కుర్చీ మడత ఆఫర్‌ పై రష్మీ క్లారిటీ

సంక్రాంతి కానుకగా వచ్చిన సూపర్‌ స్టార్‌ మహేష్‌ బాబు, త్రివిక్రమ్‌ ల గుంటూరు కారం సినిమాలోని కుర్చీ మడత పెట్టి సాంగ్ సెన్షేషన్‌ క్రియేట్‌ చేసింది. సోషల్‌ మీడియాలో ఆ పాటను విమర్శిస్తూనే మిలియన్ ల కొద్ది వ్యూస్ ను దక్కించుకుంటుంది. వేలాది మంది కుర్చీమడత పెట్టి పాటకు డాన్స్ వేస్తూ రీల్స్ చేస్తున్నారు.

ఈ పాటలో మహేష్ బాబు మరియు శ్రీలీలతో పాటు సీనియర్‌ హీరోయిన్ పూర్ణ ను కూడా చూడవచ్చు. పాట ఆరంభంలో పూర్ణ వస్తుంది. మొదట ఈ పాట కోసం జబర్దస్త్‌ యాంకర్ రష్మి గౌతమ్ ని సంప్రదించారని, కాని ఆమె తిరస్కరించింది అంటూ గత రెండు మూడు రోజులుగా మీడియాలో ప్రచారం జరుగుతోంది.

సాధారణంగా మరే హీరోయిన్ అయినా లేదా యాంకర్ అయినా మహేష్ బాబు సినిమా పాట కనుక వెంటనే చేసేందుకు ఒప్పేసుకునే వారు. కాని రష్మి గౌతమ్‌ మాత్రం నో చెప్పిందా అంటూ మహేష్ బాబు ఫ్యాన్స్ కొందరు ఆమెను ట్రోల్స్ చేయడం మొదలు పెట్టారు. సోషల్‌ మీడియాలో రచ్చ అవుతున్న ఈ విషయమై రష్మి గౌతమ్‌ స్పందించింది.

గుంటూరు కారం సినిమాలో ఐటం సాంగ్‌ ఆఫర్‌ తన వద్దకు రాలేదు అంటూ తేల్చి చెప్పింది. మీడియాలో జరుగుతున్న ప్రచారం మొత్తం కూడా గాలి వార్తలు. కేవలం పుకార్లు మాత్రమే అంటూ రష్మి కొట్టి పారేసింది. అసలు ఇలాంటి పుకార్లు ఎలా పుడుతాయో కూడా అర్థం కావడం లేదు అన్నట్లుగా అసహనం వ్యక్తం చేసింది.

ఆ పాటలో పూర్ణ గారి అప్పియరెన్స్ మరియు డాన్స్ చాలా బాగుందని కూడా రష్మి తన పోస్ట్‌ లో పేర్కొంది. గత రెండు మూడు రోజులుగా జరుగుతున్న ప్రచారం కు రష్మి గౌతమ్‌ బ్రేక్ వేసినట్లు అయింది. ఆమె పోస్ట్‌ తో తనకు మహేష్ బాబు సినిమాలో ఛాన్స్ వస్తే తప్పకుండా చేస్తాను అన్నట్లుగా సందేశం కూడా ఇచ్చినట్లు ఉందని కొందరు అభిప్రాయం వ్యక్తం చేస్తున్నారు.