సందీప్ పై జావేద్ కామెంట్స్! మళ్లీ వంగా స్పందిస్తారా?

టాలీవుడ్ స్టార్ డైరెక్టర్ సందీప్ రెడ్డి వంగా తెరకెక్కించిన యానిమల్ ఎలాంటి హిట్ అయిందో చెప్పనక్కర్లేదు. బాక్సాఫీస్ వద్ద భారీ వసూళ్లను రాబట్టింది. అనేక విమర్శలు వచ్చినా.. తగ్గేదేలే అంటూ దూసుకుపోయింది. అయితే ఆ సినిమా విషయంలో సందీప్ వంగా, బాలీవుడ్ డైరెక్టర్ కమ్ రచయిత జావేద్‌ అక్తర్‌ మధ్య కొన్నిరోజులుగా వివాదం నెలకొన్న విషయం తెలిసిందే.

యానిమల్ మూవీ విడుదల అయ్యాక.. అలాంటి చిత్రాలు ఆడియన్స్ కు ఎలాంటి మెసేజెస్ ఇస్తున్నాయని క్వశ్చన్ చేశారు జావేద్ అక్తర్. మహిళలను తక్కువ చేసి చూపించే చిత్రాలు సూపర్‌ డూపర్‌ హిట్‌ అవ్వంగా నిజంగా చాలా ప్రమాదకరమని వ్యాఖ్యానించారు. ఆ కామెంట్స్ పై ఇప్పుడు జావేద్ అక్తర్ తాజాగా ఓ మీడియాకు ఇచ్చిన ఇంటర్వ్యూలో క్లారిటీ ఇచ్చారు.

తాను అప్పుడు సినిమాపై కాకుండా ప్రేక్షకుల కోసం ప్రస్తావించినట్లు తెలిపారు జావేద్ అక్తర్. ఓ పదో, పన్నెండో, పదిహేను మంది కలిసి తప్పుడు విలువతో సినిమా తీసినా.. 10-12 మంది కలిసి సాంగ్ తీసినా ఎలాంటి సమస్య లేదని అన్నారు. 140 కోట్ల ప్రజల్లో ఓ 15 మంది వక్రబుద్ధి లేదా విపరీతమైన ధోరణి ఉన్నవారు ఉన్నా ఎలాంటి ఇబ్బంది లేదని వ్యాఖ్యానించారు.

కానీ అలాంటి వారు తెరకెక్కించిన సినిమాలు.. థియేటర్లలో రిలీజ్ అయ్యి సూపర్ హిట్ అవ్వడమే పెద్ద సమస్య అని తెలిపారు జావేద్ అక్తర్. ఇప్పుడు ఆయన చేసిన వ్యాఖ్యలు సోషల్ మీడియాలో వైరల్ గా మారాయి. సందీప్ రెడ్డి వంగాను పరోక్షంగా వక్రబుద్ధి కలవాడు అని జావేద్ విమర్శించారని నెటిజన్లు కామెంట్లు పెడుతున్నారు. ఇది కరెక్ట్ కాదని చెబుతున్నారు.

సినిమా వచ్చి చాలా నెలలు అయిందని.. ఇంకా ఆ విషయంపై వ్యాఖ్యలెందుకని కొందరు నెటిజన్లు అభిప్రాయపడుతున్నారు. ఇంతకుముందు జావేద్ వ్యాఖ్యలు చేసినప్పుడు.. మీర్జాపూర్‌ వెబ్ సిరీస్ నిర్మించిన సమయంలో తన సినిమా విషయంలో అన్న మాటలు.. ఆయన తన తనయుడు ఫర్హాన్‌ అక్తర్ కు ఎందుకు చెప్పలేదని సందీప్ వంగా అడిగారు.

ఆ సిరీస్‌లో చాలా అసభ్య పదాలు ఉంటాయని, ఇప్పటి వరకు కూడా తాను దాన్ని చూడలేదని తెలిపారు. కొడుకు వర్క్ ఎందుకు చెక్ చేయడం లేదని అడిగారు. అయితే తన 53 ఏళ్ల సినీ కెరీర్‌లో ఆయన(సందీప్)కు ఎక్కడా అసభ్య సన్నివేశాలు, మాటలు కనిపించలేదని అన్నారు జావేద్. అందుకే ఫర్హాన్‌ నిర్మించిన మీర్జాపూర్‌ ను ఉదాహరణగా చూపించారని అన్నారు. ఇప్పుడు మళ్లీ యనిమల్ మూవీ విషయంలో మాట్లాడారు. దీనిపై సందీప్ రెడ్డి వంగా స్పందిస్తారో లేదో వేచి చూడాలి