మాస్ జాతర.. లుక్కు అదిరింది రాజా

మాస్ మహారాజా రవితేజ 75వ చిత్రానికి "మాస్ జాతర" అనే పవర్‌ఫుల్ టైటిల్‌ను ఫిక్స్ చేశారు. సితార ఎంటర్‌టైన్‌మెంట్స్ పతాకంపై రూపొందుతున్న ఈ ప్రతిష్టాత్మక చిత్రం, రవితేజ కెరీర్ లోనే ఒక సరికొత్త ట్రెండ్ సెట్ చేయనున్నట్లు తెలుస్తోంది భాను భోగవరపు రచయితగా, దర్శకుడిగా వ్యవహరిస్తున్న ఈ సినిమాను మొదట సంక్రాంతికి విడుదల చేయాలని అనుకున్నారు. కానీ మధ్యలో షూటింగ్ కి బ్రేక్ రావడంతో ప్లాన్ మారింది. 2025 మే 9న ప్రపంచవ్యాప్తంగా విడుదల కానుంది.

తాజాగా విడుదలైన ఫస్ట్ లుక్ పోస్టర్ అభిమానులను ఉర్రూతలూగించింది. జాతరల హడావిడి నేపథ్యంగా దీపావళి సంబరాలను తలపిస్తూ రవితేజ స్టైలిష్ గా, తుపాకీ పట్టుకుని నడుచుకుంటూ వస్తున్న లుక్ మాస్ ప్రేక్షకులను ఆకట్టుకుంటోంది. ఈ పోస్టర్ లో ఉన్న ఎఫెక్ట్స్ రవితేజ పట్ల క్రేజ్‌ని మరింత పెంచాయి. జాతర నేపథ్యంలో టపాసుల వెలుగులు, అల్లరిమూకతో చుట్టూ ఉన్న ఆ ఫైర్ ఎలిమెంట్స్ పోస్టర్ లో సినిమాటిక్ గ్రాండియర్ ని సూచిస్తున్నాయి.

రవితేజ - శ్రీలీల కాంబినేషన్ గతంలో "ధమాకా"తో సూపర్ హిట్ అందుకుంది. ఇప్పుడు "మాస్ జాతర" లో ఈ జంట మరోసారి ప్రేక్షకులను అలరించేందుకు సిద్ధమవుతోంది. దర్శకుడు భాను భోగవరపు ఈ సినిమా గురించి చాలా నమ్మకంగా ఉన్నారు. "మాస్ జాతర" కథకు రవితేజ టైమింగ్, యాటిట్యూడ్ అద్భుతంగా సరిపోతాయట. ఇక ఈ సినిమా వినోదాన్ని మరియు మాస్ యాక్షన్ ఎలిమెంట్స్‌ని పటిష్టంగా అందించేందుకు చిత్ర బృందం కృషి చేస్తోంది.

భీమ్స్ సిసిరోలియో సంగీతం అందిస్తుండగా, విధు అయ్యన్న సినిమాటోగ్రఫీ బాధ్యతలు చేపడుతున్నారు. ఎడిటర్ గా నవీన్ నూలి వ్యవహరిస్తున్నారు. ఈ సినిమా మాస్ ప్రేక్షకులకు అసలైన థియేట్రికల్ అనుభూతిని అందించడానికి ప్రతి విషయంలో జాగ్రత్తగా ప్లాన్ చేస్తున్నారు. సితార ఎంటర్‌టైన్‌మెంట్స్, ఫార్చూన్ ఫోర్ సినిమాస్ బ్యానర్లలో సూర్యదేవర నాగవంశీ, సాయి సౌజన్య కలిసి భారీ ఎత్తున నిర్మిస్తున్నారు.

శ్రీకర స్టూడియోస్ సమర్పణలో "మాస్ జాతర" తెలుగు సినీ ప్రపంచానికి మరపురాని అనుభూతిని ఇస్తుందని మేకర్స్ చెబుతున్నారు. ఇక ఇంతకు ముందు విడుదల చేసిన ప్రీ-లుక్ లో రెండు సిగరెట్లు పట్టుకున్న రవితేజ లుక్ సినిమాపై అంచనాలను పెంచింది. "మాస్ జాతర" సినిమా నిజంగా మాస్ ప్రేక్షకులకు, రవితేజ అభిమానులకు మరపురాని జాతరగా నిలిచిపోతుందనే నమ్మకంతో చిత్ర బృందం ఉంది. ఇక త్వరలోనే సినిమాకు సంబంధించిన టీజర్ పై క్లారిటీ ఇవ్వనున్నారు.