నా లక్ష్యం ఎప్పుడూ ఒక్కటే: సందీప్ రెడ్డి

బాలీవుడ్ స్టార్ రణ్ బీర్ కపూర్, నేషనల్ క్రష్ రష్మిక మందన్న హీరోహీరోయిన్లుగా తెరకెక్కిన యానిమల్ భారీ విజయాన్ని సొంతం చేసుకున్న విషయం తెలిసిందే. స్టార్ డైరెక్టర్ సందీప్ రెడ్డి వంగా దర్శకత్వం వహించిన ఈ సినిమా రూ.850 కోట్లకుపైగా వసూళ్లు రాబట్టింది. ఇటీవలే బాలీవుడ్ విమర్శకులకు స్ట్రాంగ్ కౌంటర్ ఇచ్చిన సందీప్.. తాజాగా తన మూవీపై వస్తున్న కామెంట్లకు స్పందించారు.

సాధారణంగా ఎవరైనా ఎక్కువ సార్లు అబద్ధం చెబితే అదే నిజమని నమ్మేస్తారని, సినిమాల విషయంలో ఇప్పుడు అదే జరుగుతోందని సందీప్ తెలిపారు. తాను తెరకెక్కించిన యానిమాల్ సినిమా వసూళ్లు రూ.350 కోట్లే వచ్చుంటే, పరిస్థితి వేరేలా ఉండేదని అన్నారు. వెంటనే క్రిటిక్స్ అంతా తన సినిమా ఫ్లాఫ్ అనేసే వాళ్లని తెలిపారు.

అయితే తన దృష్టిలో రూ.100 కోట్ల సినిమాకు రూ.140 కోట్లు వసూళ్లు వచ్చినా అది హిట్టే, కానీ క్రిటిక్స్ మాత్రం వేరేలా ప్రచారం చేస్తుంటారని మండిపడ్డారు. మూవీ చూసి అన్నీ నేర్చేసుకోవాడనికి అదేం స్కూల్ కాదని తెలిపారు. తల్లిదండ్రులు చెబితే నేర్చుకోని వారు సినిమా చూసి అస్సలు నేర్చుకోరని చెప్పారు. తాను పడ్డ కష్టానికి దేవుడి దయ తోడవ్వడం వల్ల మూడు సినిమాలు హిట్ అయ్యాయని వివరించారు.

తన లక్ష్యం ఎప్పుడూ ఒకటేనని.. ప్రపంచ స్థాయిలో గుర్తింపు తెచ్చుకోవడానికి కష్టపడుతున్నట్లు సందీప్ చెప్పారు. తన చిత్రాలను ప్రపంచస్థాయి సినిమాలతోనే పోల్చుకుంటానని చెప్పారు. ఏ సినిమా రిలీజ్ సమయంలోనూ విమర్శలపై దృష్టి పెట్టనని పేర్కొన్నారు.

బాక్సాఫీస్ వద్ద దుమ్ముదులిపేసిన ఈ సినిమాలో రణ్ బీర్, రష్మికతోపాటు బాలీవుడ్ బ్యూటీ తృప్తి డిమ్రీ కీలకపాత్ర పోషించింది. అనిల్ కపూర్, బాబీ డియోల్, శక్తి కపూర్ కీలక పాత్రలు పోషించారు. త్వరలోనే ఈ సినిమా ప్రముఖ ఓటీటీ నెట్ ఫ్లిక్స్ లో స్ట్రీమింగ్ కానుంది. థియేటర్‌ వెర్షన్‌ కోసం తొలగించిన తొమ్మిది నిమిషాలను ఓటీటీ వెర్షన్ లో యాడ్ చేయనున్నారు మేకర్స్.

అయితే యానిమల్ తర్వాత సందీప్ కొత్త సినిమా ప్రకటన కోసం ప్రేక్షకులు వెయిట్ చేస్తున్నారు. ప్రభాస్‌తో స్పిరిట్ సినిమాకు సందీప్ ఇప్పటికే కమిట్ కాగా.. ఐకాన్ స్టార్ అల్లు అర్జున్‌తో ఒక ప్రాజెక్ట్ చేయనున్నారు. సూపర్ స్టార్ మహేశ్ బాబుతో ఒక సినిమా చేయాలని సందీప్ అనుకుంటున్నారట. ఈ మూడు సినిమాలతో పాటుగా యానిమల్ సినిమాకు సీక్వెల్ యానిమల్ పార్క్‌ను తెరకెక్కించనున్నారు.