పుష్ప 2 క్రేజ్‌పై రోల్‌ రైడా ర్యాప్‌

అల్లు అర్జున్‌ పుష్ప 2 సినిమా గురించి దేశ వ్యాప్తంగా చర్చ జరుగుతోంది. బాలీవుడ్‌ సినిమాలను సైతం తలదన్నే స్థాయిలో పాపులారిటీని సొంతం చేసుకున్న పుష్ప 2 ప్రీ రిలీజ్ బిజినెస్‌ లెక్కలకి బాలీవుడ్‌ ఫిల్మ్‌ మేకర్స్ సైతం నోరు వెళ్లబెడుతున్నారు. రూ.1000 కోట్లకు పైగా ప్రీ రిలీజ్ బిజినెస్ చేసిన ఈ సినిమా బాక్సాఫీస్ వద్ద రూ.2000 కోట్లకు పైగా వసూళ్లు సాధించడం ద్వారా సంచలన విజయాన్ని సొంతం చేసుకోబోతుంది అంటూ అంతా నమ్మకంగా ఉన్నారు. గత కొన్ని సంవత్సరాలుగా పాతకు పోయి ఉన్న దంగల్‌, బాహుబలి 2 రికార్డులను బ్రేక్ చేయబోతున్న పుష్ప 2 అంటూ ఫ్యాన్స్ మాట్లాడుకుంటూ ఉన్నారు.

పుష్ప 2 సినిమాకు ఉన్న క్రేజ్‌ను క్యాష్ చేసుకునేందుకు అన్ని చోట్ల టికెట్ల రేట్లను పెంచుతూ భారీ ఓపెనింగ్స్‌పై బయ్యర్లు కన్ను వేశారు. అలాగే సినిమా గురించి సోషల్‌ మీడియా ద్వారా మాట్లాడుతూ, సినిమాకు సంబంధించిన విషయాలను గురించి చెప్పడం ద్వారా ఎంతో మంది యూట్యూబ్‌ ద్వారా పాపులారిటీని సొంతం చేసుకుంటున్నారు. అలాగే పుష్ప 2 సినిమా యొక్క క్రేజ్‌ను వివరిస్తూ ర్యాప్ సింగర్‌ రోల్‌ రైడా చేసిన ఐకాన్ స్టార్‌ పాట ప్రస్తుతం అందరి దృష్టిని ఆకర్షస్తోంది. తెలుగు ర్యాప్‌ సింగర్‌గా మంచి గుర్తింపు దక్కించుకున్న రోల్‌ రైడా ఇప్పుడు పుష్ప 2 కి ఉన్న బజ్‌ నేపథ్యంలో ఈ పాటను విడుదల చేయడం జరిగింది.

అల్లు అర్జున్ ఫ్యాన్స్ తరపున ఈ పాట రూపొందించినట్లు ఆయన చెబుతున్నారు. పుష్ప 2లోకి కొన్ని ట్రైలర్ షాట్స్, పాటల షాట్స్‌ను తీసుకుని వీడియోను క్రియేట్‌ చేయడం జరిగింది. వీడియోలోని బన్నీ షాట్స్‌తో పాటు, పుష్ప 2 విజువల్స్ సినిమాపై మరింతగా అంచనాలు పెంచుతున్నాయి. సినిమాకు ఉన్న బజ్‌ ఏ పాటిదో ఈ పాటను చూస్తే అర్థం అవుతుందని కొందరు కామెంట్స్ చేస్తున్నారు. ప్రవీణ్ లక్కరాజు సంగీతం అందించిన ఈ పాటకు శ్రీజో, రోల్‌ రైడా సాహిత్యం అందించారు. అల్లు అర్జున్‌ పుష్ప 2 కి రోల్‌ రైడా ఐకాన్‌ స్టార్‌ మంచి బహుమానం అనే అభిప్రాయం వ్యక్తం అవుతోంది.

సుకుమార్‌ దర్శకత్వంలో రూపొందిన పుష్ప 2 సినిమాకి ఇప్పటికే బీహార్‌, తమిళనాడులో భారీ ఈవెంట్స్ జరిగాయి. నభూతో అన్నట్టుగా ఆ ఈవెంట్స్ జరిగిన విషయం తెల్సిందే. ముఖ్యంగా పాట్నాలో జరిగిన ఈవెంట్‌ రచ్చ రచ్చ అన్నట్లుగా సాగింది. దాదాపు రెండు లక్షల మంది బన్నీ ఫ్యాన్స్ హాజరు అయ్యారు. హైదరాబాద్‌లోని పోలీస్ గ్రౌండ్స్‌లో భారీ ఈవెంట్‌కు ఏర్పాట్లు జరుగుతున్నాయి. అందుకు సంబంధించిన అధికారిక ప్రకటన త్వరలో వచ్చే అవకాశాలు ఉన్నాయి. ఇటీవల విడుదల అయిన కిస్సిక్‌ ఐటం సాంగ్‌కి మంచి స్పందన వచ్చింది. డిసెంబర్‌ 5న ప్రపంచ వ్యాప్తంగా విడుదల కాబోతున్న పుష్ప 2 ఏ స్థాయి విజయాన్ని సొంతం చేసుకుంటుందో చూడాలి.