సాయి పల్లవి.. ఇచ్చి పడేసిందిగా..

గతంలో ‘విరాటపర్వం’ సినిమా రిలీజ్ సమయంలో హింస గురించి తన దృక్పథాన్ని సాయి పల్లవి ఓ ఇంటర్వ్యూలో పంచుకుంది. అయితే దీనిని కొంత ఎడిట్ చేసి సోషల్ మీడియాలో ఇప్పుడు సాయిపల్లవిని బాయ్ కట్ చేయాలంటూ కొంతమంది పోస్టులు పెట్టడం మొదలెట్టారు. ఇండియన్ ఆర్మీని సాయి పల్లవి ఉగ్రవాదులతో పోల్చిందని విమర్శలు చేస్తూ వీడియోలు చేశారు. పూర్తి వీడియో వినకుండానే కొద్ది రోజులుగా విపరీతంగా ట్రోల్ చేస్తున్నారు. ‘రామాయణం’ నుంచి కూడా సాయి పల్లవిని తప్పించాలని డిమాండ్ చేస్తున్నారు.

అయితే తాను అన్న మాటలు ఏంటనేది పూర్తిగా చూడకుండా విమర్శలు చేస్తున్నారని సాయి పల్లవి ‘అమరన్’ ప్రమోషన్ ఇంటర్వ్యూలలో క్లారిటీ ఇచ్చింది. అయిన కూడా సాయి పల్లవిపై నెగిటివ్ ప్రచారం ఆగలేదు. ఇదిలా ఉంటే తాజాగా ఆమె తమిళ్ లో శివ కార్తికేయన్ కి జోడీగా నటించిన ‘అమరన్’ థియేటర్స్ లోకి వచ్చింది. ఈ సినిమాకి ఫుల్ పాజిటివ్ టాక్ రావడం విశేషం. ‘అమరన్’ సినిమాని లక్ష్యంగా చేసుకొని కొందరు సాయి పల్లవిపై నెగిటివ్ ప్రచారం చేశారనే మాట వినిపిస్తుంది.

వారికి చెంపపెట్టులా ప్రేక్షకులు ‘అమరన్’ సినిమాని అద్భుతంగా ఆదరిస్తున్నారు. సోషల్ మీడియాలో జరుగుతున్న ప్రచారాన్ని అస్సలు పట్టించుకోలేదు. ముఖ్యంగా ‘అమరన్’ సినిమాలో సాయి పల్లవి పెర్ఫార్మెన్స్ కి ప్రేక్షకులు బ్రహ్మరథం పడుతున్నారు. శివ కార్తికేయన్, సాయి పల్లవి పోటీపడి నటించారని అంటున్నారు. సాయి పల్లవి క్రేజ్ ఈ సినిమాకి తెలుగులో ప్రేక్షకాదరణ పెంచడం గ్యారెంటీ అని భావిస్తున్నారు.

ఆమె కథల ఎంపిక పెర్ఫెక్ట్ గా ఉంటుందని ఈ మూవీతో మరోసారి ప్రూవ్ అయ్యింది. క్యారెక్టర్ బలంగా ఉంటేనే సాయి పల్లవి ఏ సినిమా అయిన ఒప్పుకుంటుంది. మేజర్ ముకుందన్ వరదరాజన్ లైఫ్ స్టోరీ ఆధారంగా వచ్చిన ఈ సినిమాకి తమిళంతో పాటు తెలుగులో కూడా పాజిటివ్ టాక్ వస్తోంది. ఈ సినిమా ‘భారతీయుడు 2’, ‘వేట్టయన్’ కలెక్షన్స్ ని అధికమించడం గ్యారెంటీ అని ట్రేడ్ పండితులు అంచనా వేస్తున్నారు.

బాయ్ కట్ సాయి పల్లవి క్యాంపైన్ ‘అమరన్’ సినిమా మీద ఎలాంటి ప్రభావం చూపించలేదని ఈ సినిమాకి వస్తోన్న స్పందనతో అర్ధమైపోయింది. ఇకనైనా ట్రోలర్స్ ఆమెని నెగిటివ్ ప్రచారానికి ముగింపు పలికితే బెటర్ అనే మాట వినిపిస్తోంది. ఎన్ని విధాలుగా ట్రోలింగ్ చేసిన మంచి యాక్టర్స్ ని ఎప్పుడు ప్రేక్షకులకి దూరం చేయలేరని ఈ సినిమాలో సాయి పల్లవి పెర్ఫార్మెన్స్ కి ప్రేక్షకుల నుంచి వస్తోన్న స్పందనతో రుజువైంది.