'సలార్ 2' షూటింగ్ ఎప్పుడు?
సలార్ పార్ట్‌ 1 భారీ విజయాన్ని సొంతం చేసుకున్న నేపథ్యంలో పార్ట్‌ 2 ఎప్పుడు వస్తుందా అంటూ అంతా ఆసక్తిగా ఎదురు చూస్తున్నారు.
By: Tupaki Desk | 29 Jan 2024 10:32 AM GMT
ప్రభాస్ హీరోగా ప్రశాంత్ నీల్ దర్శకత్వంలో రూపొంది గత ఏడాది చివర్లో ప్రేక్షకుల ముందుకు వచ్చిన 'సలార్ 1' సినిమా భారీ విజయాన్ని సొంతం చేసుకున్న విషయం తెల్సిందే. కేజీఎఫ్‌ తర్వాత ప్రశాంత్ నీల్ నుంచి వచ్చిన ఈ సినిమా అభిమానుల మరియు ప్రేక్షకుల అంచనాలు అందుకుని విజయాన్ని సొంతం చేసుకుంది.
సలార్ పార్ట్‌ 1 భారీ విజయాన్ని సొంతం చేసుకున్న నేపథ్యంలో పార్ట్‌ 2 ఎప్పుడు వస్తుందా అంటూ అంతా ఆసక్తిగా ఎదురు చూస్తున్నారు. సలార్ 2 కి సంబంధించిన షూటింగ్ కొంత మేరకు ఇప్పటికే జరిగిందనే ప్రచారం జరిగింది. కానీ సలార్ 2 కి సంబంధించిన షూటింగ్ ఇంకా మొదలు పెట్టలేదని నిర్మాత పేర్కొన్నారు.
కొన్ని వారాల క్రితం నిర్మాత విజయ్ కిరగందూర్‌ మీడియాతో మాట్లాడుతూ సలార్ 2 సినిమా షూటింగ్ 2024 నవంబర్ నుంచి మొదలు పెట్టబోతున్నట్లు ప్రకటించాడు. 2025 లో సినిమా విడుదల అయ్యే విధంగా ప్లాన్‌ చేస్తున్నట్లుగా కూడా ఆయన పేర్కొన్నాడు.
ఈ ఏడాది చివర్లో షూటింగ్ ప్రారంభించి, వచ్చే ఏడాది క్రిస్మస్ కు సినిమా ను విడుదల చేస్తే కచ్చితంగా మంచి ఫలితం దక్కే అవకాశం ఉందని చాలా మంది అభిప్రాయం వ్యక్తం చేస్తున్నారు. కనుక దర్శకుడు ప్రశాంత్ నీల్ కూడా ఆ వ్యూహం తోనే ముందడుగు వేస్తున్నాడనే వార్తలు వస్తున్నాయి.
సలార్ 1 విడుదల తర్వాత ఎన్నో ప్రశ్నలు ప్రేక్షకుల మనసును తొలుస్తున్నాయి. వాటన్నింటికి కూడా సలార్ 2 సమాధానం చెప్పాల్సి ఉంది. ఆప్త మిత్రులు, ప్రాణ స్నేహితులు అయిన దేవ, వరద లు ఎందుకు బద్ద శత్రువులు గా మారారు అనేది సలార్ 2 లో చూడబోతున్నాం. నిర్మాత చెప్పినట్లుగా 2025 చివరి వరకు సలార్ 2 వచ్చేనా అంటూ అంతా ఆసక్తిగా ఎదురు చూస్తున్నారు.
