్యూస్ చేసిన ఈ టాక్ షోలో స్టార్ సెలబ్రిటీలు పాల్గొననున్నారు. హైదరాబాద్‌లో గ్రాండ్ ఈవెంట్‌లో విడుదల చేసిన ఈ షో ట్రైలర్ ప్రేక్షకుల్లో కుతూహలాన్ని రేకెత్తిస్తోంది.

ఈ అన్‌స్క్రిప్టెడ్ షోలో, దుల్కర్ సల్మాన్, నాగ చైతన్య, నాని, రిషబ్ శెట్టి, సిద్ధు జొన్నలగడ్డ, శ్రీ లీల, ఎస్.ఎస్. రాజమౌళి, రామ్ గోపాల్ వర్మ వంటి ప్రముఖులు రానాతో ముచ్చటించనున్నారు. ప్రతి శనివారం కొత్త ఎపిసోడ్‌తో, ఈ సిరీస్ మొత్తం ఎనిమిది ఎపిసోడ్లుగా ఉండబోతుంది. ఈ షో ప్రత్యేకత ఏమిటంటే, సాధారణ చాట్ షోల కంటే విభిన్నంగా ఉండే ఈ షోలో సెలబ్రిటీలు వారి పర్సనల్ లైఫ్ లోని ఎన్నో విషయాలపై చర్చించనున్నారు.

దుల్కర్ సల్మాన్‌తో ముచ్చటించడం, నాగ చైతన్యతో కార్లను రివ్యూ చేయడం, సిద్ధు జొన్నలగడ్డ, శ్రీ లీలలతో పిజ్జాలు చేయడం, రాజమౌళిని ఆయన ప్రీ ప్రొడక్షన్ లొకేషన్‌లో సడెన్‌గా కలుసుకోవడం వంటి సన్నివేశాలతో షోలో రానా తన స్నేహితులను ఎక్కడా చూడని విధంగా చూపిస్తారని అర్ధమవుతుంది.

ఇక రానా ఈ షో గురించి మాట్లాడుతూ, "రానా దగ్గుబాటి షో సాధారణ టాక్ షో కాదు! సెలబ్రిటీలు స్వేచ్ఛగా, కచ్చితంగా మనసులో మాటలు పంచుకునే వేదిక ఇది. నా అనుబంధం వారితో కేవలం ప్రొఫెషనల్ గా మాత్రమే కాదు, ఫ్యామిలీ లాగా ఉంటుంది. అందుకే మా సంభాషణలు ఇంకా సహజంగా ఉంటాయి. కాఫీ తాగుతూ జ్ఞాపకాలను గుర్తుచేసుకోవడం, ఇష్టపడే వంటకాలను పంచుకోవడం, సరదాగా నవ్వుకోవడం, ఒక్కొక్కరికీ తెలియని రహస్య విషయాలను షేర్ చేసుకోవడం ఈ షో ప్రత్యేకత. ఇది ఒక మంచి జ్ఞాపకాలు నింపే షో." అని రానా తన అనుభవాన్ని పంచుకున్నారు.