నా సినిమా సేఫ్.. నాని సవాల్‌పై డైరెక్టర్ వివరణ!
‘హిట్’ సిరీస్ డైరెక్టర్ శైలేష్ కొలను ‘కోర్టు’ ప్రీమియర్ వీక్షించిన తర్వాత తన అభిప్రాయాన్ని సోషల్ మీడియాలో పంచుకున్నారు.
By: Tupaki Desk | 13 March 2025 12:40 PM IST
తెలుగు సినిమా పరిశ్రమలో ప్రయోగాత్మక కథల కోసం ఎప్పుడూ ముందుంటూ, వైవిధ్యమైన చిత్రాలను సమర్పించడంలో నేచురల్ స్టార్ నాని ప్రత్యేకంగా నిలుస్తున్నాడు. నాని నిర్మించిన ‘కోర్టు’ మూవీపై ఆయన పెట్టుకున్న నమ్మకం ఇప్పుడు అందరి దృష్టిని ఆకర్షిస్తోంది. ఈ సినిమా ప్రియదర్శి, హర్ష్ రోషన్, శ్రీదేవి, శివాజీ ప్రధాన పాత్రల్లో తెరకెక్కగా, దీప్తి గంట, ప్రశాంతి త్రిపిరినేని నిర్మాణంలో, రామ్ జగదీష్ దర్శకత్వంలో రూపుదిద్దుకుంది. మార్చి 14న థియేటర్లలో విడుదల కానున్న ఈ సినిమాకు నాని ప్రత్యేకంగా ప్రమోషన్ చేస్తున్నారు.
ఇటీవల జరిగిన ప్రీ రిలీజ్ ఈవెంట్‌లో నాని చేసిన వ్యాఖ్యలు పెద్ద చర్చకు దారి తీశాయి. "ఈ సినిమా నచ్చకపోతే, నా ‘హిట్ 3’ సినిమాను చూడక్కర్లేదు" అంటూ తాను ఈ చిత్రంపై ఎంత నమ్మకం పెట్టుకున్నాడో వెల్లడించాడు. నాని చెప్పిన ఈ మాటలు సినీ ప్రియులలో ఆసక్తిని రేకెత్తించగా, ఇప్పుడు సినిమా మీద ఉన్న హైప్‌ను మరింత పెంచేలా దర్శకుడు శైలేష్ కొలను ట్వీట్ చేశారు.
‘హిట్’ సిరీస్ డైరెక్టర్ శైలేష్ కొలను ‘కోర్టు’ ప్రీమియర్ వీక్షించిన తర్వాత తన అభిప్రాయాన్ని సోషల్ మీడియాలో పంచుకున్నారు. సోషల్ మీడియాలో "నా సినిమా సేఫ్" అంటూ మొదలుపెట్టి, సినిమా గురించి గొప్ప అభిప్రాయాన్ని వ్యక్తం చేశారు. "కోర్ట్ ఒక భావోద్వేగంగా నడిచే చిత్రం. ప్రతి ఒక్కరికీ ఇది తప్పకుండా చూడాల్సిన సినిమా. ఎందుకంటే ఇది మనందరికీ చాలా విషయాలను అందిస్తుంది. ఈ సినిమాకు భాగస్వామిగా ఉండటం గర్వంగా ఉంది" అని అన్నారు.
అంతేకాదు, "నా మిత్రుడు నాని, నిర్మాత ప్రశాంతి, దర్శకుడు జగదీష్, హీరో ప్రియదర్శి అందరికీ శుభాకాంక్షలు. ప్రియదర్శి కెరీర్‌లో మరో అద్భుతమైన పాత్ర ఇది" అని ప్రశంసించారు. చివరగా "ఇప్పుడు మళ్లీ ఎడిట్ రూమ్‌లోకి వెళ్తున్నా. అందరూ కోర్టు సినిమా చూడండి" అంటూ తన ట్వీట్‌ను ముగించారు. నాని చేసిన సవాల్‌కు ‘కోర్టు’ సినిమాను చూసిన తర్వాత దర్శకుడు శైలేష్ కొలను ఇచ్చిన సమాధానం ఇది.
కోర్టు సినిమా మంచి కథ, బలమైన ఎమోషన్లతో కూడిన చక్కని సినిమా అని ఆయన ట్వీట్‌లో స్పష్టంగా వెల్లడించారు. ఇప్పటికే సినీ వర్గాలు, మీడియా ప్రముఖులు సినిమా గురించి అద్భుతమైన రివ్యూలు ఇస్తుండటంతో, ప్రేక్షకుల స్పందన ఎలా ఉంటుందనేది ఆసక్తిగా మారింది. ‘కోర్టు’ సినిమాపై వచ్చిన ప్రస్తుత స్పందన చూస్తే, నాని పెట్టుకున్న నమ్మకం ఫలించిందనే అనిపిస్తోంది. సినిమా విడుదలైన తర్వాత ప్రేక్షకులు ఎలాంటి తీర్పు ఇస్తారో చూడాలి.