ఇది కదా అభిమానం అంటే.. హెలికాప్టర్లతో సలార్ సెల్యూట్

ప్రపంచవ్యాప్తంగా సలార్ జోష్ వచ్చేసింది. ఎప్పుడెప్పుడా అని ఆసక్తిగా ఎదురుచూస్తున్న భారీ ప్రాజెక్ట్ మరో ఐదు రోజుల్లో ప్రేక్షకుల ముందుకు రానుంది. కేజీఎఫ్ 1,2 సినిమాలతో బాక్సాఫీస్ రికార్డ్స్ బ్రేక్ చేసిన ప్రశాంత్ నీల్ దర్శకత్వం చేసిన ఈ మూవీపై ఇప్పటికే భారీ అంచనాలు ఉన్నాయి. సాహో, రాధేశ్యామ్, ఆదిపురుష్ సినిమాల తర్వాత ప్రభాస్ ఫుల్ యాక్షన్ రోల్ లో నటిస్తున్నారు.

ఇప్పటికే రిలీజ్ అయిన పోస్టర్లు, టీజర్ సినిమాపై హైప్ పెంచగా.. ఇటీవలే విడుదలైన ట్రైలర్ లో సినిమా ఏ రేంజ్ లో ఉంటుందో చెప్పేశారు ప్రశాంత్ నీల్. తాజాగా సలార్ టీమ్ తో దర్శకధీరుడు రాజమౌళి నిర్వహించిన ఇంటర్వ్యూ ప్రోమో రిలీజ్ చేయనున్నట్లు తెలిపింది చిత్రయూనిట్.

అయితే మిగతా సినిమాల్లా చిత్రబృందం నుంచి ఎలాంటి హడావుడి లేకపోయినా ప్రభాస్ ఫ్యాన్స్ మాత్రం మూవీకి మరింత క్రేజ్ తీసుకొచ్చే ప్రయత్నం చేస్తున్నారు. తాజాగా ఆయన ఫ్యాన్స్ కెనడాలోని టొరంటోలో వినూత్న రీతిలో సినిమాటిక్ ఎయిర్ సెల్యూట్ చేశారు. ఏకంగా ఆరు హెలికాఫ్టర్లతో రెబల్ స్టార్ కు సెల్యూట్ చేయించారు. పచ్చని మైదానంలో ప్రభాస్ భారీ పోస్టర్ ఏర్పాటు చేశారు.

అదే సమయంలో ఆరు హెలికాఫ్టర్లు ఒకేసారి గాల్లోకి ఎగిరాయి. ఒక్కో హెలికాఫ్టర్ కు సలార్ లోని ఒక్కో అక్షరాన్ని అంటించి వాటితో ఎయిర్ సెల్యూట్ చేయించారు. ప్రభాస్ ఫ్యాన్స్ ఎంతో కష్టపడి ఈ వీడియోను రూపొందించారు. తాజాగా ఈ వీడియోను హొంబలే ఫిలిమ్స్ షేర్ చేసింది. ప్రభాస్ ఫ్యాన్స్ ను ఎంతో ఆకట్టుకున్న ఈ వీడియోను యూట్యూబ్ లో ఇప్పటి వరకు 1.8 మిలియన్లకు పైగా వ్యూస్ వచ్చాయి. ప్రభాస్ అభిమానుల ఎఫర్ట్ ను ఫ్యాన్స్ తోపాటు సినీ ప్రముఖులు అభినందిస్తున్నారు.

ప్రమోషన్లలో భాగంగా చిత్రయానిట్ ఇటీవలే రిలీజ్ చేసిన సూరీడే గొడుగు పట్టి సాంగ్.. సినిమాపై అంచనాలను పెంచేసింది. ఈ పాట తెలుగు వెర్షన్ 7 మిలియన్లకు పైగా చూశారు. కృష్ణకాంత్ రాసిన ఈ పాటను హిరనీ ఇవాటురి అద్భుతంగా ఆలపించారు. సినిమాలో ప్రభాస్ తోపాటు శృతి హాసన్, జగపతిబాబు, పృథ్వీరాజ్ సుకుమారన్ తదితరులు నటిస్తున్నారు. క్రిస్మస్ కానుకగా డిసెంబర్ 22వ తేదీన విడుదల కానుంది.