టీవీ న‌టిని పెళ్లాడిన పాపుల‌ర్ క‌మెడియ‌న్
అత‌డు ప్రముఖ టీవీ సీరియల్ నటి సంగీతను వివాహం చేసుకున్నారు. ఈ హఠాత్ పెళ్లి వార్త అటు బుల్లితెర, ఇటు వెండితెర వర్గాలను ఆశ్చ‌ర్య‌ప‌రిచాయి
By: Tupaki Desk | 11 Dec 2023 4:50 AM GMT
నెల్సన్ దిలీప్‌కుమార్ దర్శకత్వం వహించిన డాక్టర్-జైలర్ వంటి కోలీవుడ్ చిత్రాలలో తన హాస్య పాత్రలతో పాపుల‌రైన రెడిన్ కింగ్స్లే తమిళ చిత్రసీమలో క‌మెడియ‌న్‌గా ఎదిగాడు. అత‌డు ప్రముఖ టీవీ సీరియల్ నటి సంగీతను వివాహం చేసుకున్నారు. ఈ హఠాత్ పెళ్లి వార్త అటు బుల్లితెర, ఇటు వెండితెర వర్గాలను ఆశ్చ‌ర్య‌ప‌రిచాయి. రెడిన్ కింగ్స్లీ సహచరుడు, ప్రముఖ నటుడు, నృత్యకారుడు సతీష్ నూతన వధూవరులకు తన హృదయపూర్వక శుభాకాంక్షలు తెలిపారు. ఇది సినిమా సెట్ కాదు. ఇది నిజం పెళ్లి! అంటూ సతీష్ వేడుక నుంచి ఒక ఫోటోను షేర్ చేసాడు. ఈ జంటకు అభిమానులు, వినోద పరిశ్రమ నుండి అభినందన సందేశాలు వస్తున్నాయి.
రెడిన్ కింగ్స్లే మొదట్లో అజిత్ 1998 చిత్రం 'అవల్ వరువాలా'లో డాన్సర్‌గా తనదైన ముద్ర వేసాడు, చెన్నై, బెంగళూరు వంటి నగరాల్లో ప్రోగ్రామ్ కోఆర్డినేటర్‌గా పనిచేసిన తర్వాత నటనలోకి ప్రవేశించాడు. నెల్సన్ దర్శకత్వం వహించిన 'కోలమావు కోకిల'లో నటుడిగా పరిచయం అయ్యాడు. అత‌డు తెర‌కెక్కించిన బీస్ట్ - జైలర్ చిత్రాల్లో ముఖ్య పాత్రలతో ఆక‌ట్టుకున్నాడు. తర్వాత అత‌డు వ‌రుస చిత్రాల్లో న‌టించాడు. నెట్టికన్, ఎల్‌కెజి, డాక్టర్, అన్నాత్తే, మృగం, నై శేఖర్ రిటర్న్స్, జైలర్ వంటి అనేక విజయవంతమైన చిత్రాలు ఉన్నాయి. నయనతార - సతీష్‌లతో కలిసి అన్నపూర్ణి వంటి ఇటీవలి హిట్ చిత్రాల్లో న‌టించాడు. సూర్య తదుపరి చిత్రం 'కంగువ'లోను రెడిన్ కనిపించబోతున్నాడు.
సీరియల్ నటి సంగీత ఇటీవ‌ల పెద్ద తెర‌పైనా రాణిస్తోంది. వివిధ మాధ్యమాలలో తన పాత్రలతో పాపుల‌రైన సంగీత 'మాస్టర్' చిత్రంలో విజయ్‌తో కలిసి కనిపించింది. LKG -పారిస్ జయరాజ్ వంటి చిత్రాలలో తనదైన న‌ట‌ప్రతిభతో ఆక‌ట్టుకుంది. సినిమాల‌తో అలాగే సన్ టీవీ సీరియల్స్ తో సంగీత‌కు మంచి పేరు వ‌చ్చింది. కాట్రుక్కు యెన్న వెలి -తిరుమగల్ వంటి టీవీ షోలలో సంగీత తనదైన ముద్ర వేసింది.
