RC 16 కోసం మాస్టర్ లెన్స్.. సుక్కూ కూడా!

మెగా పవర్ స్టార్ రామ్చరణ్, ఉప్పెన డైరెక్టర్ బుచ్చిబాబు సాన కాంబోలో ఓ సినిమా రానున్న విషయం తెలిసిందే. ఇప్పటికే ఈ సినిమాకు సంబంధించిన అఫీషియల్ అనౌన్స్మెంట్ రాగా.. త్వరలోనే షూటింగ్ మొదలు కానుంది. ప్రస్తుతం స్టార్ డైరెక్టర్ శంకర్ దర్శకత్వంలో తెరకెక్కుతున్న గేమ్ ఛేంజర్ మూవీలో బిజీగా ఉన్న చరణ్.. ఈ సినిమా అయ్యాక RC 16 సెట్స్ లో అడుగుపెట్టనున్నారు.

అయితే ఈ ప్రాజెక్ట్ ఉత్తరాంధ్రలో జరిగే క్రీడా నేపథ్యంలో రానుంది. దీంతో మూవీ కోసం అక్కడి ఆర్టిస్టులను తీసుకున్నారు. అందుకోసం స్పెషల్ ఆడిషన్స్ కూడా నిర్వహించారు మేకర్స్. భారీ బడ్జెట్ తో తెరకెక్కనున్న ఈ సినిమాకు సంబంధించి ఒక్కో అప్డేట్ మెల్లగా వస్తోంది. ఇటీవలే ఈ ప్రాజెక్ట్ లోకి ఆస్కార్ విన్నింగ్ డైరెక్టర్ ఏఆర్ రెహమాన్ ను ఆహ్వానించిన విషయం తెలిసిందే. మ్యూజిక్ సిట్టింగ్స్ కూడా ప్రారంభమైనట్లు బుచ్చిబాబు తెలిపారు.

తాజాగా RC 16 మేకర్స్ మరో క్రేజీ అప్డేట్ ఇచ్చారు. ఈ సినిమా కోసం మాస్టర్ లెన్స్ మ్యాన్ ను రంగంలోకి దించుతున్నట్లు ప్రకటించారు. RC 16కు రత్నవేలు సినిమాటోగ్రాఫర్ గా వ్యవహరిస్తున్నట్లు అధికారికంగా ప్రకటించారు. శనివారం రత్నవేలు పుట్టినరోజు సందర్భంగా విషెస్ చెబుతూ స్పెషల్ పోస్టర్ ను రిలీజ్ చేశారు. అద్భుతమైన విజువల్స్ అందించే స్టార్ సినిమాటోగ్రాఫర్ రత్నవేలుకు పుట్టిన రోజు శుభాకాంక్షలు అంటూ ట్వీట్ చేశారు.

ఇక ఈ సినిమాకు బుచ్చిబాబు గురువు లెక్కల మాస్టర్ సుకుమార్ సహా నిర్మాతగా వ్యవహరిస్తున్నారు. వృద్ధి సినిమాస్‌, సుకుమార్ రైటింగ్స్ బ్యానర్లపై ఈ క్రేజీ ప్రాజెక్ట్ రూపొందుతోంది. భారీ బడ్జెట్ తోపాటు హై టెక్నాలజీ వాల్యూస్ తో ఈ సినిమా తీస్తున్నట్లు సమచారం. ప్రొడక్షన్ డిజైనర్, ఆర్ట్ డైరెక్టర్ గా కొల్ల అవినాష్ వ్యవహరించనున్నారు. ప్రముఖ నిర్మాణ సంస్థ మైత్రీ మూవీ మేకర్స్.. ఈ సినిమాను నిర్మిస్తోంది.

ఈ చిత్రంలో రామ్ చరణ్ సరసన అతిలోక సుందరి శ్రీదేవి పెద్ద కూతురు జాన్వీ కపూర్ ను ఫైనలైజ్ చేసినట్లు గత కొద్ది రోజులుగా వార్తలు వస్తున్నాయి. ఆమె తండ్రి, బాలీవుడ్ నిర్మాత బోనీ కపూర్ ఓ ఇంటర్వ్యూలో ఈ మ్యాటర్ ను కన్ఫర్మ్ చేసిన విషయం తెలిసిందే. త్వరలో తన కూతురు రామ్ చరణ్ సినిమా చేస్తుందని ఆయన చెప్పారు. దీంతో హీరోయిన్ గా జాన్వీ ఫిక్స్ అయినట్టే. కన్నడ నటుడు శివ రాజ్ కుమార్ ఓ కీలక పాత్ర పోషిస్తున్నట్లు తెలుస్తోంది. చూడాలి మరి ఈ సినిమా షూటింగ్ ఎప్పుడు స్టార్ట్ అవుతుందో.