వైరల్‌ : అర్దరాత్రి పోస్టర్స్‌ అంటించిన హీరో కమ్‌ నిర్మాత

సినిమా ఇండస్ట్రీలో ముఖ్యంగా టాలీవుడ్‌లో ఒక సినిమాను తీయడం ఈజీనే కానీ దాన్ని ప్రేక్షకుల ముందుకు తీసుకు వెళ్లడం అంత ఈజీ విషయం కాదు. ముఖ్యంగా చిన్న సినిమాల ప్రమోషన్‌ విషయంలో చాలా ఇబ్బందులు ఎదురు అవుతూ ఉంటాయి. మంచి కంటెంట్‌ ఉన్నా పబ్లిసిటీ చేయలేక పోతే జనాలు సినిమాకు వచ్చే పరిస్థితి ఉండదు. అందుకే చిన్న సినిమాలకు ఏదో విధంగా పబ్లిసిటీ చేసి జనాల దృష్టిని ఆకర్షించాలని చూస్తూ ఉంటారు. జబర్దస్త్‌ కమెడియన్‌ రాకింగ్‌ రాకేష్‌ ఇప్పుడు అదే చేస్తున్నాడు. తన 'కేసీఆర్‌' సినిమాను జనాలకు చూపించేందుకు చాలా కష్టపడుతున్నాడు.

ఈవారం ప్రేక్షకుల ముందుకు రాబోతున్న కేసీఆర్‌ (కేశవ చంద్ర రమావత్‌) సినిమా ప్రీ రిలీజ్ ఈవెంట్‌ తాజాగా జరిగింది. పలువురు జబర్దస్త్‌ కమెడియన్స్‌తో పాటు మాజీ మంత్రులు హరీష్ రావు, రోజాలు హాజరు అయ్యారు. సినిమా గురించి ఇప్పటికే జనాల్లో చర్చ జరుగుతోంది. తప్పకుండా సినిమాకి మంచి ఓపెనింగ్స్ దక్కుతాయని అంతా భావిస్తున్నారు. ఈ సినిమాలో రాకేష్ హీరోగా నటించడం మాత్రమే కాకుండా స్వయంగా నిర్మించాడు. ఈ సినిమా కోసం తన ఇల్లు తనకా పెట్టి మరీ డబ్బులు ఖర్చు చేశాను అంటూ రాకేష్ చెప్పాడు. ఈ సినిమా తమకు అత్యంత కీలకం అన్నాడు.

ఈ సినిమా ప్రమోషన్‌లో భాగంగా రాకేష్‌ చాలా పనులు చేస్తున్నారు. తాజాగా హైదరాబాద్‌ రోడ్ల మీద అర్ధరాత్రి తిరుగుతూ తన సినిమా పోస్టర్స్‌ను తానే స్వయంగా అంటించుకున్నాడు. సోషల్‌ మీడియాలో ప్రస్తుతం ఈ ఫోటోలు వైరల్‌ అవుతున్నాయి. నటుడిగానే కాకుండా నిర్మాతగానూ ఈ సినిమాను రాకేష్ చేసిన కారణంగా అదనపు బాధ్యత ఉంది. అందుకే పోస్టర్స్‌ను సైతం తానే అంటించుకుంటూ కష్టపడుతున్నారు. పబ్లిసిటీ కోసం అప్పుడప్పుడు ఇలా చేస్తూ ఉంటారు. రాకేష్ ఇలా చేయడం వైరల్‌ అయింది. ప్రస్తుతం ఫోటోలు, వీడియోలు సోషల్‌ మీడియాలో వైరల్‌ కావడంతో సినిమా గురించి చర్చ జరుగుతోంది.

జబర్దస్త్‌ ద్వారా గుర్తింపు దక్కించుకున్న రాకేష్‌ ఇటీవలే యాంకర్‌ సుజాతను వివాహం చేసుకున్నాడు. ఈ సినిమా నిర్మాణంలో ఆమె పాత్ర కూడా చాలా కీలకంగా ఉంది. రాకేష్‌తో కలిసి సుజాత సినిమా ప్రమోషన్‌లో పాల్గొంటుంది. ప్రస్తుతం తెలంగాణలో కాంగ్రెస్ ప్రభుత్వం ఉన్న సమయంలో కేసీఆర్‌ అంటూ సినిమాని తీసుకు రావడం కచ్చితంగా చాలా పెద్ద సాహసం అని చెప్పాలి. కేసీఆర్‌ అభిమానిగా ఈ సినిమాలో రాకేష్ కనిపించబోతున్నాడు. ట్రైలర్‌కి మంచి రెస్పాన్స్‌ దక్కిన నేపథ్యంలో సినిమా రాకేష్‌కి మంచి పేరును తెచ్చి పెట్టడంతో పాటు నిర్మాతగానూ లాభపడేలా చేస్తుంది అనే నమ్మకంను వ్యక్తం చేస్తున్నారు.