హృతిక్ రోష‌న్‌పై ఆర్జీవీ సంచ‌ల‌న వ్యాఖ్య‌లు
ఇండస్ట్రీ అంతా కూడా అతడి గురించి అలాగే ఆలోచించిందని ఆ ఇంట‌ర్వ్యూలో ఆర్జీవీ పేర్కొన్నాడు.
By: Tupaki Desk | 5 May 2024 6:25 AM GMT
హృతిక్ రోషన్ 'కహో నా ప్యార్ హై'తో బాలీవుడ్ లో అరంగేట్రం చేసాడు. అప్పటి నుండి అతను తన కెరీర్‌లో చాలా ఎత్తుకు ఎదిగాడు. అయితే ఒకప్పుడు అతడి ప్ర‌తిభ‌పై సినీ పరిశ్రమ ప్ర‌ముఖుల‌కు అనుమానాలుండేవని, నిజానికి హృతిక్ తో సినిమా చేయాల‌ని ఎవరూ అనుకోలేదని ... హృతిక్ రోషన్ స్టార్ అవుతాడని మొదట్లో తాను నమ్మలేదని రామ్ గోపాల్ వర్మ అన్నారు. అందుకు సంబంధించిన ఒక పాత వీడియో ఇప్పుడు వైరల్ గా మారుతోంది. ఇండస్ట్రీ అంతా కూడా అతడి గురించి అలాగే ఆలోచించిందని ఆ ఇంట‌ర్వ్యూలో ఆర్జీవీ పేర్కొన్నాడు.
రామ్ గోపాల్ వర్మ తన యూట్యూబ్ వీడియోలో, ``నేను హృతిక్ రోషన్‌ను చూసినప్పుడు అతడు స్టార్ అవుతాడని నేను అనుకోలేదు. పరిశ్రమలోని చాలా మంది కూడా ఇది ఊహించ‌లేదు. దాని కారణంగా వారు అతడితో సినిమాకి సంతకం చేయలేదు. హృతిక్ మొదటి చిత్రం `కహో నా ప్యార్ హై` విడుదలకు ముందు, ఎవరూ అతడితో ప్రాజెక్ట్ కోసం మాట్లాడలేదు. ఒక్కసారి సూపర్‌స్టార్‌ అయ్యాక అందరూ అతడి వెంటే ఉన్నారు`` అని ఆర్జీవీ వ్యాఖ్యానించారు.
హృతిక్ రోషన్ కెరీర్ లో ప‌లు బ్లాక్ బ‌స్ట‌ర్ చిత్రాల్లో నటించాడు. క్రిష్ ఫ్రాంఛైజీ అతడి స్థాయిని అమాంతం పెంచింది. తన అద్భుత‌మైన న‌ట‌న, మిరాకిల్ అనిపించే డ్యాన్సుల‌తో అందరినీ ఆకట్టుకున్నాడు. ఇటీవల విడుదలైన ఫైటర్ తో మ‌రో చ‌క్క‌ని విజ‌యం అందుకున్నాడు. ప్రస్తుతం హృతిక్ వార్ 2లో న‌టిస్తున్నాడు. టాలీవుడ్ యంగ్ టైగ‌ర్ ఎన్టీఆర్ ఈ సినిమా సెట్స్ లో అతడితో జాయిన్ అయిన సంగ‌తి తెలిసిందే. హృతిక్- ఎన్టీఆర్ షూటింగులో ఉండ‌గా ఆన్ లొకేష‌న్ నుంచి తరచుగా ఫోటోలు లీక‌వుతున్నాయి. ఇలాంటి స‌మ‌యంలో ఆర్జీవీ కామెంట్ స‌ర్వ‌త్రా హాట్ టాపిక్ గా మారింది.
ప్రస్తుతం హృతిక్ రోషన్ తన త‌దుప‌రి చిత్రం క్రిష్ 4 పైనా ఫోక‌స్ చేస్తున్నాడు. ఈ ప్రాజెక్ట్ గురించి ఫైటర్ డైరెక్ట‌ర్ సిద్ధార్థ్ ఆనంద్ అధికారికంగా ప్ర‌క‌టించ‌గా స‌ర్వ‌త్రా ఆస‌క్తి నెల‌కొంది. హృతిక్ రోషన్ నటించిన క్రిష్ బాలీవుడ్‌లో అత్యంత విజయవంతమైన ఫ్రాంచైజీ చిత్రాలలో ఒకటి.
ఇలీవ‌ల రామ్ గోపాల్ వర్మ అమితాబ్ బచ్చన్ తో కలిసి దిగిన ఫోటో వైరల్ గా మారింది. ఏదైనా కొత్త సినిమా రూపొందుతోందా? అని అభిమానులు ఊహించారు. అయితే అధికారికంగా ఎలాంటి ప్ర‌క‌ట‌నా చేయలేదు కానీ వైరల్ ఫోటో ఎగ్జ‌యిట్ చేసింది. వీరిద్దరూ కలిసి ప‌ని చేసిన సర్కార్ సినిమా సూపర్ హిట్ అయింది. ఆర్జీవీ పొలిటిక‌ల్ డ్రామా వ్యూహం ఇంత‌కుముందు విడుదలైన సంగ‌తి తెలిసిందే.
