సమంత సిరీస్‌కి అరుదైన రికార్డ్‌

వరుణ్‌ ధావన్‌, సమంత ప్రధాన పాత్రల్లోల నటించిన 'సిటాడెల్‌ : హనీ బన్నీ' వెబ్‌ సిరీస్‌ గత ఏడాది ప్రేక్షకుల ముందుకు వచ్చి మంచి విజయాన్ని సొంతం చేసుకుంది. హిందీలో రూపొందిన ఈ వెబ్‌ సిరీస్‌ను పలు భాషల్లో డబ్‌ చేశారు. ప్రపంచ వ్యాప్తంగా ఈ సినిమాని అమెజాన్‌ ప్రైమ్‌ స్ట్రీమింగ్‌ చేసింది. ఈ వెబ్‌ సిరీస్‌ను దాదాపు 170 దేశాల్లో ప్రేక్షకులు చూశారు. వందకు పైగా దేశాల్లో ఈ సినిమా కొన్ని వారాల పాటు ట్రెండ్‌ అయ్యింది. దాంతో అరుదైన రికార్డ్‌ను దక్కించుకోవడంతో పాటు అరుదైన గౌరవంను ఈ సినిమా సొంతం చేసుకుంది.

సిటాడెల్‌ వెబ్‌ సిరీస్‌ నాన్ ఇంగ్లీష్‌ ఒరిజినల్‌ జాబితాలో గ్లోబల్ ర్యాంకింగ్‌లో టాప్‌ 10 లో చోటు దక్కించుకుంది. ఇంగ్లీష్ వెబ్‌ సిరీస్‌ కాకుండా ఇతర భాషల్లో రూపొందిన వెబ్‌ సిరీస్‌ల్లో అత్యధిక వ్యూస్ సొంతం చేసుకున్న వెబ్‌ సిరీస్‌ సరసన సమంత సిటాడెల్‌ చేరడం విశేషం. ఇంగ్లీష్‌లో వచ్చిన సిటాడెల్‌కి మంచి స్పందన రావడంతో ఇంగ్లీష్ ప్రేక్షకులు సైతం సమంత నటించిన హిందీ 'సిటాడెల్‌' వెబ్‌ సిరీస్‌ను చూసేందుకు ఆసక్తి చూపించారు. ఆ కథకు ఈ కథకు సంబంధం ఉందా అనే విషయాన్ని తెలుసుకునేందుకు చాలా మంది ఈ వెబ్‌ సిరీస్ చూసి ఉంటారనే అభిప్రాయం ఉంది.

మొత్తానికి హిందీ సిటాడెల్‌ వెబ్‌ సిరీస్‌కి అరుదైన ఘనత దక్కింది. ఇంగ్లీష్‌లోనే కాకుడా కొరియన్‌, స్పానిష్‌ ఇలా ఎన్నో భాషల్లో వెబ్‌ సిరీస్‌లు రూపొందుతూ ఉంటాయి. వాటన్నింటిని వెనక్కి నెట్టి హిందీ సిటాడెల్‌ టాప్‌లో నిలిచింది. రాజ్‌ అండ్‌ డీకే దర్శకత్వంలో రూపొందిన ఈ వెబ్‌ సిరీస్‌లో సమంత చేసిన యాక్షన్‌ సన్నివేశాలు ప్రధాన ఆకర్షణగా నిలిచాయి. సమంత అనారోగ్య సమస్యల కారణంగా దాదాపు రెండేళ్లు సెట్స్‌పైనే ఉండి, ప్రమోషన్స్‌ కి సైతం చాలా సమయం తీసుకున్న ఈ వెబ్‌ సిరీస్‌ను గత ఏడాది నవంబర్‌లో ప్రేక్షకుల ముందుకు తీసుకు వచ్చారు. అప్పటి నుంచి పలు దేశాల్లో ట్రెండ్‌ అవుతూనే వచ్చింది. అందుకే నాన్ ఇంగ్లీష్ ఒరిజినల్‌ టాప్‌ 10 జాబితాలో చోటు దక్కించుకుంది.

సిటాడెల్‌తో పాటు బూతు సిరీస్‌గా పేరు దక్కించుకున్న మీర్జాపూర్ 3 వెబ్‌ సిరీస్‌ సైతం గ్లోబల్ ర్యాంకింగ్‌లో టాప్‌ 10 లో నిలిచి సత్తా చాటింది. నాన్ ఇంగ్లీష్ లాంగ్వేజ్‌ ఒరిజినల్‌ వెబ్‌ సిరీస్‌ల టాప్ 10 జాబితాలో మీర్జాపూర్‌ 3 చోటు దక్కించుకోవడం విశేషం. గతంలో వచ్చిన మీర్జాపూర్‌ రెండు సిరీస్‌లు సైతం భారీ విజయాన్ని సొంతం చేసుకున్నాయి. అయితే ఈసారి అంతకు మించి అంటూ నాన్ ఇంగ్లీష్ గ్లోబల్‌ టాప్‌ సిరీస్‌ల జాబితాలో నిలిచింది. ఈ రెండు వెబ్‌ సిరీస్‌లు బాలీవుడ్‌లో రూపొందాయి. ప్రపంచ వ్యాప్తంగా రెండు వెబ్‌ సిరీస్‌లను వందకు పైగా దేశాల్లో అత్యధికంగా వీక్షించారని అమెజాన్‌ అధికారిక లెక్కలు చెబుతున్నాయి. ఈ సక్సెస్‌ జోష్‌తో సమంత మరో వెబ్‌ సిరీస్‌కి రెడీ అవుతున్నట్లు తెలుస్తోంది.