సలార్ vs డంకీ.. మెగా హీరో ఏమన్నారంటే..

సినీ ఇండస్ట్రీలోకి హీరోగా ఎంట్రీ ఇచ్చిన నుంచి విభిన్నమైన కథలు ఎంచుకుంటూ ప్రేక్షకులను అలరిస్తున్నారు మెగా మేనల్లుడు సాయి ధరమ్ తేజ్. హిట్టు ఫ్లాపులతో సంబంధం లేకుండా వరుస సినిమాలు చేస్తూ కెరీర్ లో దూసుకెళ్తున్నారు. తాజాగా ఆయన చేసిన ఓ సోషల్ మీడియా పోస్ట్ వైరల్ గా మారింది. ఇంతకీ ఆయనేం పోస్ట్ పెట్టారంటే

సినిమా గెలుస్తోంది అంటూ సాయిధరమ్ తేజ్ పెట్టిన పోస్ట్ ప్రస్తుతం మెగా అభిమానులతో పాటు సినీ ప్రియులను తెగ ఆకట్టుకుంటోంది. "తెలుగు సినిమా త‌న విజయవంతమైన ప్ర‌యాణంలో నేడు ఉన్న‌త‌స్థితికి చేరుకుంది. మ‌న తెలుగు సినిమా స‌లార్ ఈరోజు షారుక్ ఖాన్ డంకీ, హాలీవుడ్ ఫిల్మ్ అక్వామెన్‌తో స‌మాన‌మైన క్రేజ్‌తో రిలీజ్ అవ్వ‌డం ఎంతో సంతోషంగా, గ‌ర్వంగా ఉంది.

మూడు అగ్ర సినీ ప‌రిశ్ర‌మ‌లు ఒకే స‌మ‌యాన ప్రేక్ష‌కుల‌కు అద్భుత‌మైన సినిమాటిక్ అనుభూతి ఇచ్చేందుకు సిద్దం కావ‌డం గొప్ప విష‌యం. అన్నింటి కంటే ఈ రోజు సినిమా చాలా అగ్ర‌స్థాయిలో ఉన్న ఫీల్ క‌లుగుతుంది. ఈ అనుభూతి క‌ల‌గ‌డానికి కార‌ణ‌మైన ప్ర‌తి ఒక్క‌రికీ నా ధ‌న్య‌వాదాలు.

డంకీ చిత్రంతో వ‌రుస‌గా మూడు స‌క్సెస్‌ల‌తో హ్య‌ట్రిక్ సాధించిన షారుక్ సార్‌.. యువ‌ర్ క‌మ్ బ్యాక్ ఈజ్ సో గ్రేట్‌. స‌లార్‌తో వెండితెర‌పై ఫైర్ క్రియేట్ చేయ‌డానికి సిద్దమైన ప్ర‌భాస్ అన్న‌కు, అక్వామెన్ సినిమాకు నా బెస్ట్ ఆఫ్ ల‌క్‌. సినిమా గెలుస్తోంది" అంటూ సాయిధ‌ర‌మ్ తేజ్ ట్వీట్ చేశారు.

పిల్లా నువ్వులేని జీవితంతో ఇండస్ట్రీలోకి ఎంట్రీ ఇచ్చారు తేజ్. ఆ తర్వాత రేయ్ ఫ్లాపైనా.. సుబ్రమణ్యం ఫర్ సేల్, సుప్రీం లాంటి విజయాలు అది కనబడకుండా చేశాయి. కానీ ఆ తర్వాతే అసలు సినిమా మొదలైంది. హ్యాట్రిక్ తో జోరు మీదున్న ఆయనకు ఏకంగా డబుల్ హ్యాట్రిక్ ఫ్లాపులు వచ్చాయి.

తిక్క, విన్నర్, నక్షత్రం, జవాన్, ఇంటిలిజెంట్, తేజ్ ఐ లవ్ యు సినిమాలు నిరాశ పరిచాయి. అదే సమయంలో చిత్రలహరి, ప్రతిరోజూ పండగే, సోలో బ్రతుకే సో బెటర్ సినిమాలతో కమ్ బ్యాక్ ఇచ్చారు. రిపబ్లిక్ మూవీ ఫ్లాపైనా నటుడిగా తేజ్‌ మంచి పేరు సంపాందిచారు.

2021 సాయి ధరమ్ తేజ్ జీవితంలో ఊహించని కుదుపు రోడ్ యాక్సిడెంట్. త్రుటిలో ప్రమాదం నుంచి బయటపడ్డ ఈయన.. గతేడాది విరూపాక్షతో బ్లాక్‌బస్టర్ అందుకున్నారు. ఆతర్వాత పవన్ తో బ్రో పవన్‌తో నటించారు. ప్రస్తుతం సంపత్ నందితో గాంజా శంకర్‌గా చేస్తున్నారు. దీంతో పాటు మరో మూడు సినిమాలను లైన్ లో పెట్టారు.