మాలీవుడ్ వేధింపులు.. నేను మీతోనే అన్న స‌మంత‌

మలయాళ చిత్ర పరిశ్రమలో మహిళలకు న్యాయం కోసం, గౌరవప్రదమైన వృత్తిపరమైన వాతావరణాన్ని కల్పించడం కోసం విమెన్ ఇన్ సినిమా కలెక్టివ్ (WCC) నిర్విరామ ప్రయత్నాలను సమంతా రూత్ ప్రభు బహిరంగంగా ప్రశంసించారు. సామ్ త‌న‌ ఇన్‌స్టాగ్రామ్ కథనాల‌లో WCC మహిళల పట్ల తన అభిమానాన్ని వ్య‌క్త‌ప‌రుస్తూనే, వారికి కృతజ్ఞలు తెలిపింది. వారి సుదీర్ఘ పోరాటం ప్రాముఖ్యతను తెలియజేస్తూ ప్ర‌శంస‌లు కురిపించింది.

చలనచిత్ర పరిశ్రమలో లింగ సమానత్వం కోసం వాదించే శక్తివంతమైన మ‌హిళా బృందం WCC.. హేమా కమిటీ నివేదికను ఆవిష్కరించిన తర్వాత ఇటీవల అంద‌రి దృష్టిని ఆకర్షించింది. కేరళలో రాజకీయ తుఫానుకు కేంద్రబిందువుగా మారిన హేమ క‌మిటీ 235 పేజీల పత్రం .. మలయాళ చిత్ర పరిశ్రమలో లైంగిక దోపిడీ, అక్రమ నిషేధాలు, వివక్ష, మాదకద్రవ్యాలు , మద్యం దుర్వినియోగం , వేతన వ్యత్యాసాల గురించిన‌ దిగ్భ్రాంతికరమైన విష‌యాలను బహిర్గతం చేసింది. 2017లో డబ్ల్యూసీసీ సమర్పించిన పిటిషన్‌కు ప్రతిస్పందనగా కేరళ ప్రభుత్వం ఏర్పాటు చేసిన హేమ కమిటీ పరిశ్రమలో మహిళలు ఎదుర్కొంటున్న సవాళ్లను అధ్యయనం చేసే బాధ్యతను స్వీక‌రించింది. నివేదిక డిసెంబర్ 2019లో పూర్తయినప్పటికీ సున్నితమైన కంటెంట్ కారణంగా దానిని ఇన్నాళ్లు దాచి ఉంచారు. కానీ ఇప్పుడు అది ఓపెనైంది. సంచ‌ల‌నం సృష్టించింది.

సమంత తన ఇన్‌స్టాగ్రామ్ స్టోరీలో డ‌బ్ల్యూసీసీ పోరాట స్ఫూర్తిని, వారి ధైర్యం ప‌ట్టుదలను ప్రశంసిస్తూ హృదయపూర్వక సందేశాన్ని షేర్ చేసింది. డ‌బ్ల్యూ సీసీలోని మహిళలందరికీ నేను అండగా ఉంటాను. న్యాయం కోసం మీ పోరాటం నాతో సహా చాలా మందికి స్ఫూర్తినిచ్చింది. సినిమా రంగంలో మహిళలకు సురక్షితమైన గౌరవప్రదమైన కార్యస్థలం కోసం వాదించడంలో సమిష్టి పట్టుదల ప్రశంసనీయం అని స‌మంత ప్ర‌శంసించింది. సామ్ మాటలు అభిమానులు, ఉద్యమ క‌ర్త‌ల్లో ఘాడంగా ప్రతిధ్వనించాయి. వినోద పరిశ్రమలో లింగ సమస్యల గురించి చ‌ర్చ‌ల‌ను మరింత విస్తృతం చేసింది.

డ‌బ్ల్యూసీసీ చొర‌వ‌ను, ప్ర‌య‌త్నాన్ని స‌మంత ప్ర‌శంసించింది. సంవత్సరాల పోరాటం తర్వాత వారు ప్రూవ్ చేసార‌ని పేర్కొంది. పరిశ్రమలో మహిళలను రక్షించడానికి సంస్కరణల తక్షణ అవసరాన్ని హేమ క‌మిటీ నివేదిక హైలైట్ చేసింద‌ని, దీని వెన‌క క‌మిటీ కృషి ఉంద‌ని స‌మంత అన్నారు. ఇది సుదీర్ఘ ప్రయాణం అని వారు చెప్పారు.. అయితే సినిమాలోని మహిళలందరికీ సురక్షితమైన వాతావరణాన్ని సృష్టించే లక్ష్యంలో వారు స్థిరంగా ఉన్నారు. డబ్ల్యుసిసికి మద్దతునివ్వ‌డ‌మే కాదు.. మలయాళ చిత్ర పరిశ్రమలో సమంత రంగ ప్ర‌వేశం చేస్తున్నార‌ని కూడా టాక్ వినిపిస్తోంది. గౌతమ్ మీనన్ దర్శకత్వం వహించే చిత్రంలో లెజెండరీ మమ్ముట్టితో కలిసి స‌మంత న‌టించే అవ‌కాశం ఉంద‌ని పుకార్లు వినిపిస్తున్నాయి. ఈ వార్త అభిమానులలో ఉత్సాహం పెంచింది. కానీ ఇంకా ఈ ప్రాజెక్ట్ గురించి అధికారిక నిర్ధారణ లేదు.