'రోటీ కపడా రొమాన్స్' ట్రైలర్.. మరో హుషారు అవుతుందా?

హుషారు, సినిమా చూపిస్త మావ, మేం వయసుకు వచ్చాం, ప్రేమ ఇష్క్ కాదల్, పాగల్ వంటి యూత్ ఫుల్ మూవీస్ టాలీవుడ్ సినీ ప్రియులకు ఇప్పటికే అలరించిన విషయం తెలిసిందే. ఆ సినిమాలను నిర్మించిన ప్రముఖ నిర్మాత, లక్కీ మీడియా అధినేత బెక్కెం వేణుగోపాల్ ఇప్పుడు మరో మూవీని రూపొందిస్తున్నారు. సృజన్ కుమార్ బొజ్జంతో కలిసి రోటి కపడా రొమాన్స్ చిత్రాన్ని నిర్మిస్తున్నారు. విక్రమ్ రెడ్డి దర్శకత్వం వహిస్తున్నారు.

హర్ష నర్రా, సందీప్ సరోజ్, తరుణ్, సుప్రజ్ రంగా, సోనూ ఠాకూర్, నువ్వేక్ష, మేఘ లేఖ, ఖుష్బూ చౌదరి హీరో హీరోయిన్లుగా నటిస్తున్నారు. ఇప్పటికే సినిమా నుంచి మేకర్స్ రిలీజ్ చేసిన టీజర్.. సినీ ప్రియులను ఆకట్టుకుంది. యూత్ ను ముఖ్యంగా మెప్పించింది. ఇప్పుడు అదే జోష్ తో ట్రైలర్ ను రిలీజ్ చేశారు. సెలబ్రేట్ విత్ లవ్, బ్రొమాన్స్, రొమాన్స్ అంటూ బుధవారం విడుదల చేశారు. నవంబర్ 22వ తేదీన సినిమా థియేటర్లలో సందడి చేయనున్నట్లు వెల్లడించారు.

'ఈరోజు రేపు చెడ్డీ నుంచి ప్యాంట్ వేసుకున్న ప్రతి ఒక్కడి టార్గెట్ అమ్మాయిలు.. ఒకప్పుడు జిందగీ అంటే రోటీ కపడా మకాన్.. ఇప్పుడు రోటీ కపడా రొమాన్స్..' అంటూ బ్యాక్ గ్రౌండ్ డైలాగ్ తో ట్రైలర్ స్టార్ట్ అయింది. నలుగురు ఫ్రెండ్స్ ను రివీల్ చేశారు. వారంతా ఫుల్ గా ఎంజాయ్ చేస్తుంటారు. వారంతా ఒక్కొక్కరు ఒక్కో అమ్మాయిని లవ్ చేస్తారు. వారితో కలిసి ఔటింగ్స్ కు వెళ్తుంటారు. రొమాన్స్ లో మునిగితేలుతుంటారు. ఆ తర్వాత ట్రైలర్ ఎమోషనల్ మోడ్ లోకి వెళ్లింది.

నాలుగు జంటల మధ్య చిన్న డిస్ట్రబెన్సెస్ వస్తాయి. ఆ తర్వాత ఏమైంది.. వారి లవ్ స్టోరీస్ ఏమయ్యాయి.. బ్రేకప్ తో ఆగిపోయారా.. చివరకు కలిశారా లేదా అన్నది పూర్తి సినిమాగా తెలుస్తోంది. ట్రైలర్ అంతా ఫన్నీగా సాగుతూ ఆకట్టుకుంటోంది. డైలాగ్స్ క్రేజీగా ఉన్నాయి. సినిమా అంతా నేచురల్ గా షూట్ చేసినట్లు కనిపిస్తోంది. హుషారు లాంటి మరో మంచి యూత్ ఫుల్ ఎంటర్టైనర్ గా రోటీ కపడా రొమాన్స్ మూవీ నిలిచేలా ఉన్నట్లు ట్రైలర్ హామీ ఇస్తోంది. ప్రస్తుతం ట్రైలర్ సోషల్ మీడియాలో వైరల్ గా మారింది.

ఇక సినిమా విషయానికొస్తే.. ఆర్ట్ డైరెక్టర్ గా కిరణ్ మామిడి, కొరియోగ్రాఫర్ గా జేడీ మాస్టర్, కాస్ట్యూమ్ డిజైనర్ గా అశ్వంత్‌ భైరి, ప్రతిభా రెడ్డి, అసోసియేట్ ప్రొడ్యూసర్ గా నాగార్జున వడ్డె వ్యవహరిస్తున్నారు. హర్ష వర్థన్ రామేశ్వర్, ఆర్ ఆర్ ధ్రువన్, వసంత్ సంగీతం సమకూరుస్తున్నారు. క్రిష్ణ కాంత్, కాసర్ల శ్యామ్, రఘురామ్ సాహిత్యాన్ని అందిస్తున్నారు. ఎడిటింగ్ బాధ్యతలను విజయ్ వర్ధన్ పర్యవేక్షిస్తున్నారు. మరి రోటీ కపడా రొమాన్స్ మూవీ ఎలా అలరిస్తుందో చూడాలి.