డబుల్ ఇస్మార్ట్ డౌట్స్.. మరోసారి క్లారిటీ ఇచ్చేశారు

పూరి జగన్నాథ్ దర్శకత్వంలో రామ్ పోతినేని నటిస్తున్న 'డబుల్ ఇస్మార్ట్' సినిమాపై కొన్ని రూమర్స్ ప్రస్తుతం సోషల్ మీడియాలో చక్కర్లు కొడుతున్నాయి. ఆగస్టు 15న విడుదల కావాల్సిన ఈ చిత్రం వాయిదా పడుతుందనే వార్తలు షికార్లు చేస్తుండగా, ఈ విషయంపై చిత్రబృందం క్లారిటీ ఇచ్చింది. ఇప్పటికే సినిమాకు సంబంధించిన ప్రమోషన్స్ స్టార్ట్ చేసిన మేకర్స్ ముంబై లో కూడా ఆడియెన్స్ ను ఆకట్టుకునేలా ప్రెస్ మీట్స్ నిర్వహించారు.

అలాగే సినిమాకు సంబంధించిన సాంగ్స్ విడుదల చేయగా పాజిటివ్ రెస్పాన్స్ అందుతోంది. రీసెంట్ గా ట్రైలర్ విడుదల చేసిన విషయం తెలిసిందే. ఇక రిలీజ్ కు సమయం దగ్గరపడుతున్న సందర్భంలో ఒక్కసారిగా రిలీజ్ వాయిదా అనే పుకార్లు స్టార్ట్ అయ్యాయి. వివిధ కారణాల వలన చిత్ర యూనిట్ సినిమాను వచ్చే నెలకు వాయిదా వేస్తోందని కూడా కథనాలు వచ్చాయి.

ఇక ఫైనల్ చిత్రబృందం ఈ రూమర్స్ కు చెక్ పెట్టె ప్రయత్నం చేసింది. 'డబుల్ ఇస్మార్ట్' వాయిదా విషయం పూర్తిగా నిరాధారం అని, అవన్నీ వట్టి పుకార్లేనని స్పష్టం చేశారు. ఈ సందర్భంగా అభిమానులకు ఒక విజ్ఞప్తి కూడా చేశారు. "వీలైనంతవరకు ఇలాంటి నిరాధారమైన, ఫేక్ న్యూస్‌లను నమ్మవద్దు" అంటూ విజ్ఞప్తి చేశారు.

సినిమా యూనిట్ తెలిపిన వివరాల ప్రకారం, అన్ని పనులు సవ్యంగా సాగుతున్నాయి. అనుకున్న తేదీకే అంటే ఆగస్టు 15న, ఈ చిత్రం గ్రాండ్ రిలీజ్ కోసం సిద్ధంగా ఉందని తెలిపారు. అభిమానులు థియేటర్లలో వచ్చే మాస్ ఎఫెక్ట్‌కు సిద్ధం కావాలని సూచించారు. ఇస్మార్ట్ శంకర్' సక్సెస్ తర్వాత, పూరి జగన్నాథ్ – రామ్ కాంబినేషన్‌లో వస్తున్న మరో భారీ ప్రాజెక్ట్ కావడంతో ఈ చిత్రంపై భారీ అంచనాలు నెలకొన్నాయి.

ఇటీవలే విడుదలైన ట్రైలర్, సాంగ్స్‌కు మంచి స్పందన రావడంతో ఈ చిత్రం విడుదలపై మరింత ఆసక్తి నెలకొంది. రామ్ పోతినేని కెరీర్‌లో మరో మైలురాయిగా నిలవబోతున్న ఈ చిత్రం అన్ని వర్గాల ప్రేక్షకులను మెప్పించే విధంగా ఉండనుందని చిత్రబృందం విశ్వాసం వ్యక్తం చేసింది. సినిమాలో బాలీవుడ్ స్టార్ యాక్టర్ సంజయ్ దత్ కీలక పాత్రలో నటించారు. కావ్య తప్పర్ రామ్ కు జోడిగా నటించింది. మరి సినిమా పాన్ ఇండియా మార్కెట్ లో ఎంతవరకు ఇంపాక్ట్ క్రియేట్ చేస్తుందో చూడాలి.