సైలెంటుగా చక్కబెట్టేస్తున్న సలార్

ప్రభాస్ కొత్త సినిమాల విషయంలో అభిమానులకు చాలా కన్ఫ్యూజన్ ఉంది. ప్రస్తుతం ‘కల్కి’ని పూర్తి చేసి ‘రాజా సాబ్’ చిత్రీకరణలో పాల్గొంటున్నాడు యంగ్ రెబల్ స్టార్. అతను చేయాల్సిన సినిమాలు మూడు దాకా ఉన్నాయి. అవే.. సలార్-2, స్పిరిట్, హను రాఘవపూడి దర్శకత్వంలో చేయనున్న ప్రేమకథ. కానీ వాటిలో ఏది ముందు ఏది వెనుక అన్నదే తేలట్లేదు.

ముందేమో స్పిరిట్ అన్నారు. తర్వతేమో సలార్-2 ముందుకొస్తుందన్నారు. మళ్లీ హను సినిమాను త్వరగా చేయాలని ప్రభాస్ భావిస్తున్నట్లు వార్తలు వచ్చాయి. దీంతో ప్రభాస్ మనసులో ఏముందో.. తన ప్లానింగ్ ఏంటో అర్థం కాక అభిమానులు అయోమయానికి గురయ్యారు. ఐతే తాజా కబురు ఏంటంటే.. సలార్-2 చిత్రీకరణను అతి త్వరలోనే మొదలుపెట్టేస్తున్నాడట ప్రభాస్.

సలార్-2 ప్రి ప్రొడక్షన్ పనులు సైలెంటుగా జరిగిపోతున్నాయట. మేలోనే షూట్ మొదలుపెట్టడానికి కూడా సన్నాహలు కూడా జరిగిపోతున్నాయట. పది రోజుల పాటు షెడ్యూల్ ఉంటుందని.. అందు కోసం ప్రభాస్‌తో పాటు పృథ్వీరాజ్ సుకుమారన్ డేట్లను కూడా లాక్ చేశారని అంటున్నారు. ప్రశాంత్ నీల్ అయితే ‘సలార్-2’ను లేట్ చేసే ఉద్దేశంలోనే లేడట.

ప్రభాస్ ‘రాజా సాబ్’ చేస్తూనే ‘సలార్-2’ చిత్రీకరణలోనూ పాల్గొంటాడు. ‘రాజా సాబ్’ అయ్యాక హను సినిమానే ఉంటుందా.. స్పిరిట్ మొదలవుతుందా అన్నది తెలియదు. కానీ ప్రభాస్ మాత్రం ఓ వైపు ‘సలార్-2’ చేస్తుంటాడు. దీంతో పాటు ఏదో ఒక సినిమాను కూడా సమాంతరంగా పూర్తి చేస్తాడు. ‘సలార్-2’ 2025లోనే రిలీజవుతుందని పృథ్వీరాజ్ ఇటీవలే ప్రకటించిన సంగతి తెలిసిందే.