ఉల్లాసంగా నాని, ప్రియాంక.. మెలోడియస్ లిస్ట్ లోకి!

టాలీవుడ్ నేచురల్ స్టార్ నాని ప్రస్తుతం సరిపోదా శనివారం మూవీ చేస్తున్న విషయం తెలిసిందే. పాన్ ఇండియా లెవెల్ లో యాక్షన్ థ్రిల్లర్ గా వస్తున్న ఈ సినిమాకు వివేక్ ఆత్రేయ దర్శకత్వం వహిస్తున్నారు. అంటే సుందరానికి మూవీ తర్వాత మరోసారి వీరి కాంబోలో మూవీ రావడంతో మంచి అంచనాలు నెలకొన్నాయి. ఇప్పటికే సినిమా నుంచి రిలీజ్ అయిన పోస్టర్లు, టీజర్ ప్రేక్షకులను విశేషంగా ఆకట్టుకుని పాజిటివ్ బజ్ క్రియేట్ చేశాయి.

ఈ సినిమాలో ప్రియాంక అరుల్ మోహన్ హీరోయిన్ గా నటిస్తోంది. కానిస్టేబుల్ చారులతగా కనిపించనుంది. అయితే రిలీజ్ డేట్ దగ్గరపడుతున్న కొద్దీ మేకర్స్ జోరుగా ప్రమోషన్స్ చేస్తున్నారు. వరుస అప్డేట్స్ తో సందడి చేస్తున్నారు. అలా మ్యూజికల్ ప్రమోషన్స్ లో భాగంగా సినిమా నుంచి ఇప్పటికే రిలీజ్ చేసిన గరం గరం సాంగ్ మంచి రెస్పాన్స్ అందుకుంది. చార్ట్ బస్టర్ లిస్ట్ లోకి చేరింది. ఇప్పుడు మరో సాంగ్ అందరినీ ఆకట్టుకుంటోంది.

రీసెంట్ గా మేకర్స్.. సెకండ్ సింగిల్ ను విడుదల చేసిన విషయం తెలిసిందే. ఉల్లాసం అంటూ సాగే ఆ సాంగ్ మ్యూజిక్ లవర్స్ ను ఫిదా చేస్తోంది. మెలోడియస్‍ గా సాగుతున్న పాటలో సూర్యగా నాని, చారులతగా ప్రియాంక కనిపిస్తున్నారు. సినిమాలో వీరిద్దరి మధ్య ప్రేమ పుట్టే క్షణాలను సనరే చక్కగా వర్ణించారు. క్రేజీ డైలాగ్ తో మొదలైన సాంగ్.. ఇప్పుడు సోషల్ మీడియాలో ఫుల్ వైరల్ గా మారింది. నెట్టింట మంచి వ్యూస్ అందుకుంటోంది.

నాని మెలోడీస్ లిస్ట్ లో మరో సాంగ్ చేరిందని ఫ్యాన్స్ అండ్ నెటిజన్లు కామెంట్లు పెడుతున్నారు. నాని, ప్రియాంక జంట మధ్య కెమిస్ట్రీ నెక్స్ట్ లెవెల్ లో ఉందని చెబుతున్నారు. ముచ్చటగా కనిపిస్తున్నారని అంటున్నారు. నాని, ప్రియాంక మోహన్ మధ్య డ్యూయెట్ సాంగ్ గా వచ్చిన ఆ పాటకు మ్యూజిక్ డైరెక్టర్ జేక్స్ బెజోయ్ మంచి మెలోడీ ట్యూన్ ఇచ్చారు. హృదయాన్ని హత్తుకునేలా ఉందనే చెప్పాలి. పాటను సంజిత్ హెగ్డే, కృష్ణ లాస్య ముత్యాల పాడారు.

ఇక ఈ సినిమాలో ఎస్ జే సూర్య కీలకపాత్ర పోషిస్తున్నారు. డీవీవీ ఎంటర్టైన్మెంట్స్ బ్యానర్ పై డీవీవీ దానయ్య నిర్మిస్తున్నారు. ఇప్పటికే షూటింగ్ పూర్తి చేసుకున్న మూవీ.. పోస్ట్ ప్రొడక్షన్ దశలో ఉంది. తెలుగుతో పాటు హిందీ, తమిళం, కన్నడ, మలయాళ భాషల్లో ఆగస్టు 29వ తేదీన విడుదల అవుతుంది. మరి వరుస హిట్లతో మంచి జోష్ మీద ఉన్న హీరో నాని.. ఈ సినిమాతో ఎలాంటి విజయాన్ని అందుకుంటారో చూడాలి.