న‌టించ‌డం మానేశాన‌న్న రియా చ‌క్ర‌వ‌ర్తి

తన బాయ్‌ఫ్రెండ్, నటుడు సుశాంత్ సింగ్ రాజ్‌పుత్ మరణం తర్వాత తీవ్రమైన ఆటుపోట్ల‌ను ఎదుర్కొన్న రియా చక్రవర్తి ఇటీవల తాను సినిమాలు లేదా షోలలో నటించడం మానేసినట్లు వెల్ల‌డించారు. తన తాజా పోడ్‌కాస్ట్‌లో తన జీవితంలోని చాప్టర్ 2 గురించి చర్చించింది. మాజీ మిస్ యూనివర్స్ సుస్మితా సేన్ తో పోడ్ కాస్ట్ కార్య‌క్ర‌మంలో రియా ఎలాంటి అర‌మ‌రిక‌లు లేకుండా చాలా విష‌యాల‌ను షేర్ చేసారు. నేను ప్రవేశించిన ఏ గదిలోనైనా ధ్రువణం (పోల‌రైజింగ్) చేసే సూపర్ పవర్‌ను కలిగి ఉన్నట్లు భావించాన‌ని రియా పేర్కొంది.

అయితే నేను జీవనోపాధి కోసం ఏం చేస్తాను? అనే అయోమయంలో ప్ర‌జ‌లు ఉన్నారు. నేను సినిమాల్లో నటించను.. ఇతర పనులు చేస్తాను.. నేను ప్రేరణాత్మకంగా మాట్లాడతాను.. అవ‌స‌ర‌మైన‌ డబ్బును సంపాదిస్తాను! అని సుస్మితతో తన ఇంటరాక్షన్ సందర్భంగా రియా చెప్పింది.

2020లో సుశాంత్ మరణానంతరం రియా తీవ్రమైన‌ ట్రోలింగ్‌ను ఎదుర్కొంది. దివంగత నటుడు సుశాంత్ కోసం డ్రగ్స్ కొనుగోలు చేశారన్న ఆరోపణలపై సెప్టెంబర్ 2020లో రియా అరెస్టు అయింది. అక్టోబర్ 2020లో బెయిల్ మంజూరు కావడానికి ముందు బైకుల్లా జైలులో 28 రోజులు గడిపింది. క‌ష్టాలు ఎదురైనా కానీ అన్నిటి నుంచి బ‌య‌ట‌ప‌డింది. తన జీవితంలోని ఆ దశను దాటింది. ఇప్పుడు తన కొత్త సంస్కరణను ఆస్వాధిస్తోంది. రియా ఇలా చెప్పింది. ప్రతిఒక్కరికీ నా అధ్యాయం ఒకటి తెలుసు. దాని గురించి అంతా తమకు తెలుసని ఊహిస్తారు. నేను విభిన్న భావోద్వేగాలను అనుభవించే అనేక దశల గుండా ప్ర‌యాణించాను. చివ‌రికి నేను కొత్త వెర్షన్ గా మారాను. పునర్జన్మ లాగా నేను రెండవ అధ్యాయాన్ని కలిగి ఉన్న వారితో సెల‌బ్రేట్ చేయాలనుకుంటున్నాను. రెండవ అధ్యాయాన్ని కలిగి ఉండటం, మళ్లీ జీవితాన్ని కొత్త‌గా ప్రారంభించడం బాగుంది. ఈ మార్పును సెల‌బ్రేట్ చేయాల‌నుకుంటున్నాను అని రియా అన్నారు.

కష్టాలను ఓర్చుకుని ఇప్పుడు సానుకూల దృక్పథంతో ఉన్న రియా తన `సూపర్ పవర్`ని వెల్లడించింది. ``నాకు పెద్ద సూపర్ పవర్ ఉందని నేను తరచుగా జోక్ చేస్తుంటాను. నేను ఒక గదిలోకి ప్రవేశిస్తాను.. నేను దానిని ధ్రువపరచగలను! గ‌దిలోని స‌గం మంది ``ఆమె ఏదో చేసింది, మంత్రగత్తె.. చేతబడి చేస్తుంది!`` అని అనుకుంటారు.. అని అంది. గ‌దిలో స‌గం మంది మాత్రం పాజిటివ్ గా అనుకుంటారు. ఆమె బ‌ల‌మైన అమ్మాయి.. ధైర్యంగా పోరాడి నెగ్గింద‌ని మ‌ద్ధ‌తునిస్తార‌ని అంది.

రియా తన కెరీర్‌ను వీడియో జాకీగా ప్రారంభించింది. టీవీ షోలు, సినిమాల‌లో పని చేసింది. చివరిగా MTV రోడీస్ 19లో గ్యాంగ్ లీడర్‌గా కనిపించింది. రియా చ‌క్ర‌వ‌ర్తి తెలుగులో ఎం.ఎస్.రాజు త‌న‌యుడు సుమంత్ అశ్విన్ స‌ర‌స‌న తూనీగ తూనీగ చిత్రంలో న‌టించింది. మ‌హేష్ భ‌ట్ సినిమాల్లోను రియా న‌టించింది.