సైఫ్ దాడి కేసు: నిందితుడి న్యాయవాది షాకింగ్ వాదన

బాలీవుడ్ స్టార్ హీరో సైఫ్ అలీఖాన్ కేసు ముంబై పోలీసుల చొర‌వ‌తో పురోగ‌తి సాధిస్తోంది. దాడి అనంత‌రం దాదాపు 70 గం.ల పాటు వేటాడిన పోలీసులు ఎట్ట‌కేల‌కు నిందితుడిని ప‌ట్టుకోగ‌లిగారు. అత‌డిని అరెస్ట్ చేసి కోర్టులో ప్ర‌వేశ‌పెట్టారు. థానేలో పట్టుబడిన మొహమ్మద్ షరీఫుల్ ఇస్లాం షెహజాద్ మొదట బంగ్లాదేశ్ జాతీయుడని భావించారు. అరెస్టు తర్వాత అతడిని కోర్టులో హాజరుపరిచారు. కోర్టు నిందితుడిని ఐదు రోజుల పోలీసు కస్టడీకి అనుమతించింది. ఇప్పుడు అత‌డి త‌ర‌పు న్యాయవాది ``అతడు బంగ్లాదేశ్ నుండి వచ్చాడని పోలీసుల వద్ద ఎటువంటి ఆధారాలు లేవు`` అని వాదించారు.

ఈ కేసులో కీల‌క‌ నిందితుడు మొహమ్మద్ షరీఫుల్ ఇస్లాం షెహజాద్ న్యాయవాది సందీప్ షెహజాద్ కోర్టు 5 రోజుల పోలీసు కస్టడీని మంజూరు చేసిందని, ఈ గ‌డువు లోపు నివేదికను సమర్పించాలని పోలీసులను ఆదేశించిందని పేర్కొన్నారు. నిందితుడు బంగ్లాదేశీయుడనే వాదనకు ఆధారాలు లేవని షెహజాద్ వాదించారు. అతడు ఆరు నెలల క్రితం ముంబైకి వచ్చాడనే ఆరోప‌ణ స‌రికాద‌ని, అత‌డు తన కుటుంబంతో ఏడు సంవత్సరాలకు పైగా ముంబైలో నివసిస్తున్నాడని లాయ‌ర్ అన్నారు. సరైన దర్యాప్తు లేకపోవడంతో సెక్షన్ 43ఏ ఉల్లంఘనకు పాల్పడ్డారని కూడా ఆరోపించారు.

సైఫ్ అలీ ఖాన్ త‌న‌ను బెదిరింపుల‌కు గురి చేసార‌నే ప్రకటనలు చేయలేదని, ఎటువంటి ఫిర్యాదులు చేయలేదని నిందితుడి తరపు న్యాయవాది పేర్కొన్నారు. అది బంగ్లాదేశ్ లేదా మరే ఇతర దేశం నుండి అయినా కావచ్చు. సైఫ్‌కు సంబంధించిన అంతర్జాతీయ కేసులు ఏవీ లేవని లాయ‌ర్ వివరించారు. నిందితుడి జాతీయత కారణంగా ఈ కేసు ప్ర‌జ‌ల దృష్టిని మ‌ర‌ల్చింద‌ని, ఎందుకంటే అతడు నిజానికి బంగ్లాదేశీయుడు అయినా కానీ, చాలా కాలంగా తన కుటుంబంతో భారతదేశంలో నివసిస్తున్నాడని షెఖానే పేర్కొన్నారు.

సైఫ్ అలీ ఖాన్ ప్రస్తుతం ప్రమాదం నుండి బయటపడ్డాడు. ఆస్ప‌త్రిలో కోలుకుంటున్నాడు. ఈ రోజు తెల్లవారుజామున కరీనా కపూర్ ఖాన్ పిల్లలు తైమూర్ అలీ ఖాన్ , జెహ్ అలీ ఖాన్‌లతో కలిసి తన భర్తను కలవడానికి లీలావతి ఆసుపత్రికి వచ్చారు. అయితే దాడి అనంత‌రం సైఫ్ అలీఖాన్ త‌న ఏడేళ్ల కుమారుడు తైమూర్ అలీఖాన్ సాయంతో ఆటోలో ఆస్ప‌త్రికి చేరుకున్నార‌ని క‌థ‌నాలొచ్చాయి. కానీ తైమూర్ ఇప్పుడు త‌న త‌ల్లి క‌రీనాతో క‌లిసి వ‌చ్చాడ‌ని మాత్ర‌మే హిందీ మీడియాలు క‌థ‌నాలు వేయ‌డం ఆశ్చ‌ర్య‌ప‌రుస్తోంది.