మ్యాడ్ 2… స్పెషల్ సాంగ్ కోసం శ్రీవిష్ణు హీరోయిన్

నార్నె నితిన్, రామ్ నితిన్, సంగీత్ శోభన్ హీరోలుగా కళ్యాణ్ శంకర్ దర్శకత్వంలో వచ్చిన ‘మ్యాడ్’ మూవీ ఎంత పెద్ద హిట్ అయ్యిందో అందరికి తెలిసిందే. నార్నె నితిన్ డెబ్యూ మూవీగా ఈ సినిమా ప్రేక్షకుల ముందుకొచ్చింది. సితార ఎంటర్టైన్మెంట్స్ బ్యానర్ పై నాగవంశీ ఈ సినిమాని నిర్మించి భారీ లాభాలు అందుకున్నారు. థియేటర్స్ తో పాటు ఓటీటీలో కూడా ఈ సినిమాకి మంచి ఆదరణ లభించింది.

ఇదిలా ఉంటే ఇప్పుడు మ్యాడ్ కి సీక్వెల్ గా ‘మ్యాడ్ 2’ తెరకెక్కుతోంది. కళ్యాణ్ శంకర్ దర్శకత్వంలోనే ఈ చిత్రం కూడా రెడీ అవుతోంది. మొదటి పార్ట్ లో ఉన్న లీడ్ యాక్టర్స్ అందరూ ఈ సీక్వెల్ లో కూడా ఉండబోతున్నారంట. మ్యాడ్ లో కాలేజ్ లైఫ్ ని చూపించిన కళ్యాణ్ శంకర్ ‘మ్యాడ్ 2’లో మాత్రం ముగ్గురు హీరోల ఫ్యామిలీ లైఫ్ లో ఫన్ రైడ్ ని తెరపై ఆవిష్కరించబోతున్నట్లు టాక్ వినిపిస్తోంది.

అవుట్ అండ్ అవుట్ ఎంటర్టైనర్ గానే ఈ సినిమాని కళ్యాణ్ శంకర్ సిద్ధం చేస్తున్నారు. సితార ఎంటర్టైన్మెంట్స్ లోనే ఈ మూవీ కూడా రెడీ అవుతోంది. ఇదిలా ఉంటే ఈ సినిమాలో ఓ స్పెషల్ సాంగ్ కోసం మలయాళీ బ్యూటీని సెలెక్ట్ చేసినట్లు తెలుస్తోంది. ఆమె మరెవరో కాదు, తెలుగులో శ్రీవిష్ణుకి జోడీగా ‘సామజవరగమన’లో నటించిన రెబ్బా మౌనిక జాన్. ఇదివరకే కొంతమంది పేరు చర్చల్లోకి వచ్చినప్పటికీ ఆమెనే ఫైనల్ చేసారంట. త్వరలో ఆమె పైన సాంగ్ ని చిత్రీకరించబోతున్నట్లు తెలుస్తోంది. అలాగే దీనికి సంబందించిన అఫీషియల్ ఎనౌన్స్ మెంట్ మేకర్స్ నుంచి రాబోతోందని టాక్.

నార్నె నితిన్ ‘మ్యాడ్’ తర్వాత ఆయ్ మూవీతో ఈ ఏడాది మరో బ్లాక్ బస్టర్ సక్సెస్ ని అందుకున్నాడు. నాలుగో చిత్రంగా ‘మ్యాడ్ 2’ రాబోతోంది. ఈ మూవీతో సక్సెస్ అందుకుంటే నార్నె నితిన్ కి యంగ్ హీరోగా మంచి క్రేజ్ వస్తుందని అనుకుంటున్నారు. ఎన్టీఆర్ బామ్మర్ది అనే గుర్తింపుతో నార్నె నితిన్ టాలీవుడ్ లోకి అడుగుపెట్టాడు. తారక్ కూడా నితిన్ కి సపోర్ట్ గా ఉన్నారు.

ఇక సితార ఎంటర్టైన్మెంట్స్ ని ‘లక్కీ భాస్కర్’ మూవీతో ఈ ఏడాది సూపర్ హిట్ వచ్చింది. ఏకంగా 100 కోట్లు కలెక్షన్స్ ని ఈ సినిమాతో అందుకున్నారు. అలాగే ‘దేవర’తో డిస్టిబ్యూటర్ కూడా కూడా మంచి లాభాలు అందుకున్నారు. సితార నుంచి వచ్చే ఏడాది ఎక్కువ సినిమాలు థియేటర్స్ లోకి రాబోతున్నారు. వాటిలో బాలయ్యతో చేసిన ‘డాకు మహారాజ్’ సంక్రాంతి రేసులో ప్రేక్షకుల ముందుకొస్తోంది.