5 కోట్లు చెల్లించ‌క‌పోతే చంపేస్తాం.. స్టార్‌హీరోకి బెదిరింపు!

బాలీవుడ్ స్టార్ హీరో సల్మాన్ ఖాన్‌ను చంపేస్తామని లారెన్స్ బిష్ణోయ్ గ్యాంగ్ ప‌లుమార్లు వార్నింగులు ఇచ్చిన సంగ‌తి తెలిసిందే. స‌ల్మాన్ అత‌డి కుటుంబానికి ఏదో ఒక రూపంలో థ్రెట్ పొంచి ఉంది. ఇటీవ‌లే స‌ల్మాన్ బాంద్రా ఇంటిపై తుపాకీ కాల్పుల క‌ల‌క‌లం, అనంత‌రం స‌ల్మాన్ స్నేహితుడు బాబా సిద్ధిఖీ హ‌త్య ఇవ‌న్నీ క‌ల‌వ‌ర‌పాటుకు గురి చేసాయి. స‌ల్మాన్ చుట్టూ భ‌ద్ర‌త అమాంతం పెరిగింది. అత‌డి కుటుంబం హై టెన్ష‌న్ లో ఉంది. ఇంటి చుట్టూ డ‌జ‌ను మంది పోలీసులు నిరంత‌రం గ‌స్తీ కాస్తున్నారు.

ఇలాంటి స‌మ‌యంలో తాజా బెదిరింపు ఉలిక్కిపాటుకు గురి చేసింది. బిష్ణోయ్ తో శ‌త్రుత్వాన్ని అంతం చేయడానికి స‌ల్మాన్ ఖాన్ రూ. 5 కోట్లు చెల్లించాల‌ని డిమాండ్ చేస్తూ ముంబై ట్రాఫిక్ పోలీసులకు పంపిన వాట్సాప్ సందేశం క‌ల‌క‌లం రేపింది. డబ్బు చెల్లించకపోతే ఇటీవల హత్య చేసిన మహారాష్ట్ర మాజీ మంత్రి బాబా సిద్ధిక్ కంటే స‌ల్మాన్ గతి దారుణంగా ఉంటుందని హెచ్చరించారు. ``దీనిని తేలిగ్గా తీసుకోవద్దు. సల్మాన్ ఖాన్ ప్రాణాలతో ఉండి లారెన్స్ బిష్ణోయ్‌తో శత్రుత్వం ముగించాలనుకుంటే అతడు రూ. 5 కోట్లు చెల్లించాలి. డబ్బు ఇవ్వకపోతే అతడి పరిస్థితి బాబా సిద్ధిఖీ కంటే దారుణంగా ఉంటుంది`` అని బెదిరింపు సందేశం ట్రాఫిక్ పోలీస్ కి అందింది. ముంబై పోలీసుల స‌మాచారం మేర‌కు.. ఈ ఎస్.ఎం.ఎస్ ఎక్క‌డి నుంచి వ‌చ్చిందో ట్రాక్ చేయడానికి కృషి చేస్తున్నారు. స‌ల్మాన్ ఖాన్ బాంద్రా నివాసం చుట్టూ భద్రతను పెంచారు. ఇప్ప‌టికే ప‌లుమార్లు బెదిరింపుల కారణంగా స‌ల్మాన్ ఖాన్ చాలా అప్రమత్తంగా ఉన్నాడు. ఈ ఇటీవలి పరిణామం అతడి భద్రత గురించి కొత్త ఆందోళనలను రేకెత్తిస్తోంది.

ఈ గురువారం నాడు నవీ ముంబై పోలీసులు లారెన్స్ బిష్ణోయ్ గ్యాంగ్‌లోని కీలక సభ్యుడిని అరెస్ట్ చేశారు. హర్యానాలోని పానిపట్‌లో సుఖా అలియాస్ సుఖ్‌బీర్ బల్బీర్ సింగ్ అనే నిందితుడు పట్టుబడ్డాడు. మిస్టర్ ఖాన్‌ను హత్య చేయడానికి కుట్ర పన్నాడని ఆరోప‌ణ‌లు ఎదుర్కొంటున్న వ్య‌క్తితో అత‌డికి సంబంధం ఉంది. స‌ల్మాన్ ఖాన్‌పై దాడి చేసేందుకు సింగ్ ఇతర ముఠా సభ్యులకు కాంట్రాక్ట్ ఇచ్చినట్లు సమాచారం. పోలీసు సోర్స్ ప్రకారం సింగ్ పాకిస్తాన్‌కి చెందిన వ్యక్తి అయిన డోగర్‌తో నేరుగా సంప్రదింపులు జరిపి ప్రణాళికాబద్ధమైన దాడిని ప్లాన్ చేసాడు. ఈ కుట్రను అమలు చేసేందుకు పాకిస్థాన్ నుంచి అక్రమంగా తరలించిన AK-47, M16, AK-92 సహా హైప‌వ‌ర్ తుపాకీలను ఉపయోగించాలని ముఠా భావించింది. మిస్టర్ ఖాన్‌పై బిష్ణోయ్ గ్యాంగ్ కుట్రకు సంబంధించిన విస్తృత దర్యాప్తులో పురోగతిలో సింగ్ అరెస్టు తాజా ఘ‌ట‌న‌. ఈ ఏడాది ప్రారంభంలో నవీ ముంబై పోలీసులు హ‌త్యకు కుట్ర పన్నినందుకు ముఠాలోని 18 మంది వ్యక్తులపై ఎఫ్ఐఆర్ నమోదు చేశారు. స‌ల్మాన్ ఖాన్ బాంద్రా నివాసం వెలుపల ముఠా సభ్యులు కాల్పులు జరిపిన దిగ్భ్రాంతికరమైన సంఘటన తర్వాత FIR న‌మోదైంది. ఈ కేసులో పేర్కొన్న నిందితుల్లో బిష్ణోయ్ గ్యాంగ్‌లోని ఉన్నత స్థాయి సభ్యులు, లారెన్స్ బిష్ణోయ్, అతని సోదరుడు అన్మోల్, సంపత్ నెహ్రా, గోల్డీ బ్రార్, రోహిత్ గోధరా ఉన్నారు. ఈ వ్యక్తులు చాలా కాలంగా ఉత్తర భారతదేశం అంతటా వ్యవస్థీకృత నేర కార్యకలాపాలకు పాల్ప‌డ్డారు. బెదిరింపుల చ‌రిత్ర క‌లిగి ఉన్న‌వార‌ని ధృవీక‌రించారు.

కొనసాగుతున్న పోలీసుల విచారణలో ముఠా ప్లాన్‌పై విస్తుపోయే విషయాలు బయటపడ్డాయి. స‌ల్మాన్ ఖాన్ కదలికలను పర్యవేక్షించేందుకు బిష్ణోయ్ గ్యాంగ్ 60 నుంచి 70 మంది కార్యకర్తలను మోహరించినట్లు పోలీసు వర్గాలు వెల్లడించాయి. ఈ వ్యక్తులు మిస్టర్ ఖాన్ బాంద్రా నివాసం, అతని పన్వెల్ ఫామ్‌హౌస్ , స‌ల్మాన్ షూటింగ్ లొకేషన్ లు సహా ప‌లు ప్రదేశాలలో నిఘా నిర్వహించారు. షార్ప్‌షూటర్‌లుగా పనిచేసేందుకు మైనర్‌లను రిక్రూట్ చేసుకోవడానికి కూడా ముఠా ప్రయత్నించింది.

అయితే బిష్ణోయ్ గ్యాంగ్ నుంచి స‌ల్మాన్ ఖాన్‌కు హత్య బెదిరింపులు రావడం ఇదే మొదటిసారి కాదు. 2022లో అత‌డిని బెదిరించే లేఖ త‌న‌ నివాసానికి సమీపంలోని బెంచ్‌పై క‌నుగొన్నారు. మార్చి 2023లో స‌ల్మాన్ కి ముఠా సభ్యులు పంపినట్లు బెదిరింపు ఇమెయిల్ వచ్చింది. జనవరి 2024లో ఇద్దరు గుర్తుతెలియని వ్యక్తులు ఫేక్ ఐడెంటిటీలను ఉపయోగించి మిస్టర్ ఖాన్ పన్వెల్ ఫామ్‌హౌస్‌లోకి చొరబడేందుకు ప్రయత్నించారు. ఈ సంఘటన త‌ర్వాత స‌ల్మాన్ ఇల్లు, ఫామ్ హౌస్ చుట్టూ భద్రతను పెంచడానికి కార‌ణ‌మైంది.

లారెన్స్ బిష్ణోయ్‌తో స‌ల్మాన్ ఖాన్ వైరం చాలా సంవత్సరాల నాటిది. ప్రస్తుతం ఖైదుగా ఉన్న‌ గ్యాంగ్‌స్టర్ బిష్ణోయ్ 1998లో స‌ల్మాన్ కృష్ణజింకలను వేటాడి చంప‌డంతో పగ పెంచుకున్నాడు. బిష్ణోయ్ కమ్యూనిటీ కృష్ణజింకను గౌరవిస్తుంది. ఈ సంఘటన ముఠా ప్రతీకారం తీర్చుకోవడానికి ప్రధాన కారణంగా చరిత్ర చెబుతోంది.