స‌ల్మాన్ బావ ఆయుష్ కారుకు ప్ర‌మాదం

స‌ల్మాన్ ఖాన్ సోద‌రి అర్పితాఖాన్ భ‌ర్త, న‌టుడు ఆయుష్ శర్మ లగ్జరీ కారు ప్రమాదానికి గురైంది. ఆ సమయంలో ఆయుష్ వాహనంలో లేనప్పటికీ, ఈ సంఘటన నగర వీధుల్లో భద్రత గురించి ఆందోళనను పెంచింది. ముఖ్యంగా మద్యం సేవించి వాహనాలు నడుపుతున్న వ్యక్తులు ఈ ప్ర‌మాదానికి కార‌ణమ‌వ‌డంతో అది హెడ్ లైన్స్ లోకొచ్చింది.

జూమ్ నివేదిక ప్రకారం.. ఆయుష్ డ్రైవర్ పెట్రోల్ బంక్ కు వెళుతుండగా మరో వాహనంలో మద్యం మత్తులో ఉన్న వ్య‌క్తులు ఆయుష్ కారును అనూహ్యంగా ఢీకొట్టడంతో తీవ్ర నష్టం వాటిల్లింది. అదృష్టవశాత్తూ ఆయుష్‌ డ్రైవర్‌ సురక్షితంగా బయటపడ్డాడు. ప్రమాద వార్తలపై నటుడు ఆయుష్‌ ఇంకా స్పందించలేదని జూమ్ తెలిపింది.

కెరీర్ మ్యాట‌ర్‌కి వ‌స్తే.. ఆయుష్ శర్మ 2018లో రొమాంటిక్ డ్రామా లవ్‌యాత్రితో బాలీవుడ్‌లోకి అడుగుపెట్టాడు. అతడు యాక్షన్ థ్రిల్లర్ యాంటిమ్: ది ఫైనల్ ట్రూత్‌లో సల్మాన్ ఖాన్‌తో కలిసి నటించాడు. ప్రస్తుతం ఆయుష్ నటించిన రుస్లాన్ చిత్రం 2024లో విడుదలకు సిద్ధంగా ఉంది. 2018లో బాలీవుడ్‌లో సల్మాన్ ఖాన్ నిర్మించిన లవ్‌యాత్రిలో హీరోగా న‌టించ‌గా, వారినా హుస్సేన్ క‌థానాయిక‌గా న‌టించింది. 2020లో ఆయుష్‌- స‌యీ మంజ్రేకర్ జంట‌గా విశాల్ మిశ్రా రూపొందించిన మంఝా అనే మ్యూజిక్ వీడియోలో కనిపించారు. 2021లో `యాంటిమ్‌`లో స‌ల్మాన్ ఖాన్‌తో కలిసి గ్యాంగ్‌స్టర్‌గా నటించాడు. ఇసాబెల్లె కైఫ్‌తో కలిసి యాక్షన్ మూవీ `క్వాతా`లో కనిపించబోతున్నాడు. ఈ చిత్రం 2019లో ప్రారంభ‌మైనా చాలా ఆలస్యం అయింది.

కాంగ్రెస్ నాయ‌కుడి మ‌న‌వ‌డు:

ఆయుష్ శర్మ హిమాచల్ ప్రదేశ్‌లోని మండిలో అనిల్ - సునీత శర్మలకు జన్మించాడు. అతడికి ఆశ్రయ్ శర్మ అనే తోబుట్టువు ఉన్నాడు. అతడు జిల్లా మండిలోని కోట్లి గ్రామం నుండి వచ్చిన మాజీ క్యాబినెట్ మంత్రి, ప్రముఖ కాంగ్రెస్ నాయకుడు పండిట్ సుఖ్ రామ్ మనవడు. శర్మ కుటుంబం 50 సంవత్సరాలకు పైగా రాజకీయాల్లో యాక్టివ్ గా ఉంది. హిమాచల్ రాజకీయాల్లో చాలా ప్రత్యేక స్థానాన్ని కలిగి ఉంది.

18 నవంబర్ 2014న సల్మాన్ ఖాన్ ద‌త్త‌త‌ సోదరి అయిన‌ అర్పితా ఖాన్‌ను వివాహం చేసుకున్నాడు. వారికి ఒక కుమారుడు అహిల్ (జననం 30 మార్చి 2016), ఒక కుమార్తె అయత్ (జననం 27 డిసెంబర్ 2019) ఉన్నారు.