'ఆర్‌ఆర్‌ఆర్‌' సీక్వెల్‌ రాజమౌళి సినిమా కాదు...!

టాలీవుడ్‌ జక్కన్న రాజమౌళి దర్శకత్వం లో వచ్చి సెన్షేషనల్ సక్సెస్ ను దక్కించుకున్న 'ఆర్‌ఆర్‌ఆర్' సినిమా వెయ్యి కోట్లకు పైగా వసూళ్లు నమోదు చేసిన విషయం తెల్సిందే. రికార్డ్‌ బ్రేకింగ్‌ వసూళ్లు నమోదు చేసిన ఆర్‌ఆర్‌ఆర్‌ సినిమా కు సీక్వెల్‌ వస్తుంది అంటే ప్రతి ఒక్క ఇండియన్ ప్రేక్షకుడు కూడా ఆసక్తి కనబరచడం ఖాయం.

ఆస్కార్‌ ను ఇండియాకు తీసుకు వచ్చిన ఆర్ఆర్ఆర్ సినిమా కు సీక్వెల్‌ ను రూపొందించే పని లో ఉన్నామని ఆ మధ్య ఈ చిత్ర రచయిత కమ్‌ రాజమౌళి తండ్రి విజయేంద్ర ప్రసాద్‌ అన్నారు. సినిమా సీక్వెల్‌ స్క్రిప్ట్‌ చర్చలు జరుగుతున్నాయి అంటూ ఆయన పేర్కొనడంతో మహేష్ బాబు తో సినిమా పూర్తి అయిన వెంటనే రాజమౌళి ఆర్ఆర్ఆర్ రీమేక్ మొదలు పెట్టే అవకాశాలు ఉన్నాయని అంతా అనుకున్నారు.

ఆర్ఆర్‌ఆర్ సినిమా సీక్వెల్‌ గురించి ప్రస్తుతం ఆసక్తికర పుకారు ఒకటి సోషల్‌ మీడియా లో షికారు చేస్తోంది. ఈ సీక్వెల్‌ కు రాజమౌళి కాకుండా విభిన్న చిత్రాల దర్శకుడిగా పేరు దక్కించుకున్న చంద్రశేఖర్ యేలేటి దర్శకత్వం వహించే అవకాశాలు ఉన్నాయి అంటున్నారు. ఆయన దర్శకత్వంలో సీక్వెల్‌ ఏంటా అంటూ చాలా మంది నోరు వెళ్లబెడుతున్నారు.

ఈ ప్రచారం ఎలా ప్రారంభం అయింది.. ఎక్కడి నుంచి పుట్టుకు వచ్చిందో తెలియదు కానీ ఇది ఎంతవరకు సాధ్యమో అంటూ అంతా ఆసక్తిగా చర్చించుకుంటున్నారు. ఆర్ఆర్ఆర్ సీక్వెల్‌ అంటే రామ్ చరణ్‌, ఎన్టీఆర్‌ లు ఉండాల్సిందే. ఒక వేళ చంద్రశేఖర్ యేలేటి సీక్వెల్‌ కు దర్శకత్వం వహిస్తే వారిద్దరు నటించేందుకు ఓకే చెప్తారా అనేది అనుమానం.

ఆర్ఆర్ఆర్‌ సీక్వెల్ ను చరణ్‌, ఎన్టీఆర్ లేకుండా చేస్తారా అనే అనుమానాలు కూడా మొదలు అయ్యాయి. చంద్రశేఖర్‌ యేలేటి దర్శకత్వంలో సినిమా కనుక హీరోల మార్పు ఉండవచ్చు. ప్రస్తుతానికి సోషల్‌ మీడియా లో ఆసక్తిగా చర్చ జరుగుతున్న ఈ సీక్వెల్‌ పై మరింత స్పష్టత ఎప్పటికి వస్తుందో చూడాలి.