మైసూర్ షెడ్యూల్ ఇంత చిన్న‌దా?

#ఆర్సీ 16 రెగ్యుల‌ర్ షూటింగ్ మైసూర్ లో ప్రారంభ‌మైన సంగ‌తి తెలిసిందే. రామ్ చ‌ర‌ణ్ స‌హా కీల‌క న‌టులంతా ఈ షెడ్యూల్ లో పాల్గొంటున్నారు. అయితే రామ్ చ‌ర‌ణ్ రంగంలోకి దిగేది సోమ‌వారం నుంచి అని తెలిసింది. ఇప్ప‌టికే చ‌ర‌ణ్ అక్క‌డికి చేరుకున్నా? టీమ్ తో ఇంట‌రాక్ష‌న్ త‌ప్ప షూట్ లో పాల్గొన‌డం లేదు. ద‌ర్శ‌కుడు బుచ్చిబాబు ఈ రెండు రోజుల పాటు ఇత‌ర న‌టీన‌టుల‌పై షూట్ చేస్తున్న‌ట్లు తెలిసింది. చ‌ర‌ణ్ మాత్రం సోమ‌వారం నుంచి రెగ్యుల‌ర్ గా సెట్స్ కి వెళ్తార‌ని స‌మాచారం.

ఇక ఈ షెడ్యూల్ లో హీరోయిన్ జాన్వీ క‌పూర్ జాయిన్ అవుతుందా? లేదా? అన్న సందేహం ఉంది. జాన్వీ పేరు ఎక్క‌డా తెర‌పైకి రాక‌పోవ‌డంతో తొలి షెడ్యూల్ లో ఆమెపై సీన్స్ లేవ‌ని అంతా అనుకున్నారు. కానీ జాన్వీ కూడా జాయిన్ అవుతుంది. ఆమె కూడా సోమ‌వారం నుంచి షూటింగ్ కి హాజ‌ర‌వుతుంది. ఇందులో రామ్ చ‌ర‌ణ్‌-జాన్వీపై కీల‌క స‌న్నివేశాలు చిత్రీక‌రించ‌నున్నార‌ని స‌మాచారం. అయితే ఈ షెడ్యూల్ చాలా చిన్న‌ద‌ని తెలుస్తోంది.

కేవ‌లం ప‌ది రోజులు మాత్ర‌మే షూటింగ్ జ‌రుగుతుంది. ఈ ప‌ది రోజుల షూట్ కేవ‌లం మైసూరులోనే నిర్వ‌హిస్తారట. ఆ షెడ్యూల్ ముగించుకుని హైద‌రాబాద్ కి వ‌చ్చి రెండు...మూడు రోజుల విరామం అనంత‌రం మ‌ళ్లీ కొత్త షెడ్యూల్ రామోజీ ఫిలిం సిటీలో మొద‌లు పెడ‌తార‌ని స‌మాచారం. బుచ్చిబాబు కూడా వేగంగానే షూటింగ్ పూర్తి చేయ‌గ‌ల ద‌ర్శ‌కుడు. అత‌డి తొలి సినిమా `ఉప్పెన` వేగంగానే చుట్టాడు. దీంతో బుచ్చిబాబు మేకింగ్ లో పాస్ట్ అని తెలుస్తోంది.

అలాగే గురువు క‌న్నా కూడా బెట‌ర్ అని ఆర్సీ 16 తో ప్రూవ్ చేసుకుంటాడు ఏమో చూడాలి. గురువు సుకుమార్ సినిమా తీయ‌డానికి ఎక్కువ స‌మ‌యం తీసుకుంటారు. సెట్స్ కి వెళ్లిన త‌ర్వాత ఆయ‌న ఆలోచ‌న‌ల్లో మార్పులొ స్తుంటాయి. అందుకు అనుగుణంగా అప్ప‌టిక‌ప్పుడు మ‌ళ్లీ మార్చేస్తుంటారు. దీంతో షూటింగ్ కూడా ఆల‌స్య‌మ వుతుంది. ఆర్సీ 16 తో హిట్ కొడితే బుచ్చిబాబు గుర‌వును మించిన శిష్యుడైపోతాడు.