బాలీవుడ్ సెన్సేష‌న‌ల్ డైరెక్ట‌ర్ తో 'కాంతార' స్టార్

బాలీవుడ్ లో అద్భుత హిస్టారిక‌ల్ చిత్రాల రూప‌క‌ర్త‌గా అశుతోష్ గోవారిక‌ర్ పేరు మార్మోగింది. దర్శకుడు, నటుడు, స్క్రీన్ రైటర్, నిర్మాత.. ఇలా ఆల్ రౌండ‌ర్ ప‌నిత‌నం అతడి ప్ర‌త్యేక‌త‌. సంప‌న్నుల జీవితాల‌పై దృష్టి సారిస్తూ భారీ కాన్వాస్‌పై సినిమాలు తీయ‌డం ఆయ‌న విధానం. ముఖ్యంగా లగాన్ (2001), స్వదేశ్ (2004), జోధా అక్బర్ (2008), మొహెంజో దారో (2016) చిత్రాలతో అత‌డి పేరు ప్ర‌పంచ‌వ్యాప్తంగా మార్మోగింది.

అమీర్ ఖాన్ క‌థానాయ‌కుడిగా అశుతోష్ రూపొందించిన 'లగాన్' క్రికెట్ నేప‌థ్యంలో క్లాసీ స్టోరీతో రూపొందిన చిత్రం. ఇది 74వ అకాడమీ (ఆస్కార్) అవార్డ్స్‌లో ఉత్తమ విదేశీ భాషా చిత్రం విభాగంలో నామినేట్ అయింది. ఈ ఛాన్స్ అతడిని అకాడమీ అవార్డ్స్‌లో ఓటింగ్ సభ్యునిగా చేసింది. విమర్శకుల ప్రశంసలు పొందిన కామెడీ డ్రామా వెంటిలేటర్ (2016)లో ప్రధాన పాత్ర పోషించడం ద్వారా అతడు న‌టుడిగాను అల‌రించాడు. బాలీవుడ్ లో ఒక ప్ర‌త్యేక‌మైన జానర్ బ్లెండ్ సినిమాల రూప‌క‌ర్త‌గా ప‌నిమంతుడైన ద‌ర్శ‌కుడిగా అత‌డికి ప్ర‌త్యేక గౌర‌వం ఉంది.

అలాంటి ప్ర‌ముఖ ద‌ర్శ‌కుడితో ప‌ని చేసే ఆఫ‌ర్ రావ‌డం అంటే నిజంగా ఆ హీరో రొట్టె విరిగి నెయ్యిలో ప‌డ‌డ‌మే. ఇప్పుడు అలాంటి అదృష్టం వెతుక్కుంటూ వ‌చ్చింది కాంతార స్టార్ రిష‌బ్ శెట్టిని. కాంతార స‌క్సెస్ తో ఫుల్ జోష్ లో ఉన్న రిష‌బ్ ప్ర‌స్తుతం కాంతార 2 ని తెర‌కెక్కించేందుకు సిద్ధ‌మ‌వుతున్నాడు. ఇంత‌లోనే బాలీవుడ్ స్టార్ డైరెక్ట‌ర్ అశుతోష్ గోవారిక‌ర్ తో భారీ చిత్రంలో న‌టించే అవ‌కాశం వ‌రించింద‌ని క‌బురు అందింది. రిషబ్ శెట్టి త‌దుప‌రి పాన్ ఇండియా చిత్రం అశుతోష్ గోవారికర్‌తో అనేది శాండ‌ల్వుడ్ మీడియాలో అతిపెద్ద వార్త‌.

రిషబ్ ఇప్ప‌టికే అశుతోష్ తో క‌లిసి ప‌ని చేస్తున్నాడు. స్క్రిప్ట్ కోసం ఒక‌రికొక‌రు బాగా సహకరించుకున్నారు అని కూడా తెలిసింది. ఇద్దరూ ఇప్పుడు మొదటిసారిగా క‌లిసి ప‌ని చేయ‌బోతుండ‌డం రిష‌బ్ అభిమానుల్లో ఆస‌క్తిని పెంచుతోంది. స్క్రిప్ట్ లాక్ అయింద‌ని, మ‌రో రెండు నెలల్లో అశుతోష్ ఈ చిత్రాన్ని ప్రీ-ప్రొడక్షన్ దశకు తీసుకెళ్తారని క‌థ‌నాలొస్తున్నాయి. రిషబ్ 'కాంతార' రెండో భాగం చిత్రీక‌ర‌ణ‌ను పూర్తి చేసిన తర్వాత.. ఈ ప్రాజెక్ట్‌ను ప్రారంభిస్తారు. 2024 మిడిల్ లో సెట్స్ పైకి తీసుకువెళ‌తారు. ఇదిలా ఉండగా రిష‌బ్ స్వీయ‌ద‌ర్శ‌క‌త్వంలో రూపొందించిన కాంతార‌ విజయవంతంగా 100 రోజులు పూర్తి చేసుకుంది. కాంతార ప్రీక్వెల్‌ని అత‌డు ఘ‌నంగా ప్రకటించాడు. "మీరు చూసినది వాస్తవానికి పార్ట్ 2,.. పార్ట్ 1 వచ్చే ఏడాది వస్తుంది" అని రిష‌బ్ స్వ‌యంగా వెల్ల‌డించాడు.