రవితేజ్​ సూపర్​ ప్లాన్.. ​ గణేశ్ పండక్కి సర్ ప్రైజ్!

మాస్​ మహారాజా రవితేజ ఓ పక్క సినిమాలు చేస్తూనే మరో వైపు నిర్మాతగానూ సినిమాలను నిర్మిస్తున్నారు. ఆర్‌టీ టీమ్ వర్క్స్ బ్యానర్‌పై కంటెంట్ బేస్డ్ సినిమాలను రూపొందిస్తున్నారు. ప్రస్తుతం ఆయన నిర్మాణంలో తెరకెక్కుతున్న సినిమా 'ఛాంగురే బంగారురాజా'. ఫ్రేమ్ బై ఫ్రేమ్ పిక్చర్స్‌తో కలిసి చిత్రాన్ని తెరకెక్కిస్తున్నారు. తాజాగా ఈ సినిమా రిలీజ్​ డేట్​ను ఖరారు చేసుకుంది.

సాధారణంగా ఏ సినిమా అయినా శుక్రవారమే ఎక్కువగా రిలీజ్ అవుతుంటాయి. అదే ఆ వీకెండ్​కు ఓ రోజు అటు ఇటు ఏమైనా పండగలు ఉండి, సినిమా కాస్త హిట్ టాక్​ తెచ్చుకుంటే బాగా కలిసొస్తుంది. అయితే ఇప్పుడు రాబోతున్న వినాయక చవితి పండగ సెప్టెంబర్​ 18 సోమవారం వచ్చింది. అంటే సెప్టెంబర్ 15న శుక్రవారం. దీంతో ఆ రోజు కర్చీలు వేసేందుకు పలు సినిమాలు ట్రై చేశాయి. స్కంద, టిల్లు స్క్వేర్ సహా పలు డబ్లింగ్ చిత్రాలు రిలీజ్​ డేట్​ను ఖరారు చేసుకున్నాయి. అయితే ఇప్పుడు స్కంద, టిల్లు స్క్వేర్ వంటి పోస్ట్ పోన్ అయ్యాయి. విశాల్​ మార్క్ ఆంటోని మాత్రమే వస్తోంది.

దీంతో సెప్టెంబర్​ 15 డేట్​ను ఊపయోగించుకున్నారు రవితేజ. తన నిర్మాణంలో తెరకెక్కిన 'ఛాంగురే బంగారురాజా' సినిమాను వినాయక చవితి సందర్భంగా సెప్టెంబర్ 15న రిలీజ్ చేయబోతున్నట్లు అనౌన్స్ చేశారు. ఈ విషయాన్ని తెలుపుతూ ఓ కొత్త పోస్టర్​ను రిలీజ్ చేశారు. ఇందులో కార్తిక్​, రవిబాబు, సత్య గన్​, కత్తి పట్టుకుని కనిపిస్తున్నారు.

'కేరాఫ్ కంచెరపాలెం', 'నారప్ప' ఫేమ్ కార్తిక్ రత్నం ఈ చిత్రంలో హీరోగా నటించారు. కుషితా కల్లాపు.. కార్తిక్ రత్నం సరసన హీరోయిన్‌గా నటించింది. కామెడీ సస్పెన్స్ థ్రిల్లర్​గా ఈ సినిమా రూపొందింది. సతీష్‌వర్మ దర్శకత్వం వహించారు. ఇంకా ఈ చిత్రంలో రవిబాబు, కమెడియన్​ సత్య కూడా ఇతర కీలక పాత్రల్లో నటించారు.

కృష్ణ సౌరభ్ సినిమాకు సంగీతం అందిస్తున్నారు. సుందర్ ఎన్‌సి సినిమాటోగ్రఫీ అందిస్తున్నారు. ఇప్పటికే ఈ సినిమాకు సంబంధించి గతంలో టీజర్‌, సాంగ్స్​ను రిలీజ్ చేశారు మేకర్స్​. అవి సినిమాపై ఇంట్రెస్ట్​ను కలిగించాయి. ఇక రిలీజ్ డేట్ కూడా దగ్గరపడడంతో ట్రైలర్​ను కూడా త్వరలోనే రిలీజ్ చేయనున్నారు. చూడాలి మరి ఈ సినిమా ఎలాంటి ఫలితాన్ని అందుకుంటుందో..