లాక్ డౌన్‌లో స్టార్ హీరో డూప్ ధీన స్థితి

లాక్‌డౌన్‌ క్లిష్ట సమయాల్లో చాలామంది ప్ర‌జ‌లు ఆకలితో ఇబ్బందులు ఎదుర్కొన్నారు. తిన‌డానికి తిండి లేక, చేయ‌డానికి ప‌ని లేక నానా ఇబ్బందులు ప‌డ్డారు. అదే స‌మ‌యంలో ఆర్టిస్టులు బ‌తుకులు కూడా క‌నీస తిండికి లేని స్థితికి దిగ‌జారాయి. సోనూసూద్ స‌హా చాలా మంది స్టార్లు ఎవ‌రికి వారు తమ‌కు తోచిన మార్గాల్లో స‌హాయ‌స‌హ‌కారాలు అందించారు. అప్ప‌ట్లోనే సల్మాన్ ఖాన్ చేసిన ఒక సాయం ఇప్పుడు మీడియా ద్వారా వెలుగులోకి వ‌చ్చింది. షారూఖ్ ఖాన్ డోపెల్‌గ్యాంజర్‌కు స‌ల్మాన్ రూ. 2500 డ‌బ్బు, రేషన్ బియ్యాన్ని పంపి స‌హాయం అందించారు. నాటి సంఘ‌ట‌న‌కు సంబంధించి మ‌రింత‌గా వివ‌రాల్లోకి వెళితే..

బాలీవుడ్ స్టార్ల‌కు ప్రపంచవ్యాప్తంగా డోపెల్‌గాంజర్ (డూప్‌) లు ఉన్నారు. షారుఖ్ ఖాన్, స‌ల్మాన్ ఖాన్, అనుష్క శర్మ, ప్రియాంక చోప్రా, దీపికా పదుకొనే, అలియా భట్ ఇలా ప్ర‌తి ఒక్క‌రికీ డూప్‌లు ఇంటర్నెట్‌లో క‌నిపిస్తారు. వారిలో కొందరు తమ అభిమాన తారలను అనుకరిస్తూ జీవనోపాధిని పొందుతున్నారు. కొందరికి సినిమాల్లో బాడీ డబుల్‌గా పని చేసే అవకాశాలు కూడా లభిస్తున్నాయి.

దీని గురించి షారుఖ్ ఖాన్ డోపెల్‌గేంజర్ అయిన‌ రిజ్వాన్ ఖాన్ తాజా పాడ్ కాస్ట్ లో మాట్లాడారు. కరోనావైరస్ మహమ్మారి సమయంలో తన క‌ష్టం గురించి ఆయ‌న‌ ఓపెన‌య్యాడు. ఆ కష్ట సమయాల్లో సల్మాన్ ఖాన్ తనకు ఆర్థికంగా సహాయం చేశాడని రిజ్వాన్ తెలిపారు. అర్హాన్ ఖాన్ పోడ్‌కాస్ట్ యూట్యూబ్ ఛానెల్ 'డంబ్ బిర్యానీ' కొత్త ఎపిసోడ్‌లో SRK & బిగ్ బి లుక్‌లైక్‌లతో ఫాలోయింగ్ సంపాదించిన రిజ్వాన్ ఖాన్ తన కష్టాల‌ను ప్ర‌స్థావించారు.

లాక్ డౌన్ సమయంలో తన భార్య గర్భవతిగా ఉంది.. తన ఇంట్లో క‌నీస‌ రేషన్ కూడా లేని స్థితిలో ఉన్నాన‌ని రిజ్వాన్ గుర్తు చేసుకున్నాడు. నేను ఆ సంఘటనలను మ‌ర్చిపోలేకపోయాను. చేయ‌డానికి పని లేక‌పోవ‌డంతో పరిస్థితి మరింతగా దిగజారింది. నేను నా వస్తువులలో కొన్నింటిని అమ్మవలసి వచ్చింది! అని SRK డోపెల్‌గేంజర్ రిజ్వాన్ చెప్పారు. ఆ క‌ష్ట స‌మ‌యంలో సల్మాన్ ఖాన్ .. స్టార్ల‌ను పోలిన వారికి, ప్రతి సభ్యునికి రేషన్‌తో పాటు రూ. 2,500 పంపార‌ని అన్నారు. ఆ సంఘటన తర్వాత అతడి పరిస్థితి ఎలా మెరుగుపడిందో వివరిస్తూ ''దేవుని దయతో ఇప్పుడు నాకు 2 BHK ఫ్లాట్ ఉంది. మహమ్మారి సమయంలో నేను విక్రయించిన ప్రతిదీ ఇప్పుడు నా వద్ద ఉంది'' అని రిజ్వాన్ చెప్పాడు.

సల్మాన్ ఖాన్ చివరిసారిగా మనీష్ శర్మ దర్శకత్వం వహించిన టైగర్ జిందా హై (2017)కి సీక్వెల్ అయిన టైగర్ 3లో కనిపించాడు. 2023లో వచ్చిన ఈ చిత్రంలో సల్మాన్‌కి జోడీగా కత్రినా కైఫ్‌ నటించింది. ఇందులో షారూఖ్ ఖాన్ అతిథి పాత్ర‌లో క‌నిపించారు. త‌దుప‌రి స‌ల్మాన్ ఏ.ఆర్.మురుగదాస్ చిత్రం 'సికందర్‌'లో కనిపించనున్నాడు. ఇదిలా ఉండగా షారూఖ్ ఖాన్ చివరిసారిగా 2023లో రాజ్‌కుమార్ హిరాణీ చిత్రం డుంకీ తో విజ‌యం అందుకున్నాడు. త‌దుప‌రి కూతురు సుహానా ఖాన్‌తో కలిసి షారూఖ్ న‌టిస్తున్నారు.