సలార్ ఫస్ట్ టికెట్ కొన్న అగ్ర దర్శకుడు

డార్లింగ్ ప్రభాస్ హీరోగా ప్రశాంత్ నీల్ దర్శకత్వంలో తెరకెక్కి రిలీజ్ కాబోతున్న మూవీ సలార్. ఈ సినిమా డిసెంబర్ 22న థియేటర్స్ లోకి గ్రాండ్ గా రాబోతోంది. ప్రభాస్ కి జోడీగా ఈ చిత్రంలో శృతి హాసన్ నటించింది. పృథ్వీరాజ్ కీలక పాత్రలో కనిపించబోతున్నారు. సలార్ పార్ట్ 1 కథ మొత్తం ఇద్దరు మిత్రుల స్టోరీగా ఉండబోతోందని ఇప్పటికే క్లారిటీ ఇచ్చేశారు.

మిత్రుడిని రాజుగా చేయడం కోసం దేవా ఎలాంటి యుద్ధం చేశాడు అనేది ఈ కథలో చూపించబోతున్నారు. ఇదిలా ఉంటే ఈ సినిమా ప్రమోషన్స్ లో భాగంగా ఇప్పటికే ప్రభాస్, ప్రశాంత్ నీల్, పృథ్వీరాజ్ ని రాజమౌళి ఇంటర్వ్యూ చేసిన వీడియో షూట్ చేశారంట. ఈ వీడియోని రిలీజ్ చేయడానికి సన్నాహాలు చేస్తున్నట్లు తెలుస్తోంది.

మొత్తం వీడియో నిడివి గంటన్నర వచ్చిందంట. ఇందులో సలార్ సినిమా విశేషాలు రాజమౌళి ప్రభాస్ తో పాటు మిగిలిన టీమ్ ని అడిగినట్లు సమాచారం. ఇక ఈ ఇంటర్వ్యూలోనే సలార్ మూవీ ఫస్ట్ టికెట్ ని రాజమౌళి కొనుగోలు చేశారంట. నైజాం డిస్టిబ్యూటర్ అయినా మైత్రీ నిర్మాత నుంచి తొలి టికెట్ ని రాజమౌళి కొన్నట్లు కూడా చూపించబోతున్నారంట.

ఇక ఈ ఇంటర్వ్యూ ఫైనల్ అవుట్ ఫుట్ ని సిద్ధం చేస్తున్నారని తెలుస్తోంది. అది కంప్లీట్ అయిపోతే సోమవారం రిలీజ్ చేసే ప్లాన్ లో ఉన్నారంట. ఈ ఇంటర్వ్యూని అన్ని మీడియా ఛానల్స్ కి ఇవ్వనున్నారు. దీంతో మూవీపై హైప్ క్రియేట్ చేసే ప్రయత్నం చేస్తున్నారని సమాచారం. రాజమౌళి ప్రమోషన్స్ లో దిగాడంటే కచ్చితంగా సినిమాకి ఆటోమేటిక్ గా క్రేజ్ వస్తుంది

ఈ ఇంపాక్ట్ ఓపెనింగ్ డే కలెక్షన్స్ మీద ప్రభావం చూపించే ఛాన్స్ ఉంది. కేజీఎఫ్ సిరీస్ మీద జక్కన్న హ్యాండ్ పడిన తర్వాత దానికి పాన్ ఇండియా లెవల్ లో ఫోకస్ దొరికింది. ఇప్పుడు సలార్ కి రాజమౌళి ఈ ఇంటర్వ్యూలో ఊపు తీసుకొచ్చే ప్రయత్నం చేస్తున్నారని సినీ విశ్లేషకులు అంటున్నారు