బుచ్చిబాబు ఎదురు చూస్తోన్న రోజు వ‌చ్చేసిందిలా!

# ఆర్సీ 16 షూటింగ్ ఎప్పుడు మొద‌ల‌వుతుందా? అని మెగా అభిమానులంతా ఎంతో ఆస‌క్తిగా ఎదురు చూస్తున్నారు. సినిమా ప్రారంభోత్స‌వం జరుపుకుని నెల‌లు గ‌డుస్తున్నా? ఇంత వ‌ర‌కూ రెగ్యుల‌ర్ షూటింగ్ మొద‌ల‌వ్వ‌లేదు. దీంతో ఏడాది కూడా ముగుస్తుండ‌టంతో ఇక వ‌చ్చే ఏడాదే షూటింగ్ మొద‌లువుతంద‌ని అంతా భావిస్తున్నారు. స‌రిగ్గా ఇదే స‌మ‌యంలో మైసూర్ లో మొద‌ల‌వుతుంద‌ని ప్ర‌చారం జ‌రిగింది.

తాజాగా దాన్ని నిజం చేస్తూ ద‌ర్శ‌కుడు బుచ్చిబాబు అభిమానులంద‌ర్నీ స‌ర్ ప్రైజ్ చేసాడు. నేటి నుంచే ఈ సినిమా షూటింగ్ మైసూర్ లో మొద‌ల‌వుతున్న‌ట్లు తెలిపారు. దీనిలో భాగంగా మైసూరులోని చాముండేశ్వ‌రి అమ్మ‌వారి ఆల‌యంలో ప్ర‌త్యేక పూజలు నిర్వ‌హించారు. ఇది ఎంతో ముఖ్య‌మైన రోజు. ఎన్నో రోజులుగా ఎదురు చూస్తోన్న రోజు వ‌చ్చేసింది. మీ అంద‌రి అశీర్వాదం ఉండాలి` అని ఆయ‌న ట్వీట్ చేసారు. అలాగే ఆయ‌న ఆల‌యం ఎదుట దిగిన ఓ ఫోటోని కూడా షేర్ చేసారు.

ఇప్పుడీ వార్త‌...ఫోటో నెట్టింట వైర‌ల్ గా మారింది. కొత్త ఏడాదిలోకి అడుగు పెట్ట‌డానికి ఇంకా 40 రోజులు స‌మ‌యం ఉండ‌గానే ఆర్సీ 16 షూటింగ్ షురూ చేసారు. ఇప్ప‌టికే రామ్ చ‌ర‌ణ్ కూడా మైసూరు కు చేరుకున్నారు. తొలి షెడ్యూల్ ఆయ‌న‌తోనే మొద‌ల‌వుతుంది. ఇత‌ర కీల‌క పాత్ర‌ధారులంతా ఈ షూట్ లో పాల్గొంటారు. అలాగే సినిమా జ‌గ‌ప‌తి బాబు కూడా కీల‌క పాత్ర పోషిస్తున్నారు. ఆయ‌న కూడా ఎంట్రీ ఇస్తున్న‌ట్లు చిత్ర యూనిట్ రివీల్ చేసింది.

ఇందులో చ‌ర‌ణ్కి జోడీగా జాన్వీ క‌పూర్ న‌టిస్తోంది. అయితే అమ్మ‌డు ఈ షెడ్యూల్ పాల్గొన్న‌ట్లు లేదు. హీరోయిన్ లేకుండానే ఈ షెడ్యూల్ ముగించేలా క‌నిపిస్తున్నారు. ప్ర‌స్తుతం జాన్వీ క‌పూర్ బాలీవుడ్ సినిమాల‌తో బిజీగా ఉంది. ఇటీవ‌లే ఆమె న‌టించిన `దేవ‌ర` ప్రేక్ష‌కుల ముందుకొచ్చిన సంగ‌తి తెలిసిందే. ఆ సినిమా రిలీజ్ అనంత‌రం ముంబైకి వెళ్లిపోయింది. అక్క‌డ నుంచే త‌న యాక్టివిటీస్ అన్నింటిని కొన‌సాగిస్తుంది.