రష్మిక నాన్ స్టాప్ రైడ్ లో సూపర్ సిక్స్..

నేషనల్ క్రష్ రష్మిక సక్సెస్ ఫెయిల్యూర్స్ తో సంబంధం లేకుండా సినిమాలు చేసుకుంటూ వెళుతోంది. టాలీవుడ్ కోలీవుడ్ బాలీవుడ్ అని తేడా లేకుండా బడా సినిమాలను లైన్ లో పెడుతోంది. ఇక నాన్ స్టాప్ గా వరుస పెట్టి సినిమాలు రిలీజ్ చేసేందుకు సిద్ధమైంది. 2016లో ‘కిరీక్ పార్టీ’ సినిమాతో హీరోయిన్ గా కెరియర్ స్టార్ట్ చేసిన రష్మిక మందన్న, దీని తర్వాత కన్నడంలో ‘అంజనీపుత్ర’ సినిమాలో చేసింది. ఈ రెండు సూపర్ హిట్ అయ్యాయి. ఇక 2018లో ‘చలో’ సినిమాతో ఈ అమ్మడు టాలీవుడ్ లోకి అడుగుపెట్టి బ్లాక్ బస్టర్ అందుకుంది.

తరువాత విజయ్ దేవరకొండతో ‘గీతాగోవిందం’ మూవీ చేసి మరో సూపర్ హిట్ ని ఖాతాలో వేసుకుంది. అక్కడి నుంచి రష్మిక వెనక్కి తిరిగి చూసుకోలేదు. బ్యాక్ టూ బ్యాక్ ప్రాజెక్ట్స్ తో వరుస విజయాలు అందుకొని స్టార్ హీరోయిన్ గా మారిపోయింది. 2021లో ‘పుష్ప’ సినిమాతో రష్మిక మందన పాన్ ఇండియా హీరోయిన్ గా మారిపోయింది. ఈ సినిమాతో బాలీవుడ్ ఆడియన్స్ కి కూడా రష్మిక బాగా కనెక్ట్ అయ్యింది.

యూత్ క్రష్ గా రష్మిక మారిపోయింది. ‘గుడ్ బై’ సినిమాతో రష్మిక మందన హిందీలోకి అడుగుపెట్టింది. తరువాత ‘మిషన్ మజ్ను’ మూవీలో నటించింది. ఈ రెండు పెద్దగా మెప్పించలేదు. అయితే సందీప్ రెడ్డి వంగా దర్శకత్వంలో రణబీర్ కపూర్ కి జోడీగా చేసిన ‘యానిమల్’ తో బిగ్గెస్ట్ హిట్ ని బాలీవుడ్ లో సొంతం చేసుకుంది. ఈ సినిమాతో బాలీవుడ్ కూడా రష్మికకి డిమాండ్ పెరిగింది.

విక్కీ కౌశల్ కి జోడీగా ‘ఛావా’ మూవీలో రష్మిక నటించింది. ఛత్రపతి శంభాజీ మహారాజ్ జీవిత కథతో ఈ సినిమా తెరకెక్కింది. హిందీలో మోస్ట్ ప్రెస్టీజియస్ ప్రాజెక్ట్ గా ఈ చిత్రం రాబోతోంది. మరో వైపు మోస్ట్ అవైటెడ్ మూవీ ‘పుష్ప 2’ రిలీజ్ కి రెడీ అవుతోంది. ఈ రెండు సినిమాలు కాకుండా రష్మిక చేతిలో ఆరు సినిమాలు ఉన్నాయి. ‘రెయిన్ బో’, ‘ది గర్ల్ ఫ్రెండ్’ సినిమాలు ఫీమేల్ సెంట్రిక్ కథలతో తెరకెక్కుతున్నాయి.

అలాగే సల్మాన్ ఖాన్, మురుగదాస్ కాంబోలో తెరకెక్కుతోన్న ‘సికందర్’ సినిమాలో రష్మిక హీరోయిన్ గా చేస్తోంది. ధనుష్, శేఖర్ కమ్ముల కాంబోలో వస్తోన్న ‘కుభేర’లో నటిస్తోంది. హిందీలో ఆయుష్మాన్ ఖురానాకి జోడీగా ‘థమ’ సినిమాలో హీరోయిన్ గా కన్ఫర్మ్ అయ్యింది. ఇవి కాకుండా విజయ్ దేవరకొండ హీరోగా రాహుల్ సాంకృత్యాన్ దర్శకత్వంలో తెరకెక్కనున్న చిత్రంలో రష్మిక హీరోయిన్ గా ఫిక్స్ అయ్యింది.

మొత్తం రష్మిక చేతిలో ఏడు సినిమాలుండగా అందులో ‘పుష్ప 2’ ఈ ఏడాది రానుంది. మిగిలిన ఆరు ఐదు సినిమాలు 2025లో రిలీజ్ అవ్వబోతున్నాయి. ఈ సినిమాలతో బాలీవుడ్ లో రష్మిక మందన స్టార్ హీరోయిన్ గా మారిపోయిన ఆశ్చర్యపోవాల్సిన పని లేదని సినీ విశ్లేషకులు అంటున్నారు.