బిల్ బోర్డ్స్‌పై కూతురిని చూసి స్టార్ హీరోయిన్ ఎమోష‌న్

బాలీవుడ్ అందాల క‌థానాయిక ర‌వీనా టాండన్ తెలుగు వారికి సుప‌రిచితురాలు. బాల‌కృష్ణ న‌టించిన బ్లాక్ బ‌స్ట‌ర్ 'బంగారు బుల్లోడు'లో త‌న‌దైన అందం, న‌ట‌ప్ర‌ద‌ర్శ‌న‌తో క‌ట్టి ప‌డేసిన ఈ ఉత్త‌రాది బ్యూటీ, బాలీవుడ్ లో ఎన్నో బ్లాక్ బ‌స్ట‌ర్ చిత్రాల‌లో న‌టించింది. ర‌వీనా ఇప్పుడు క‌థానాయిక కాబోతున్న ఆడ‌పిల్ల‌కు మామ్. అయినా కానీ మునుప‌టిలా గ్లామ‌ర్ ని మెయింటెయిన్ చేస్తూ ఆశ్చ‌ర్య‌ప‌రుస్తోంది. ఇటీవ‌ల సీనియ‌ర్ న‌టిగాను పున‌రాగ‌మ‌నంలో త‌న‌దైన ముద్ర వేస్తోంది.

ప్రస్తుతం తన తాజా వెబ్ సిరీస్ 'కర్మ్మ కాలింగ్' విడుదలకు సిద్ధ‌మైంది. ఇంత‌లోనే ర‌వీనా టాండ‌న్ కుమార్తె రాషా త‌డాని అంద‌చందాల గురించి, త‌న డెబ్యూ సినిమా గురించి ప‌రిశ్ర‌మలో ఆస‌క్తిక‌ర చ‌ర్చ సాగుతోంది. ర‌వీనా కుమార్తె రాషా థడానీ సినిమాల్లో ప్ర‌వేశించ‌క ముందే మోడ‌ల్ గా త‌న‌దైన ముద్ర వేస్తోంది. ఈ టీనేజీ బ్యూటీ న‌టించిన వాణిజ్య‌ ప్రకటనలు ముంబై అంతటా బిల్‌బోర్డ్‌లలో ప్రదర్శించ‌గా, వాటిని అభిమానుల‌కు చూపిస్తూ ర‌వీనా ఉబ్బిత‌బ్బిబ్బ‌వుతోంది.

పారవశ్యంలో ఉన్న మ‌మ్ ర‌వీనా టాండ‌న్ తన ఇన్‌స్టాగ్రామ్‌లో ఈ బిల్‌బోర్డ్ ర్యాంపేజ్ వీడియోను షేర్ చేసింది. ఇంకేముంది? రాషాకు సంబంధించిన ప్రకటనలో తల్లి - కుమార్తె కూడా చాలా బిల్‌బోర్డ్‌లపై పు పక్కపక్కనే క‌నిపించారు. రవీనా కర్మ కాలింగ్ పోస్టర్ కూడా వీటిలో క‌నిపించింది. రాషా తడాని కొన్ని ప్ర‌ముఖ బ్రాండ్లకు ప్ర‌చార‌క‌ర్త‌గా మారింది. రాషా త్వరలో బాలీవుడ్‌లోకి అడుగుపెట్టనుంది. దానికి చాలా ముందే రాషా ఎవ‌రో అంద‌రికీ తెలిసింది. త‌న ముఖం ప్ర‌పంచానికి ప‌రిచ‌య‌మైపోయింది.

ర‌వీనా షేర్ చేసిన తాజా వీడియోపై పలువురు నెటిజ‌నులు ఆస‌క్తిక‌రంగా స్పందించారు. రాషాను రవీనాకు కార్బన్ కాపీ అని భాగ్య‌శ్రీ కామెంట్ చేసారు. అయితే ఒక నెటిజ‌న్‌ తల్లి ఎవరు? కుమార్తె ఎవరు? అనేది తెలియక తికమకపడుతున్నాన‌ని స‌ర‌దాగా వ్యాఖ్యానించారు. చాలామంది డెబ్యూ న‌టి రాషాకు శుభాకాంక్షలు తెలిపారు.