అమెరికాలో సమంత ఖుషీ ప్రమోషన్స్...!

సమంత, విజయ్ దేవరకొండ ప్రధాన పాత్రల్లో నటిస్తున్న తాజా చిత్రం ఖుషీ. ఈ మూవీ పై చాలా ఎక్కువ అంచనాలు ఉన్నాయి. ఇప్పటికే విడుదల చేసిన ట్రైలర్ విపరీతంగా ఆకట్టుకుంటోంది. ఇటీవల మ్యూజిక్ కన్సర్ట్ కూడా చేశారు. ఆ మ్యూజిక్ కన్సర్ట్ బాగా క్లిక్ అయిన తర్వాత సమంత అమెరికా వెళ్లిపోయింది.

నిజానికి సమంత చికిత్స కోసం అమెరికా వెళ్లారు. అయితే, స్వామి కార్యం, స్వకార్యం రెండూ పూర్తయ్యినట్లు, చికిత్స కోసం వెళ్లి, అక్కడే తన ఖుషీ మూవీ ప్రమోషన్స్ కూడా సమంత చేస్తుండటం విశేషం. ప్రస్తుతం సామ్ న్యూయార్క్ లో ఉంది. ఓవర్సీస్ మార్కెట్ లో ఖుషీ మూవీకి భారీ ఓపెనింగ్స్ వస్తాయని మూవీ టీమ్ నమ్ముతోంది. దానిని మరింత పెంచడానికి సమంత ప్రమోషన్స్ ఉపయోగపడతాయని వారు భావిస్తున్నారు.

దీనిలో భాగంగానే, సమంత అమెరికాలో ఉన్న తెలుగు ప్రేక్షకులను కలవనున్నారు. సమంతను కలవడానికి అక్కడి తెలుగువారు సైతం చాలా ఉత్సాహంగా ఉన్నారు. ఆగస్టు 25వ తేదీన డల్లాస్ లో ఈ మీట్ అండ్ గ్రీట్ ఈవెంట్ నిర్వహిస్తున్నారు. అయితే, సమంతను కలవడం ఉచితం మాత్రం కాదు. వారు అక్కడ టికెట్ కొనుక్కోవాల్సిందే.

మామూలుగా ఈ ఈవెంట్ కి హాజరు కావడానికి 150డాలర్లు పెట్టి టికెట్ కొనాలి. అదే, సమంతను దగ్గర నుంచి చూడాలంటే 2500 డాలర్లు చెల్లించాల్సిందే. అయితే, అంత ధర పెట్టినా, కొనడానికి వారు ఏ మాత్రం వెనకాడటం లేదట. చాలా మంది ఉత్సాహం చూపిస్తున్నారని సమాచారం. ఈ మీట్ అండ్ గ్రీట్ ఈవెంట్ కోసం చిత్ర నిర్మాతలు సమంతకు బాగానే చెల్లిస్తున్నారు. కేవలం ఈ ఈవెంట్ కి సమంత దాదాపు రూ.30లక్షలు తీసుకుంటుందని తెలుస్తోంది.

మరి సమంతకు అంత మనీ ఇవ్వాలి అంటే, నిర్మాతలు ఇలా టికెట్లు అమ్ముకోవడంలో తప్పేమీ లేదు అనే కామెంట్స్ వినపడుతున్నాయి.కాగా, ఇటీవల న్యూయార్క్ లో సమంత ఇండియా పరేడ్ డే ఈ వెంట్ లో కూడా సందడి చేసింది. ఆ ఫోటోలు కూడా నెట్టింట వైరల్ గా మారాయి. ఇక, ఈ మీట్ అండ్ గ్రీట్ ఈవెంట్ ఫోటోలు సైతం త్వరలోనే బయటకు రానున్నాయి. ఇక, ఖుషీ మూవీ సెప్టెంబర్ 1వ తేదీన ప్రేక్షకుల ముందుకు రానుంది.