సలార్-2.. ఈసారి మాత్రం అలా కాదు!

పాన్ ఇండియా స్టార్ ప్రభాస్ గత ఏడాది చివర్లో సలార్ సినిమాతో వచ్చి భారీ హిట్ కొట్టిన సంగతి అందరికీ తెలిసిందే. స్టార్ డైరెక్టర్ ప్రశాంత్ నీల్ దర్శకత్వంలో తెరకెక్కిన సలార్ సినిమా బాక్సాఫీస్ వద్ద దాదాపు రూ.700 కోట్ల గ్రాస్ కలెక్షన్స్ ను వసూలు చేసింది. ప్రభాస్ కు నీల్ ఇచ్చిన ఎలివేషన్లకు ఫ్యాన్స్ ఊగిపోయారు. ఇక ఈ సినిమా చివర్లో సీక్వెల్ ను అనౌన్స్ చేస్తూ టైటిల్ ను శౌరాంగ్య పర్వంగా ప్రకటించారు మేకర్స్.

అయితే సలార్ పార్ట్-2 కోసం ప్రభాస్ అభిమానులు, ప్రేక్షకులు ఎంతగానో ఎదురు చూస్తున్నారు. సలార్ చూసిన తర్వాత ఆడియన్స్ కు ఎన్నో ప్రశ్నలు వచ్చాయి. ఆ ప్రశ్నలన్నింటికీ సమాధానం సీక్వెల్ లోనే దొరుకుతుంది. ఇక సలార్-2 షూటింగ్ మే నెల చివర్లో మొదలు కానుందని ఇటీవల అప్డేట్ వచ్చింది. హైదరాబాద్‌ లోని రామోజీ ఫిల్మ్ సిటీలో 10 రోజుల పాటు సలార్-2 ఫస్ట్ షెడ్యూల్ షూటింగ్ జరగనున్నట్లు తెలుస్తోంది.

అందుకు గాను మేకర్స్ భారీ సెట్లు కూడా నిర్మించినట్లు సమాచారం. ఫస్ట్ షెడ్యూల్ లో ప్రభాస్, పృథ్వీరాజ్ సుకుమారన్ పాల్గొంటారని తెలుస్తోంది. అయితే ఈ మూవీని 2024 చివర్లో విడుదల చేసేందుకు కూడా మేకర్స్ ప్లాన్ చేసినట్లు టాక్ వస్తోంది. దీనిపై త్వరలో అధికారిక ప్రకటన రానుందట. అయితే సలార్ లో ప్రభాస్ కు చాలా తక్కువ డైలాగులు ఉన్నాయని కంప్లైంట్ వచ్చిన విషయం తెలిసిందే.

ఓటీటీలోకి సలార్ వచ్చాక.. కొంతమంది సినిమాలోని ప్రభాస్ డైలాగ్స్ అన్నీ కలిపి ఒక వీడియో ఎడిట్ చేయగా.. అది కేవలం 2 నిమిషాల 33 సెకండ్స్ మాత్రమే ఉంది. మూడు గంటల సినిమాలో ప్రభాస్ కనీసం మూడు నిమిషాలు కూడా మాట్లాడలేదని టాక్ వచ్చింది. దీంతో ఈసారి సీక్వెల్ లో ప్రభాస్ రోల్ కు పవర్ ఫుల్ డైలాగ్స్ యాడ్ చేశారట మేకర్స్. కొన్ని డైలాగులు.. ఆడియన్స్ చేత ఈలలు వేయించేలా ఉంటాయని టాక్.

ఇప్పుడు ఈ విషయం నెట్టింట వైరల్ గా మారగా.. ప్రభాస్ కోసం అదిరిపోయే డైలాగ్స్ రాయాలని మేకర్స్ కు ఫ్యాన్స్ రిక్వెస్ట్ చేస్తున్నారు. గతసారి లాగా అస్సలు చేయొద్దని కోరుతున్నారు. ఇక సీక్వెల్ లో కూడా పృథ్వీరాజ్ సుకుమారన్, శ్రుతి హాసన్ సహా పలువురు నటీనటులు కనిపించనున్నారు. హోంబలే ఫిల్మ్స్ భారీ బడ్జెట్ తో నిర్మిస్తున్న ఈ సినిమా ప్రీ-ప్రొడక్షన్ పనులు ప్రస్తుతం శరవేగంగా జరుగుతున్నాయి. మరి ఈ సినిమా ఎప్పుడు మొదలవుతుందో చూడాలి.